Dâu tây lac sa janih phun pala lagaih song langik meteh pandiak meteh la-an. Di negar drei, dâu tây bhian hu pala di DOM labik langik li ar lahei Luac thun yau Đà Lạt (Lâm Đồng), Cao nguyên Mộc Châu (Sơn La). Min phun dâu tây meda tamuh siam di bhum taneh thu,, rilo pandiak yau Ninh Thuận. Kadha urang ngak hamu cong thau adit ni , khol drei pang yaih khan ka bruk pala phun dâu tây di boh sang muk Võ Thị Hương (palei Bình Quýban sit Phước Dân, huyện Ninh Phước). Ni lac bein dâu tây camereip di tỉnh Ninh Thuận.

Urang nong pala pablah njam patam dalam tuk salih bilan 

Urak ni , bruk pala  dâu tây di sang muk Hương dok dui pachreih rilo menuac urang mai rivang iek, duah thau, saong peih tabiak jalan patagok bahrau meng janih phun ni di bhum taneh bak pandiak Ninh Thuận. Muk  Hương brei thau: Camereip sang muk ngak sang lưới kurhia pala njam hacih saat piah pablei. Min kayua takre phun dâu tây song mboh dâu tây lac janih boh hu yaom glong di darak pasa, sang muk salih jalan ngak. Muk blei pajaih dâu tây meng  Đà Lạt mai pala iek.

Min, tuk bahrau pala muk gaok rilo kan kandah, njauk khat lahik, kayua phun dâu tây oh ka randap song langik pandiak, phun oh tamuh praong, phun njauk katam layau song metai rilo, daok dom phun duik hu ye tabiak boh sit song mesam. Oh kandun likuh, tapa duah thau angaok harak báo, mạng internet, muk kham palih ruah dom pajaih dâu tây tamuh hu dalam langik pandiak, ba mai pala dalam  sang  lưới tui jalan tacei pato... Mbang pala ini jeng oh ka yau hatai khin, kayua phun dâu tây biak  nhạy cảm song langik thu pandiak nan ye suai praong, phun pala jeng daok metai rilo. Muk blei gac asar pajaih eng drei pandih di bein sang song iek glang phun anek tani tanat, oh pala tapak di angaok taneh bo caik phun anek tame chậu giá thể, caik angaok kệ kayau. Puac di abih lac muk hu bein dâu tây labaih 5.000 phun.

Sa mbang mboh dom pa-op ia tasau di dom taco menyum blaoh klaak nao, muk sahaneng dalam ia tasau hu rilo janih dinh dưỡng siam ka pren yava anek menuac, ye jeng siam ka phun. Sahanang ye ngak, hadei di dom mbang ngak iek, muk mboh dom phun hu pruh ia tasau tamuh siam song tabiak bingu, boh samu gauk jang. Min, meyah pruh ia tasau tapak tame gha ye phun njauk dum kaik palai saong tamuh bimnao. kayuayau nan ye, muk Hương pa-auk ka ia tasau tagok mesam bloh lai mbrang song ia pruh  ka dom phein dâu tây. Tuk mboh hu bruk ni, muk nao tal dom tiệm tạp hóa sua blei dom pa-op ia tasau abih tuk vak pandar, ngan song yaom biak lap, ba mai pa-auk ka nyu tagok mesam piah rong phun dâu tây dalam bein biak siam.

Urak ni, dalam  1000 m2 sang lưới, bein dâu tây di sang muk hu labaih  5.000 phein dok hu iek glang biak tani tanat. Dâu tây di pak ni hu kanduh catang jangeih, boh oh biak prong, tasak meriah   nyu mesam song bingi pahe janih ia tasau biak karei. Muk Hương daok brei thau lac: “meng 02 tal 03 harei tui bruk tamuh tagok di phun bo pruh IA ka nyu lagaih.. Sữa chua hu pa-auk tagok mesam hu lai song ia  tui tanut lac 200 ml sữa chua hu tagok mesam lai song 15 lít ia vak samu tangin bloh pruh ka phun, langiu di nan, oh pandar janih jru khik caga phun pala halei nan ye boh biak siam, biak hacih sa-at  ka urang mbang”.

Tukvak meng pala phun anek tame chậu giá thể mbiah tal tuk paik boh lac labaih 03 bilan. Bahrau ni,  tukvak jiak Tết Nguyên đán, sang muk  Hương paik mbang dâu tây camereip  song yaom pablei di bein lac 300.000 đồng/kg, saong hu biak rilo menuac mai rivang iek, thaok binguk. Urak ni urang khin blei rilo bo bein dâu tây sang muk oh ginup pablei ka drak pasa  .

Hadei di tuk pala iek tuk camereip hu jak jeng, urak ni sang muk Hương dok peih prong taneh pala tagok tal 2.000m2, pamong tal jalan ngak mbang prong, piah patagok  kinh tế boh sang. lingiu di nan, muk dok hu pala dom janih bingu dalam bein piah duah jien tame gam ngak tiểu cảnh, piah patagok bein dâu jeng sa labik rivang main, du lịch dalam palei. Muk halan hatain klah rabha ilamu, kỹ thuật pala dâu tây angaok bhum taneh pandiak Ninh Thuận ka dom urang halei khin pala./.

Urang lang: Hanipha- 1/4

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân