Yaom lac harei Roya Haji meng lac tết meng kan di urang Chăm tui agama Islam, min rilo thun tapa, Tết Nguyên đán hu jeng Tết ka 2 di mik va urang Chăm. Dalam dom harei ni, mikva jeng jar var ngak har, rimi ramik sang danaok, piah caga uan raok thun bahrau. Thiên Lý, urang vak di rayo sap ndom VN daok di ban raya HCM hu kadha vak : "Palei Chăm di Bình Dương bui sambai uan raok Tết Nguyên đán", daa mik va song tong abih gauk tui pang:

Urang Chăm dok caga pandap panda piah duh ka tuai 

Urang Chăm di palei  Hòa Lộc, xã Minh Hòa, huyện Dầu Tiếng, tỉnh Bình Dương hu labaih  120 boh sang song labaih  600 urang. Ieu lac palei Chăm kayua mikva daok pak ni lac urang Chăm tui agama Islam  meng Châu Đốc (An Giang) mai dok. Meng tari taring ngak mbang nan ye rai duik di mik va dak harei dak tagok. Mai rivang palei Chăm dalam dom harei jiak  Tết, bruk mbuan mboh di abih lac dom boh sang angaok jalan prong  song dom jalan sit dalam palei jeng hu rami ramik gheih meta. Rilo sang dok hu caga brah, nduik, boh menuk piah ngak har meng kan di mik va urang Chăm daok di Bình Dương yau : har tapei krah, har bum… piah payah tuai mai me-in. Saai Sam Roh, sa urang dok pak ni brei thau: Tết mai, urang  Chăm blei rilo khan aow bahrau piah nao main tết: tong abih urang dalam sang jak gauk puh ramik sang danaok  ngak har piah raok Tết, raok tuai mai main sambai yau urang Yuan”)

Harei Tết nguyên đán di urang  Chăm ndung bak ilamu karei di bangsa drei. Dom harei Tết, urang ngui cuk siam, ba gauk tal sang megris samen likau. Urang oh var pato anek taco, hadar veik sa thun tapa bruk hagait ngak hu, bruk gait oh ka ngak hu piah ka thun hadei kham merat jang. Ong  Salim, Hakim palei  Hòa Lộc, xã Minh Hòa, huyện Dầu Tiếng, tỉnh Bình Dương brei thau: urak ni langiu di bruk ngak kinh tế dalam palei, hu rilo anek kamuan  urang Chăm tabiak truh palei nao ngak  công nhân di dom  công ty di  Bình Dương, Bình Phước. Tết mai, kol nyu ba gauk mai palei, pataom gauk  raok thun bahrau song dom bruk ngak hu makna. Ong Sa Lim khan lac: Hadei di tuk samen bloh tui kuhum , dom urang nao rivang kubo. …  ”)

Duk song dahlau deih, rai duik urang Chăm di xã Minh Hòa hu rilo salih bahrau. Dom jalan prong tame palei Chăm hu tuh bê tông, dom boh sang praong, siam hu padang tagok tapen gauk, sang lei jeng hu radeih patuh, tivi, hu sang daok hu radeih  ô tô… Hu yau nan, lac meng hu karja pak ni hu dong ka urang Chăm mesraiy phun jien ngak mbang, pato pasram ilamu kỹ thuật, ba ia hacih, điện truac hadah tal yaok baoh sang bhap bini.

Ong Nguyễn Thanh Liêm, Phó Chủ tịch UBND xã Minh Hòa, huyện Dầu Tiếng brei thau, urang  Chăm biak tari tarieng song kham ngak mbang nan ye dalam palei hu rilo boh sang ginup meda,  sang kan kathaot daok 2 baoh min. Tết Nguyên đán anak sak takuh  2020, karja palei jak ba hu rilo pok pandap piah alin hadiah ka urang  Chăm, saong peih ngak rilo bruk ilamu , doh tamia, thể dục thể thao piah ka mikva bui sambai raok  Tết meng kan ndung bak ilamu bangsa :

Urak ni, urang  Chăm dalam  xã hu bruk ngak mbang tani tanat, meng nan urang urang kham merat hu mbaok tame rik dong haong  palei padang ngak palei pala bahrau. Bruk meyut meyau gauk di urang  Chăm saong urang Yuan biak samu gauk, oh hu bruk neh rabha, abih gauk jeng hu mbaok tame bruk  thể thao, ilamu, doh tamia ”)

Tết Nguyên đán oh lac tuk piah pataom gauk, bo dok lac Tết jum pataom dom, kak gauk di dom bangsa adei saai. Yaok urang jeng diukrai siam mekre, jum pataom, anit ranam gauk di angaok taneh ia Việt Nam uranam./.

Urang lang: Hanipha- 18/1 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân