Dahlau di ini 10 thun, dua adei saai Ngô Văn Quỳnh saong Ngô Văn Cường daok di palei 3, xã Lộc Tân, Bảo Lộc, tỉnh Lâm Đồng brei tak klaak meneing phun caphe piah salih tapa pala bimao tangi tikuk caong khin duah jien tame ka baoh sang. Jak jeng di bruk ngak nan hu ba jien tame rilo saong tani tanat yaok thun ka sang sa-ai Quỳnh saong sa-ai Cường bo daok ba bruk ngak ka yaok pluh urang dalam palei.

Sa-ai Ngô Văn Cường daok paik bimao

Thun 2010, dalam sa mbang nao Đồng Nai rivang urang krein, dua adei sa-ai mboh dom trại bimao tamuh dak gauk saong hu thau  kein laba meng pala bimao tangi tikuk. Tuk veik mai sang, dua adei sa-ai biai gauk  brei salih meneing taneh pala caphe tapa pala bimao. Sahaneng blaoh ngak, dua adei sa-ai tak klaak phun caphe blaoh padang dua trại bimao di taneh praong 200 m2  yaok trại. Tuk birau pala, dua adei sa-ai  padang sang ka bimao meng tabung tauk phun talang. Min, kayua phun talang dak kan duah saong tukvak pandar katut samar bruk tahak yau nan ye dua adei sa-ai salih tapa tauk tôn. Buh jien tame ngak sang meng thép, tabung tauk tôn yaom lac abih rilo jien jang ngak sang pala bimao yau dahlau daih meng 10 – 15 trieu dong sa baoh sang min pandar hu suai lavik, kajap jang, prong nerang khik ẩm jeng pandar hu suai lavik jang. Hadei di sa tukvak pala bimao dalam sang tauk tôn mboh  nyu tamuh praong siam yau pala di sang tauk phun talang oh karei hagait  nan ye dua adei sa-ai brei tauk ton ka taong abih dom baoh sang pala bimao daok veik.

Pala bimao tangi tikuk piah hu laba, urang pala brei thau cambaih ka sinh thái di bimao piah pasiam dom bruk yau ye nhiệt độ, ẩm độ, ia harei, hangin, môi trường…ka nyu lagaih piah ka bimao tamuh saong praong tagok siam. Abih di nyu lac, brei caik hatai tal bruk bhian pruh ia kayua bimao brei hu rilo ia piah tamuh. Tuk Camereip, dua adei sa-ai njauk salih gauk pandar nding ia piah pruh, hadei di nan mboh bruk pruh meng tangin  ia oh hu sumu gauk saong abih rilo prein yawa. Kayua yau nan ye dua adei sa-ai buh jien tabiak ngak he thong pruh ia tự động. Phôi bimao ba mai meng tỉnh Đồng Nai saong dom labik di Bảo Lộc ngan saong yaom jien 3.000 đồng sa kadung.

Ndom menyai saong khol dahlak, sa-ai Cường khan lac, pala bimao tangi tikuk samar mek veik hu phun jien saong 1 thun paik hu  4 mbang, kuhria rah tapa 2 bilan meteh paik hu 7 tạ bimao ngan saong taneh praong 200 m2. Bimao paik blaoh hu urang mai blei tal sang oh abih jien pajeng ba. Urak ini, sa-ai hu 4 trại bimao di taneh praong 400m2, yaom pablei tabiak darak pasar  meng 75.000 tal 90.000 đồng sa kilo, kaoh abih jien buh tame ngak dua adei sa-ai Cường saong Quỳnh  hu laba labaih 500 trieu đồng sa thun. Kadung bimao hadei di tuk paik  blaoh jeng hu pablei  yaom  500 đồng sa kadung. Urak ini, sa-ai Cường daok ngak veik sa trại bimao praong 200m2 piah peih praong bruk ngak bimao. Muk Bùi Thị Thanh Huyền - Phó akaok Kapol urang ngak nong xã Lộc Tân brei thau: “Ini lac bruk pala bimao tangi tikuk akaok meti di xã, hadei di sa tukvak ngak meda ndom  ini lac sa dalam dom bruk ba mai kein laba glong dalam tuk yaom kaom dom janih phun hu pala ralo di bhum taneh ini oh tani tanat piah ka mikva dalam xã bac megru ngak tui, piah patagok raidiuk”. Kak kajap saong bruk pala bimao meng dom thun ini mai, bruk pachreih ba dua adei sa-ai ini sahanang hatai peih praong bruk pala bimao lac hu labik pablei biak tani tanat./.

Urang lang: Aí Nghiêm  15/4/2020

 

        

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân