Gru Chàm Ên, pato dua dua sap Việt –Cam, Sang bac Tiểu học Tân Trung B, xã Tân Hưng, huyện Tân Châu, tỉnh Tây Ninh dalam labaih 20 thun tapa, abih hatai ka bruk bac di anek kamuan bangsa Cam. Gru lac urang vak tabiak rilo tapuk meng sap Cam piah duh ka bruk pato saong bac di anek saih bangsa Cam hu siam jang. Langiu di bruk pato, gru Chàm Ên daok kham merat hu mbaok tame dom bruk di puk palei, jak ba mikva Cam diukrai siam ka dunya, mekre ka agama.

Chàm Ên ( dang labik 3 gah hanuk)

 

Hadei di tuk bac salah dom tal pato pasram pabak ilamu pato pakai di Sở Pato megru tỉnh Tây Ninh, thun 1991, gru Chàm Ên hu brei bruk mai pato di Sang bac Tiểu học Tân Trung B, xã Tân Hưng, huyện Tân Châu. Tuk nan, sang bac daok kurang rilo janih, anek saih ralo meng lac bangsa Cam sang kan kathaot nan ye piah khik hu tani tanat anek saih mai bac lac bruk biak kan. Meng hatung ranam bruk pato saong anit anek saih, cei gru kham yam tapa dom glaih glar, jak ba dom adei mai bac. Gam pato, gam kham duah jalan pato ka nyu lagaih piah ka dom anek saih Cam mbuan bac mbuan kanal. Gru roh duah saong cih vak kadha pato saong bac eng ka dom ilamu biak mbuan bac tui rilo janih mon bac yau toán, văn học, ngữ âm…tui sap Cam piah pato pakai. Meng nan, anek saih bac samar thau saong bac hu siam meng danak dak phổ thông tal danak dak sap Cam kayua gru pato. Bruk ngak nan di gru oh lac daong ka dom adei mbuan bac bo daok rik daong ka bhap bini Cam khik ramik saong patagok ilamu meng kan mai di bangsa. Anit ranam gru Chàm Ên, anek saih bangsa Cam takre nao bac jang, tari tarieng bac jang, nan ye dom anek saih klak bac dak harei dak takik. Nan njauk ndem tal prein yawa di gru Chàm Ên.

Dalam labaih 20 thun kak kajap haong bruk pato bac, ngan saong gru nan lac bruk kham merat oh padeih. Dom rairah anek saih hu gru Chàm Ên  pato, urak ini hu jeng menuac jeng urang, dalam nan hu dom cei gru, anai gru di bangsa Cam di bhum Đông Nam bộ. Gru tuk halei jeng caik hatai suh sah ka bruk bac da-a di anek kamuan bangsa takik di tỉnh Tây Ninh, dalam nan hu anek kamuan urang Cam: “Hu Đảng saong Karja daong kol anek bangsa tasik, dalam nan hu anek bangsa Cam hu bac da-a. Lin khin brei hu gru pato abih hatai pato tacei dom iamu siam gheih brei ka anek bangsa bac hu lagaih jang.”

Yaom lac thuvi thuvar haong bruk pato bac, min gru Chàm Ên tuk halei jeng kham ramik tukvak piah hu mbaok tame dom bruk ngak daong puk palei. Gru abih drei peih rilo bruk ngak pahala, jak ba urang kaya  dalam saong langiu tỉnh, daong ka bhap bini urang Cam kathaot dalam bilan Ramadan, tuk Roya… Langiu di nan, gru daok jak ba mikva Cam rik daong yaok pluh trieu jien piah ngak jalan palei, danak dak “ Truac hadah jalan palei”…

Lac sa Imâm, sa urang  dalam Mban quản trị Sang megik NOURUL ISLAM, puk  Tân Trung A, xã Tân Hưng, huyện Tân Châu, gru Chàm Ên hu tacei pato saong ja ba mikva Cam Islam ngak siam sarak di Đảng, hukum di Karja, diuk rai siam ka dunya, mekre ka agama, padang raidiuk ilamu. Ong Chàm Sá, Akok Mban Đại diện Cộng đồng Hồi giáo Islam tỉnh Tây Ninh ndem ka gru Chàm Ên yau ini: “Khol dahlak mboh biak hadah mbaok meta hu sa urang Cam yau Chàm Ên. Urang hu bac da-a, abih hatai daong mikva puk paga.”

 

 

Meng bruk kham merat di drei, rilo thun tapa, gru Chàm Ên taduan hu rilo harak meyaom di gah pato megru, di UB bhap bini tỉnh Tây Ninh ka dom rik daong ka bruk patao megru, dak padang pakhang kajap bruk jum pataom bangsa. Gru lac sa dalam 5 urang hu lambaok ka labaih 19.000 bhap bini dom bangsa takik di tỉnh Tây Ninh nao pataom mbaok dalam Nyaom roya dom bangsa takik Viet Nam mbang ka II hu peih tabiak di thun 2020./.

Urang lang: Aí Nghiêm -2/12

 

   

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân