Dam dara kuac raok jalan mbak 

  Jabat Rajaei brei thau lac Thủ tướng Nguyễn Xuân Phúc hu panuac ieu dom tỉnh hu danak dak jalan cao tốc Bắc Nam nao tapa, pambuak haong gah pagam tal samar ngak salah bruk peih taneh, jao brei taong abih taneh dalam 3 bilan puac thun 2020 piah peih bruk padang ngak dom canah jalan cao tốc Bắc Nam. Tal abih bilan 8, danak dak nan hu jao blaoh labaih 91% taneh piah ngak. Daok danak dak mblang kapal haoh pakat dunya Long Thành, Thủ tướng ieu UBND tỉnh Đồng Nai pataom tame langyah, taoh talaih dom kan kandah tavak tavaiy, jao taong abih taneh piah padang ngak mblang kapal haoh mbang ka 1 lac 1.810 ha dalam thun 2020; jao taneh daok veik lac 3.190 ha dalam quý II/2021.

Dah page ni (17/9), ribuk ka 5 (Noul) khang mengaok pakat 10, handaoh pakat 12. Ribuk daok nao samar jang saong tui kuhria vaik trun gah maraong. Dom tỉnh meng Quảng Bình tal Đà Nẵng tui kuhria meda panduan ba 1,1 triệu bhap bini dalau di tuk ribuk tuh tame. Tui pathau khan di Bộ đội biên phòng, tal maong 6 dah page ni daok 511 sruh ghilai taong ikan ngan saong 3.706 urang daok ngak bruk dalam labik mbuan njauk rabuk. Urak ni hu 102 sruh gilia dalam labik meng Quảng Bình tal Quảng Nam, taong abih jeng thau cambaih jalan nao di ribuk.

BHXH Việt Nam brei thau lac tal akaok bilan 9/2020, BHXH dom tỉnh ban hu ngak bruk tapak haong 5.091 labik pandar orang ngak piah thau bruk kan kandah di jit Covid-19. Dalam nan, hu jaik 1.800 labik brei padeih buh jien tame kadung jien hưu trí saong jien metai lahik; labaih 3.000 labik ngan saong 161.625 NLĐ brei padeih oh mbang jien bilan, brei padeih harak pambuak bruk saong 234 labik padeih bruk min jeng daok hu mbang jien bilan tui ginum biai haong gauk. BHXH dom tỉnh ban hu ngak bruk haong labaih 71.700 doanh nghiệp (DN) tavak  BHXH, BHYT saong mek veik hu 4.350 tỉ đồng. Abih di nyu nan lac, jabat BHXH hu payua hồ sơ 127 DN oh khin bayar, daok khin tavak 207 tỉ đồng BHXH, BHYT tapa gah công an piah pasang iek, ba tabiak langyah tui hukum.

Sở ilamo Thể thao saong rivang main Bình Thuận gam saong gah rivang main ban raya HCM, Tây Ninh, Bà Rịa - Vũng Tàu saong dom Công ty rivang main Vietravel bahrau mbaoh tangin tame harak pahadar njauk gauk dom jalan pachrieh ngak pasiam darak pasa gah rivang main hadei tuk tamuh viek jit Covid-19. Nan lac danak dak camriep di dalam negar hu ba ngak iek di 4 tỉnh, ban dalam bhum Đông Nam bộ hu angan lac “rivang main Salamat – Salamat piah nao rivang main”. Bruk mbaoh tangin peih danak dak nan hu peih tabiak di harei 26/9 anak tal di TPHCM.

Urak ini, urang ngak hamu tỉnh Tiền Giang daok ba tangin tame yuak padai Hè Thu 2020. Meng hu langik tasik siam lagaih saong meng ngak siam dom ilamu kỹ thuật pala drak nan ye mblang hamu padai Hè thu di Tiền Giang jeng hu  năng suất glaong. Rilo palei dalam huyện Cai Lậy, Cái Bè, Châu Thành hu jaik 6,5 tấn padai dalam 1 ha. Bruk njauk biai nan lac, yaom padai Hè thu thun ini jeng glaong jang dom thun dahlau. Hadei di tuk yuak blaoh, padai pasah pablei pak di mblang hamu hu yaom meng 6.000 đồng- 6.200 đồng/kg (tui janih). Bilan padai Hè thu thun 2020, tỉnh Tiền Giang tam drak labaih 50.000 ha, yaom lac jien buh tame ngak glaong min meng padai njauk saong pablei hu yaom nan ye mikva laba hu labaih 40%.

Gah Y tế dunya WHO hu panuac brei thau lac jit praong Covid-19 daok njom mbak samar drak di dom negar bhum Bắc bán cầu, dalam tuk daok dom bilan tra meng tal vaktu tamuh jit cúm mùa di bilan laar anak tal. Dom urang ruak dalam bilik taong ruak khang jeng daok tagok. Bruk ni brei mboh di dom negar di gah bắc bán cầu yau ye Tây Ban Nha, Pháp, Môn-tê-nê-grô, Ucraina saong dom bang di Mỹ. WHO hu panuac lac bruk ni meda khang jang dalam bilan 10 saong bilan 11 anak tal.

Italia brei thau lac vắc-xin pacang caga Covid-19 meda hu tabiak mbaok di puac bilan11 thun ini, pabak ka bhap bini. Di negarRajaei taneh ia hu brei adat peih veik dom bruk ngak iek vắc-xin Covid-19 di Công ty jru tavao Át-tra Dê-nê-ca di dunya kayua mboh hu siam mekere, salamat. Urak ini vắc-xin Covid-19 di neegar Anh daok dalam tuk ngak iek puac abih dahlau di tuk pok tagok dom jabat khik ramik  y tế pasang iek, brei adat.

Hãng tin AP harei 17/9 brei thau Mintri Quốc phòng, Mintri Y tế saong Dịch vụ Nhân sinh Mỹ brei thau bruk pabak vắc xin pacing caga Covid-19 oh mek jien ka taong abih rahra Mỹ. Tui jalan ba tabiak, bhap bini meda hu klauk 2 mbang vắc xin pacing caga Covid-19 atah di gauk meng 21-28 harei. Kayua gah pabak vắc xin pacang caga Covid-19 meda kurang dalam vaktu camriep, yau nan ye urang ngak gah y tế, dom urang ngak bruk thiết yếu saong dom urang mbuan njauk ruak meda hu brei klauk dahlau./.

Urang lang: Thu Thảo -Mousaphuong 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân