Urak ni yaom boh thanh long di Bình Thuận dok tagok khang, ni hu mong lac yaom glong di abih dalam 6 bilan ni mai. Min bruk hu yaom, takik hu pandap piah pablei jeng dok rah tabiak. Kadha vak di Ngọc Diệp angaok harak Bình Thuận brei thau ka bruk ni

Boh Thanh long hu tame pablei dalam siêu thị 

Urak ni, thanh long boh prong, boh siam, oh njom ruak hu urang mai blei yaom meng 15.000 - 20.000 đồng/kg. Daok boh oh siam, boh njauk bimao dahlau deih rilo meng tuh klaak urak ni jeng pablei hu yaom meng 4.000 - 6.000 đồng/kg.

Tui ong Nguyễn Đức Trí, Phó Giám đốc Pasak pachreih nong tỉnh Bình Thuận, makna yaom janih boh kayau ni tagok glong dalam dom harei tapa, kayua dahlau di nan, langik pandiak bhang, urang nong pala thanh long oh hu laba nan ye paik klaak dom bingu oh brei nyu tabiak baoh dalam dom bilan gam, meng nan oh ginup baoh pabak ka darak pasar, ba tal kurang - takik, nan ye jhul yaom boh kayau ni tagok glong.

Gam uak boh thanh long ka labaih 1 tấn baoh jaik tasak, saai Nguyễn Thị Mây, daok di palei Suối Đá, xã Hồng Sơn, huyện Hàm Thuận Bắc bui sambai brei thau: “Dom bilan dahalau, hulin mboh dom boh sang taom dar cakak klaak abih caduk, hulin jeng kuhria ngak tui. Min hulin khik veik piah iek glang, dok 2-3 harei tra lac pablei, yaom 15.000/kg, huln mboh bui sambai lo”.

Bein thanh long 2.000 gheng di saai  Nguyễn Vĩnh Xuân daok di xã Tân Thuận, huyện Hàm Thuận Nam jeng dok hu boh tasah meriah phun; urang mai blei tal bein yaom 17.000/kg. Saai  Xuân brei thau: “Dom mbang hajan meng bloh, rilo boh thanh long njauk bimao, sahnang lac tuh klaak yau dahlau deih, min, hulin jeng pablei hu yaom glong”, 

Nao tal dom labik blei  thanh long hu thau lac, kayua baoh takik nan ye dom  doanh nghiệp dalam tỉnh brei jhul yaom tagok glong piah blei hu ginup. Saai Đinh Thị Kiên, Giám đốc Công ty TNHH TM XNK Kiên Kiên, Hàm Thuận Nam brei thau: “Tuk vak ni, di drak pasa Trung Quốc, yaom boh  thanh long khik hu tani tanat, oh tagok. Bruk urang mai blei yaom glong lac piah hu ginup baoh pablei tui sanya dahlau. Kayua baoh hu takik, nan ye, dom pandap pablei tabiak negar langiu oh dok hu palih ruah tani tanat yau dom thun dahlau”. 

Urak ni thanh long hu caduk praongh nde tangin ane dok hu biak rilo, tui kuhria dalam 50 harei tra  meda paik hu. Tuk ni laik tame puac bilan nan ye mik va urang nong caik veik piah iek glang song duah jien buh tame mbang patui di nan. Min, ong Nguyễn Đức Trí, Phó Giám đốc Pasak pachreih nong  tỉnh Bình Thuận, hu panuac kakei mikva njau kuhri kuhria ka nyu lagaih, jalan ngak lac rong bloh piah pablei tabiak negar langiu. Meyah caik biak rilo, bruk iek glang gaok kan kandah, pablei tabiak negar lingiu takik meda ngak brei yaom trun.

Bình Thuận hu labaih  30.000 ha thanh long, hu jiak  600.000 tấn yaok thun, dalam nan meng 15-20% pablei dalam negar , dok veik  80-85% pablei tapa rilo taneh ia karei, min rilo di abih jeng lac tapa drak pasa  Trung Quốc./

Urang lang: Hanipha- 14/7 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân