Dam dara dok pasiam veik jalan mbak nao mai 

Meng harei ini (15/9) tal abih harei 25/9/2020, dhar pajeng ba jalan pasei Bei Gon taduan bruk tut angan blei harak radaih pui brei kapul nyaom nao mai tuk Tết thun 2021.  Gah jalan pasei taduan tut angan blei harak brei kapul nyaom nao saong mai, yaok mbang meng 05 vé tagok. Tukvak pablei tui kuhria lac meng akaok bilan 10/2020 saong hu pablei dahlau ka dom kapul nyaom gah tapon nyom bol pan phao kraong bhap bini, sang bac ĐH, CĐ, labik ngak kong, labik chế xuất, dom kapul nyaom xã hội, dom kapul dalam gah jalan pasei ...

Hãng kapar haoh Vietjet Air meda brei peih veik abih jalan par dalam negar saong pablei 1,8 triệu harek vé ahaoh yaom 0 đồng (ka oh kuhria jien je, jien phí) peih pablei dalam 3 harei ameh, meng 15-17/9/2020 piah par dalam Việt Nam. Vaktu par meng 10/10/2020 tal 31/5/2021 (lingiu di harei roya, Tết). Jeng dalam vaktu ni, Vietjet alin danak dak ưu đãi praong di abih kuhria meng dahlau mai nan lac hu payua 15kg pandap oh mek jien brei ka taong abih tuai par dalam Việt Nam meng urak ni tal 28/3/2021,  pandar ka tuai blei vé saong biyar jien dahlau harei 24/10/2020.

Tui pasak pasang iek ruak kik tỉnh Lâm Đồng, tal urak ini dalam tỉnh hu labaih 330 mbang urang ruak pandiak tabiak darah. Ruak hu mboh di rilo labik dalam tỉnh, min rilo di abih lac di dom huyện Bảo Lâm, Đức Trọng saong Đạ Tẻh. Piah plaih ka ruak tamuh praong jeng jit, gah y tế Lâm Đồng hu pambuak bruk khang kajap haong dom puk palei ba tabiak dom jalan pacang caga pandiak tabiak darah; saong brei jhul khang bruk pathau khan, jak ba bhap bini pametai loăng quăng saong plaih jamok kaik, samar mboh dom urang ruak. Meng ngak siam bruk pacang caga jit nan ye tal urak ini dalam tỉnh ka oh hu urang ruak metai kayua pandiak tabiak darah

Sang iek ruak nhiệt đới TPHCM bahrau brei thau, sa uranaih 12 thun, daok di huyện Sa Thầy, tỉnh Kon Tum njom ruak bạch hầu ác tính metai hadei di meteh harei tame sang iek ruak. Dahlau di nan, harei 13/9, ranaih ruak hu sang iek ruak pak nan payua tagok sang iek ruak Nhiệt đới TPHCM di harei ruak ka 7. Nan lac urang ka klau njom ruak bạch hầu ác tính, metai di sang iek ruak nhiệt đới meng bilan 6 tal urak ni. Abih dom urang ruak ni jeng hu taong ruak di sang iek ruak pak  palei saong ka oh klauk jru vắc-xin pacang caga ruak bạch hầu.

Harei 14.9, Gah CSĐT Công an tỉnh Đồng Nai hu cap kreik ong Trần Quốc Tuấn, dahlau daih ngak Yam ndok Gilang pariak Karja dhar Đồng Nai piah duah thau ka bruk pagam pambak tame bruk ngak di drei dalam tuk daok ngak bruk karja. Njauk cap kreik haong ong Tuấn daok hu ong Võ Khắc Hiển, dahlau daih ngak Phaok Yam ndok saong Chánh thanh tra Gilang pariak karja dhar Đồng Nai, ong Hiển njauk cap kreik piah duah thau ka bruk kurang trách nhiệm ba tal khat lahik trak. Dom sarak hu Viện KSND samu pakat mbaoh tangin. Tapa duah thau mboh lac, ong Trần Quốc Tuấn saong ong Võ Khắc Hiển njauk cap kreik kayua pambuak tal dom bruk ngak suan di dom Kadung jien brei mesraiy dalam tỉnh Đồng Nai.

Harei ni, Mintri jien padai Trung Quốc brei thau lac meda kadun tukvak oh mek jien je 16 janih pandap di Mỹ sa thun tra. Dalam dom pandap panda oh mek jien je hu manjiek, váng sữa, tapun ikan ….dom apndap panda ni oh mek jien je tal abih harei 16/11/ 2021. Di harei 17/9 thun blaoh, Trung Quốc brei thau dom pandap panda oh mek jien je di Mỹ hadei di tuk gah Mỹ  oh mek jien je 34 tỷ đô la  pandap panda di Trung Quốc. Tui Mintri jien padai Trung Quốc, bruk kadun vaktu oh mek jien je 16 janih pandap di Mỹ lacjalan hu nao hu mai. Dom pandap panda ni oh mek jien je tal abih harei 16/11/ 2021.

Tok dalam 2 adit, 55 rabau urang halan hatian hu pilih ruah di Mát-xcơ-va piah dut iek vắc-xin Sputnik V di Nga. Dahlau di nan, tapa dut iek mbang 1 haong mbang 2 di vắc-xin Sputnik V hu ngak di bilan 6 saong 7, hu mbaok di 76 urang halan hatian, brei mboh lac taong abih dom urang hu mbaok tame jeng patagok kháng thể pacang veik virus SARS-CoV-2 saong oh hu tác dụng phụ praong trak halei. Tui hãng thông tấn TASS, angan dom urang halan hatian hu mbaok tame klauk vắc-xin hu rilo urang ngak praong dalam rajaei saong dom urang ilamu hu angan je dalam rilo gah di Nga saong taneh ia lingiu.

Sa baoh ia khan praong tal 113 km2 –praong jang ban ine Paris di negar France – daok ralai saong tabiak truh di kraong ia khan praong abih di Bắc Cực kayua langik pandiak tagok di Greenland. Ia khan nan tabiak truh kraong di gah Đông Bắc Greenland. Dom urang ilamu daok maong iek binah daok viek di kraong ia khan ni daok ralai biak samar drah./.

Urang lang: Mousaphuong -Thu Thảo 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân