Bruk lih tame kraong Ban Gòn di tỉnh Bình Dương daok mboh ralo, ngak brei sit veik jalan ia nduac, ngak kan kandah tal bruk tathuak ia, bruk pacang caga ribuk ia sua. Urang pan akaok tỉnh ini gam gam hu harak tacei pato brei pasiam veik, langyah ka nyu salah dom bruk lih tame kraong min mbiah tal urakni bruk nan jeng daok rah tabiak, hu tamuh birau veik. Thiên Lý, urang vak di Rayo sap ndem Viet Nam daok di Ban raya HCM hu kadha vak brei thau ka bruk nan:

 

Kraong Ban Gon labik nduac tapa ban Thuận An, tỉnh Bình Dương atah labaih 15km. Dalam bruk quy hoạch đô thị di Thuận An tal thun 2020, pamaong tal thun 2030 ye taneh tapen kraong Sài Gòn piah pala phun hijao, daok labik nao tapa phường Vĩnh Phú ye ngak labik pablei salih. Quy hoạch nan hu ralo bhap bini njauk hatai kayua oh lac rik tame khik caga ar pacang kraong Ban Gon, pacang glut jaleik taneh tapen kraong bo daok hu taneh pala phun kayau hijau mekre, labik ma-in bui sambai ka rahra. 

Cagar veik bruk quy hoạch, urak ini, rah tui kraong Bai Gon labik nao tapa ban Thuận An, kuan mbang, quan café  tapen kraong pakacah gauk tamuh tagok yau ye: kuan mbang Dìn Ký, kuan mbang Lục Bình, kuan café  Garden, café Điểm Hẹn...Piah hu labik gheih mekre pachreih tuai damuai, po dom po labik ini ngak ar pacang ka eng drei meng bê-tông atah yaok pluh mét tapen kraong.

Di ban sit Bến Cát, takai kraong Ban Gòn jeng njuak urang lih tame piah padang nha hang Rạch Mít, phim trường Limli. Di labik ini daok hu rilo mblang taneh urang tuh bê tông lih mek jalan khik pacang tapen kraong piah ngak bein. Muk Nguyễn Thị Hà, Akok UB bhap bini xã Phú An, ban sit Bến Cát ndom lac, hu bruk padang ngak lih tame kraong Ban Gon saong kraong Thị Tính pak ini. Dalam nan, hu rilo danak dak meng labik hu meng lavik mai, meng tuk oh ka hu quy định jalan ar pacang kraong yau nan ye bhap bini padang ngak tui hatai di drei: “Dahlau diah pak ini quy định karei, urak ini hu quy định karei, khol dahlak dak brei ngak tui bruk birau di urak ini. Dom hagait daok tavak tavaiy veik meng dahlau diah meda brei pasiam veik.”

  Dom danak dak hu meng lavik mai min ban Thuận An saong ban sit Bến Cát birau padang kapol nao pasang iek, langyah dom bruk ngak suan tuk cử tri pok sap. Dom nha hang, danak dak hu ngak harak langyah, iew po labik nan brei yak klak. Dom danak dak karei tok hu panuac ieu kakei oh pandar yak klak ngak ka bhap bini pandik hatai. Meyah bruk nan daok rah tabiak ye meda daok hu rilo danak dak karei meda lih mek taneh tapen kraong ngak drap ar di drei.

Ong Lê Cảnh Dần- Phaok Yam ndok  Sở Ngak nong saong patagok palei pala tỉnh Bình Dương brei thau, tapa duah thau di sở, bruk lih tame kraong Ban Gon  bhian rah tabiak. Sở hu khan tagok urang ngak praong di tỉnh brei tacei pato urang jakar dom palei brei langyah catang bruk lih kraong ia, ar pacang kraong, craoh. Bruk kan di urak ini lac bhap bini sahaneng lac taneh tapen kraong nan di drei nan ye ngak ar pacang oh tui quy định: “Dom urang lih mek lac urang daok di labik karei mai blei taneh. Urang padang ngak ar oh likau adat. Urang jakar trun mai iek oh po sang, tal tuk glut jaleik  ye ndok khin hu jien  daong pacang caga bala meng langik tasik. Khol dahlak mboh min tol pathau khan, jak ba kakei  bhap bini taneh tapen kraong lac taneh ngak nong saong  daok dalam taneh oh brei padang ngak tui tacei ba di UB bhap bini tỉnh.”

Ong Nguyễn Tầm Dương, Akok Mban kinh tế - Gilang pariak Kadung jien karja HĐ bhap bini tỉnh Bình Dương brei thau, bruk ar kraong njuak urang lih tame hu trach nhiem di bhap bini min bruk khik iek di karja lac biak praong.

“ Biak di nyu, khik caga jalan kraong oh kan ralo. Hu quy định ka jalan praong tapen kraong ye brei padang jamang, paga. Gah taneh riya brei pambuak bruk saong karja palei thei ngak suan piah samar thau saong langyah chip.Oh kan hagait  min khin ngak atau oh min.”

Cambiac laic, bruk tamuh tagok saong daok veik di dom danak dak lih tame kraong, mai meng kurang sahaneng di jabat chức năng caik rah tabiak bruk nan. Kayua yau nan ye, piah pasiam veik bruk lih tame, meblah mek taneh khik caga ar kraong, langiu di pasang iek, langyah catang bruk ngak suan ye praong jang lac brei langyah catang dom kapol, dom urang ngak praong caik rah bruk nan habar ka urang thau huac, pacang caga pambak tame kayua bruk halei nan ngak mengak oh mboh oh thau, caik ka urang ngak suan hukum./.

 

 

 Urang lang: Aí Nghiêm - 1/7/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân