Urang nong pala pablah tame boh lahong 

Lac boh sang nao dahlau dalam bruk ba 1.500 phun kruac bung klik hajao pajaih Bến Tre mai pala di angaok taneh prong labaih  5 ha meng akaok thun  2014, tal urak ni, boh sang ong Trần Văn Đoan, daok di palei  Vân Kiều, xã Cư Elang, huyện Ea Kar duah hu gam gam meng  1 – 1tỷ 200 triệu đồng/sa thun  meng bein kruac bung.

Ong Trần Văn Đoan khan lac, piah ka phun kruac bung tuk halei jeng hajao siam song brei boh luac thun njauk palih ruah pajaih siam, khang kadang, tuk pala brei pok taneh glong song ngak jalan tathuak ia pacang dauk. Khak ka phun brei pandar khak hữu cơ, takik pandar khak vô cơ; pacang caga halak halin ruak kik jeng pandar dom janih chế phẩm sinh học, takik pandar dom janih jru hóa học. Langiu di nan, njauk phluh kanduh piah patakik ia song dinh dưỡng dalam dom vaktu  kruac bung tabiak bingu dalam thun.

"Phun kruac bung khin tabiak boh luac thun brei buh ginup khak  hữu cơ ka phun ginup  dinh dưỡng song khang kadang. Jalan ngak ka 2 lac phluh kanduh ala gha piah patakik ia  song  dinh dưỡng piah phun tabiak bingu njauk tuk vak,  njauk sangka lac phluh kanduh oh dalam rilo, meng 1,5 – 2 cm song oh tapa 25 harei phun gam kanduh veik piah siam veik song tabiak bingu ndam boh. Dalam tuk vak ni brei buh pabak dom janih khak Kali, Urê, NPK...min rilo meng lac khak limo ủ hoai mục"

Muk  Hoàng Thị Mùi, daok di palei  Ea Rớt, xã Cư Elang, huyện Ea Kar jeng khang hatai ba labaih  1 ha taneh tapa pala  200 phun kruac bung meng kreih thun  2016. Meng hu bruk daong ilamu  kỹ thuật pala song iek glang  tui tanut Vietgap meng sang ong Đoan, hadei di labaih  3 thun ngak, bein kruac bung hu paik mek boh .

"Pala tamuh samar lo. Hadei di  3 thun sang paik baoh hu  mbang camereip jiak 1 tấn boh. Yaom lac bahrau pala min hulin mboh kein laba meng phun kruac bung biak cambaih laih. Hulin dok kuhria nyim jien di gilang pariak piah pala rilo jang piah hadei di ni mek hu jien rilo jang".

Tui UBND xã Cư Elang, dalam xã urak ni hu labaih   400 ha phun mbang boh hu asar  yau: Cam, quýt, panat, kruac bung.... dalam nan phun kruac bung hu pala rilo di abih labaih 100 ha. Ong Đặng Quốc Tuấn – Phó chủ tịch UBND xã Cư Elang brei thau, yaom lac eng drei pala min phun kruac bung hu kein laba kinh tế biak glong. Meng phun kruac bung bo rilo sang urang nong hu tabiak truh kathaot, padang hu sang siam, rong anek bhik mbang bac atau blei hu radeih pak kong  yaom jien tỷ. UBND xã dok pambuak bruk song jabat chức năng dong ka urang nong patagok phun kruac bung tui tanut chuẩn Vietgap piah paglaong jang yaom janih baoh ni  .  

 "UBND xã dok daa dom  chuyên gia ngak nong dang akaok di  tỉnh saong dom  chuyên viên  di Jabat ngak nong huyện mai peih dom tal pato tacei, daong ilamu  kỹ thuật ka mik va. Piah mik va ngak njauk ilamu  kỹ thuật song patak pataom di abih  piah mik va duah hu laba .”

Anak tal  oh lac di  xã Cư Elang bo rilo xã dok jiak tapen di  huyện Ea Kar meda hu  rilo bruk pala phun mbang boh dalam nan hu phun kruac bung tui jalan hữu cơ khang kajap (tui tanut  Vietgrap). Meng nan, dong ka bhap bini patagok jien mek tame song prong jang lac urang blei mbang meda hu dom janih baoh hacih saat piah mbang./. 

Urang lang: Hanipha 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân