Hu mbaok meng labaih 25 thun, min buôn Sê Đăng 2, xã Ea Sar, huyện Ea Kar tỉnh Đắk Lắk oh ka hu điện.  Peih ngak danak dak pabak điện palei pala meng jalan điện  negar , urak ni gah padang ngak dok jhul samar bruk ngak piah hu  điện dahlau di  harei Tết nguyên đán. Mik va di labik ni dok chreih chrai taduan raok brukprong ni . Quốc Học –Urang vak di rayo sap ndom VN dok di Tây Nguyên hu kadha vak: “Đắk Lắk: Palei kan kathaot cang điện negar “ daa mik va song tong abih gauk tui pang.

 

Labaih  25 thun tapa, rai duik sang saai  Pul jang yau yaok rituh boh sang di palei Sê Đăng 2, xã Ea Sar, huyện Ea Kar (tỉnh Đắk Lắk) gaok rilo kan kandah kayua oh ka hu  điện. Hu karja dong yaok thun 500 ribau jien menyek piah truac gom, min hu tuk oh ginup, brei am njuh atau truac dil. Jiak di ni, mboh  jeing  điện padang geing tapen jalan song daok dui talei mai palei. Hatai mboh chreih chrai saai Pul sahaneng tal bruk truac dom bóng gom hadah tanyah , blei jamriak jhuk ia pandar song pruh ka phun pala .

 

 “ Hulin tame daok labik ni lavik ye, meng thun 1991. Mik va di labik ni dok rambah lo, Oh hu điện hagait, tok pandar gom menyek, ging pui atau din. Sang halei hu bình ắc-quy ye sạc di langiu min, yaok bình 10 ribau đồng, min jalan gluh baok yau ni biak rambah. Meyah hu  điện ye mik va sambai. Sang halei bo hu bingun ye  mek jamriak jnuk ia trun lac hu ia pruh ka bein cà phê, amriak kalu  atau njam patam hagait nan. Bingun payeng meng tangin nan, meyah hu điện ye drei oh daok ngak meng tangin tra. Drei blei boh bể bloh jnuk ia tagok . Meyah hu điện dahlau Noel ye dak siam ”. 

 

Oh khin ka rai duik sup palup, kayua oh điện negar, 3 thun dahlau, sang ong Ninh Trọng Chính song  7 boh sang karei dalam palei Sê Đăng 2 pataom jien hu jiak 100 triệu đồng piah dui điện mai meng  palei Trung Hòa. Yaom lac tok pandar piah truac hadah song lavik lavik iek  ti vi, min yaok bilan sang ong Chính bayar meng  250.000 tal  300.000 đồng jien điện. Makna lac kayua jalan talei hạ thế biak atah, chất lượng oh siam, chịu tải glong nan ye khat abih điện năng biak rilo. Urak ni jalan điện negar hu mai tal meteh palei, ong Chính chreih chrai, kayua jiak hu điện tani tanat song oh bayar jien điện yaom glong  .

 

 “ Geing hu ye, talei dui hu meteh palei ye. Tui nan khol hulin blei ti vi, blei tu liar piah caik pandap mbang menyum. Dom pandap điện karei njauk blei ye. Điện lac siam biak kein ka urang nong, pruh, menei , pandar, lisei ye mesup klauk điện tame cala pandiak nao ngak mai hu lisei huak ye, nan lac lagaih ka urang nong khol hulin. Ka dua lac pui hadah nyu hadah mbaok meta anek menuac. Ka klau lac iek khau tin thời sự”.

 

Ong A Uak ( bhian ieu lac Ama Tin) – Akaok palei  Sê Đăng 2 brei thau, di labik ni hu 194 boh sang , jiak 1.000 menuac , tong abih nan lac bangsa  Sê Đăng. Meng dahlau mai, mikva  pandar menyek piah truac hadah. Sang halei hu jien ye blei bình ắc-quy piah pang radio sing iek ti-vi nội địa. Kayua oh hu điện, yau nan ye bruk ngak mbang , ngak huak di bhap bini gaok rilo kan kandah, takik thau dom ilamu khoa học bahrau, sang kan kathaot dok labaih meteh palei. Akaok palei A Uak jia lac, anak tal hu điện negar, rai duik di mik palei Sê Đăng 2 hu rilo salih bahrau.

          

Tui  sở Công thương tỉnh Đắk Lắk,  bruk padang ngak jalan điện ka palei  Sê Đăng2, xã Ea Sar, huyện Ea Kar dalam danak dak pabak điện palei pala meng  điện negar. Danak dak ni hu 2km jalan talei trung áp, 5km jalan talei  hạ áp song 2 bilai  biến áp piah pabak  điện ka jiak 200 boh sang. Yaom lac peih ngak dalam tuk langik oh lagaih, gaok hajan ribuk song tavak jalan talei nao tapa jalan roya 29,  min bruk ngak nan jeng samar jang tikvak ba tabiak; tui kuhria dalam bilan 12 ni meda ngak salah bloh. Ni lac sa dalam dom palei puac di abih dalam tong abih 31 buôn  palei di tỉnh Đắk Lắk hu mbang tui danak dak pabak điện palei pala meng  jalan điện negar  dalam thun ni.  Ong Trần Văn Dũng – Phó giám đốc Điện lực Ea Kar brei thau, hadei di tuk nhà thầu ngak salah jalan điện hạ áp, đơn vị meda peih bruk caik hệ thống đo đếm, dong ka mik va tong abih talei ba meng gieng điện tame tal sang, samar hu  điện.

Oh ka tal sa bilan tra lac yam tapa thun bahtau 2018palei Sê Đăng2, xã Ea Sar, huyện Ea Kar, tỉnh Đắk Lắk taduan hu sa bruk biak hu makna, nan lac mbang camereip di abih hu điện negar. Ni jeng lac jalan peih tbaiak prong,dong ka mik va pasiam rai duik, patagok kinh tế – xã hội, yam tabiak truh kan kathaot ./.

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân