Urang nong dok pala pablah njam patam 

Ndom ka ilamu pala bimao, saai Tuấn brei thau, meng tuk pala tal tuk kaoh mek lac meng 65 tal 75 harei, yaok pok meda kaoh mek hu meng meteh kilo tal 600gr, bimao tabiak gam gam min tabiak rilo mbang, yaok mbang tabiak labaih sa adit hadei di nan nyu padeih 2-3 harei. Pajiah bimao meda hu patagok meng dom janih: padai, mùn cưa, kam, pong nerak.. Pajiah bimao lac jalan ba tal năng xuất tuk rong pala dalam labik dreih yau gauk. Kayua yau nan ye, tui saai Tuấn pajiah bimao (nấm sò) brei khik hu  dom ilamu  kỹ thuật. Mong iek gah langiu pok pajiah hu sambo patih yau gauk, rak bimao tamuh samu gauk meng angaok trun ala, oh hu sambo hajao, sambo katam, oh hu labik halei saluak.

Pajiah bimao oh taha atau oh meda (pandar pajiah brei njauk umo). Bimao hu ngak tui jalan khép kín, hu pandap ngak brei nhiệt độ tagok  24 độ C di tuk langik liar song hu jalan pruh ia sit sit, ngak liar di tuk langik pandiak 

Pajiah bimao nyu pahe bingi, yaok janih pajiah bimao nyu pahe karei di gauk, meyah mboh mbau mesam lac pajiah njom anek ruak, bimao khut… 

Hadei di tuk kaoh mek abih bimao, kadung phôi hajual song thu oh dok tabiak bimao hu brei taok trun song meda pandar piah srau haong  nguyên liệu atau ba nao pa- auk  piah ngak khak vi sinh.

Saai Tuấn brei thau, yaok harei saai pablei tabiak drak pasa 70-100kg bimao, yaom bimao that pablei tabiak darak pasa lac 45.000 đồng/sa kg. Urak ni, taneh pala  nấm sò di saai  Tuấn hu labaih  1.500m2 song  2 trại bimao hu tani tanat. Saai pala labaih 120.000 kadung phôi bimao/sa thun, ngak tui jalan  rilo meng lac bimao nấm sò, Yaok thun, hadei di tuk kaoh blaoh phun jien, saai  Tuấn daok laba hu labaih  300 triệu đồng. Urak ni, saai Tuấn jeng dok pala iek dom janih bimao karei. Yaok bilan saai laba hu labaih 30 triệu đồng meng bruk pala, blei saong pablei bimao./.

Urang lang: Hanipha- 14/10

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân