Di bhum taneran krong CL dak harei dak hu rilo labik glut jaleih 

Labaih sa bilan ni mai, jalan Tây Ba Rài di  xã Hội Xuân, huyện Cai Lậy, tỉnh Tiền Giang njauk glut jaleih trak. Yaok labik glut jaleih atah labaih  20 mét song mbang dalam tame mbaok jalan  palei pala. Piah khik salamat ka radeih nao mai, karja pak ni oh brei radeih 3 kong peih nduac  song yaok pataom dom labik glut jaleih karei angaok jalan piah pasiam veik. Meng akaok thun tal ni, di  huyện Cai Lậy hu  10 labik glut jaleih bahrau atah abih tih jiak  500 mét, brei hu  14 tỷ đồng piah pasiam veik.

Meng akaok thun 2020 tal ni, Tiền Giang hu 72 labik glut jaleih, phun jien ngak veik jiak 55 tỷ đồng, rilo meng lac di dom  huyện gah pai yau : Cái Bè, Cai Lậy song  Châu Thành. Taeng bhum ia taba  Gò Công jeng hu rilo labik glut jaleih trak  di ban sit Gò Công song  huyện Gò Công Tây.

Dok di  tỉnh Bến Tre, urak ni hu labaih 112 labik glut jaleih takai krong song  8 labik glut jaleih takai tasik, ngak kan kandah praong tal bruk pala drak, nao mai di bhap bini.  Mbang glut jaleih bahrau di abih lac di akaok bilan  7, labik ar pacang atah labaih  50 mét di palei  4, xã Tam Hiệp, huyện Bình Đại glut jaleih mbang dalam tame taneh labaih 2 mét. Langiu di nan, rilo labik ar pacang karei jeng hu mboh dom labik la-ai prong  .. UBND tỉnh Bến Tre hu tabiak bruk samar drah glut jaleih takai krong, takai tasik di dom labik . Tui nan, Bến Tre hu 4 labik takai krong, takai tasik atah labaih 7.000 mét njauk glut jaleih brei samar langyah.

Di tỉnh Long An, meng bilan  2/2020 tal ni, kayua pandiak bhang, kurang ia song ia mbak njom tame lavik harei, ia dalam krong, danao trun beir, taneh thu ba tal 8 mbang glut jaleih labaih 500 mét takai krong  song jalan mbak palei pala  di dom huyện Tân Trụ, Cần Đước, Thạnh Hóa song Thủ Thừa.   

Di rilo tỉnh ban karei dalam bhum taneran krong  CL yau: Vĩnh Long, Hậu Giang  song ban Cần Thơ… jeng dok rah tabiak  rilo labik glut jaleih, glut taneh tapen krong, ribong. Dom gah  chức năng song bhap bini dok kham merat pasiam veik piah patrun patakik khat lahik . Min, kan kandah dalam bruk  pasiam veik song pacang caga glut jaleih tapen krong ribong di labik ni lac phun jien. Abih di nyu nan lac, di dom labik glut jaleih yau hàm ếch, jien piah pasiam veik lac yaok rituh  tỷ đồng. Kayua yau nan ye,  dom tỉnh ban hu panuac likau rajaei song dom mintri, dom gah di Trung ương caik hatai sangka, pasang iek samar drah piah  dong khik ramik drap ar rai duik bhap bini./.

Urang lang : Hanipha- 17/7 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân