Urang nong hu tacei pato ilamu pala ngak bahrau 

Mai tal xã Vĩnh Tân, lac 1 dalam dom labik samar hu brei angan lac palei pala bahrau di ban sit Vĩnh Châu, pak halei jeng mehit bruk daong ka mikva tabiak truh kathaot, tani tanat raidiuk, yam tagok cakrok kinh tế di karja palei. Ong Lý Hoàng Sơn, daok di ấp Trà Vôn A, xã Vĩnh Tân, dahlau daih lac sang kathaot, jien duah hu oh tani tanat meng bruk ngak mbang pah nan ye biak glaih glar. Meng hu karja palei daong brei sang halăm, yaom jaik 60 triệu đồng, daong ka sang ong hu jien mek tame yaok harei. Bruk pala njam hacih dalam sang halăm hu urang jakar ngak nong dalam palei daong ilamu kỹ thuật ba mai kein laba glaong. Raidiuk sang ong Sơn meng nan hu tani tanat saong yam tagok tabiak truh kan kathaot, anek bhik hu nao bac da-a:

"Tuk oh ka hu sang halăm, jien mbang cai di sang meng bruk ngak mbang pah di hulin. Meyah hu menuac pah ye drei nao ngak, oh hu ye daok di sang, raidiuk kurang anak kurang likuk.Urak ini hu sang halam ini dahlak hu jien tame yaok harei. Urak ini sang dahlak hu jien mbang cai, oh daok glaih glar yau dahlau daih".

Phaok akaok UB bhap bini xã Vĩnh Tân, ong Phan Thanh Nhã brei thau,  piah daong palagaih ka mikva Khmer sang kan kandah samar tabiak truh kan kathaot, tani tanat raidiuk, yam tagok cakrok, xã peih ngak siam sarak an sinh xã hội, lagaih haong hatai caong di bhap bini. Vĩnh Tân kham merat pambak praong dom bruk ngak mbang piah patrun kathaot khang kajap, lagaih piah paglaong prein ngak mbang ka sang kathaot, sang urang bangsa takik. Lingiu di nan, peih ngak hu kein lagaih danak dak pato bruk ngak kak kajap haong ba bruk ngak, duah bruk ngak brei. Ong Nhã daok brei thau lac:

"Dom cơ sở hạ tầng palei pala, điện, jalan, sang bac, bilai iek ruak, dom danak dak kein laba ka bhap bini hu sangka buh jien tame ngak dalam bhum hu rilo bhap bini bangsa takik. Mikva bangsa takik hu jalan lagiah piah pataom tame cakrok kinh tế sang, meng nan baoh sang kathaot dalam xã yaok thun jeng trun daok takik, jien mek tame kuhria tui akaok menuac yaok thun hu tagok".

Dalam 5 thun tapa, danak dak bruk ngak negar ka patrun kathaot khang kajap hu tỉnh Sóc Trăng peih ngak lagaih haong bruk patagok kinh tế, xã hội di tỉnh. Vaktu 2016-2020, jien buh tame ka danak dak lac jaik 479 tỷ đồng. Lingiu di bruk daong di Trung ương, dom puk palei dalam tỉnh jeng ieu pataom bruk rik daong meng dom menuac urang, kapul nyaom haong yaom jien labaih 41 tỷ đồng.

Dom bruk daong cakrok ngak mbang, pala drak, parilo jalan ngak mbang duah jien yau ye raong limo ia tasau, raong pabe, pala njam patam… hu pambak praong, hu daong ka bhap bini, abih di nyu lac bhap bini Khmer patagok jien mek tame, patruh eik patrun kathaot, hu jalan yam tagok ngak kaya meda, patagok khang kajap. Meng nan rik daong salih bahrau mbaok meta di palei pala, abih di nyu lac bhum atah bayah, rik daong tame bruk cakrok kinh tế-xã hội saong padang ngak palei pala bahrau. Ong Ngô Hùng, Phó akaok UB bhap bini tỉnh Sóc Trăng brei thau:

"Taphia danak dak patrun kathaot khang kajap, danak dak padang ngak palei pala bahrau jeng hu sangka jhul khang, daong ngak brei salih bahrau mbaok meta palei pala. Dom hạ tầng hu padang ngak siam, pabak siam ka bruk ngak mbang, ngak huak di bhap bini. Meng nan rik daong patagok kinh tế xã hội bhum palei pala, bhum bhap bini bangsa Khmer. Ini jeng lac prein daong piah peih ngak sarak patrun kathaot hu siam lagaih".

Meyah thun 2016, dalam tỉnh Sóc Trăng hu jaik 58 rabau sang kathaot, meblah jaik 18% dom sang di tỉnh, dalam nan hu jaik 27 rabau sang urang bangsa Khmer, ye tal puac thun 2019, dom sang kathaot daok 16 rabau sang min, meblah labaih 4,9%; dalam nan hu 7.600 sang urang bangsa Khmer. Raidiuk dak harei dak siam tagok, bruk bac da-a, akaok sahneng di bhum bangsa Khmer dak harei dak tagok mboh di anak meta, ilamu bangsa jeng hu bhap bini ba gauk tame khik ramik saong patagok./.

Urang lang: Mousaphuong 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân