Tuk ndom tal urang Cam Ninh Thuận, drei jeng sahneng chip tal dom urang kumei kak kajap haong palei ngak lan am Bàu Trúc dane angan, hu taong yaom lac janih lan am klak abih bhum Đông Nam Á.Daok ngan saong urang Cam An Giang, kak kajap haong nan, lac rup binguk dom urang kumei tapen kik menyim khan bai atau pứt khan Matơra.Da-a mikva saong taong abih gauk mai ravang Palei menyim khan bai di ban sit Tân Châu piah taom gaok dom urang kumei khik ramik ilamu bangsa tapa bruk menyim khan bai.

Meng umo 14 thun, anai kumei PhaTyMah (daok di ấp Châu Giang, xã Châu Phong, thị xã Tân Châu) hu amaik pato bruk pứt di bangsa drei. Luac 40 thun kak kajap haong bruk ngak, tapa rilo tuk trun tagok tui thun bilan, anai jeng daok kham merat pato veik ka dom anek, kamuan dalam sang, dalam palei piah ba gauk khik ramik bruk ngak siam mekre meng dom saman ini mai. Anai Phatymah brei thau: “Meda lac, urang kumei Cam halei tuk praong tagok jeng hu amuk, hu amaik patoa veik bruk pứt, menyim, ngak ahar. Tapa nan brei mboh bruk gheih tangin, tari taring di urang kumei.…” Urang kumei Cam lac siam binai, min dak mekre iek jang tuk ngui cuk khan ao meng kan di bangsa.

 

Oh daok pablei laik yau dahlau daih, min pandap pứt di urang kumei Cam daok di xã Châu Phong jeng daok hu rilo menuac dalam saong lingiu taneh ia duah blei. Nyu oh hu rilo janih, rilo sambo min urang takre kayua taong abih dom bingu la, meng sit tal praong jeng hu ngak meng tangin. Urang jaing yaok rak cih di blah khan, bloh pứt ka nyu samu gauk.

 

Me-om angaok akaok blah khan mas-pok sambo patih, hu pứt dom baoh bingu, tuk cuk khan ao di bangsa drei tame, mboh urang kumei Cam dak mekre jang, siam binai jang tuk nao mbang lakhah. Urak ini, khan mas-pok hu pablei rilo tapa negar lingiu, tui menuac ngak, meng 10-15 harei meng ngak salah. Ngak suai yau nan kayua pứt bingu abih rilo tukvak, abih di nyu nan lac pứt jih khan vir taom dar. “Urak ini rilo meng ngak tui đơn đặt hàng, nan ye dom bingu la angaok khan jeng hu ngak tui mẫu”.

 

Mboh hu biak rilo jalan pứt, min ngan saong urang jaing, maong tapa ye urang kanal chip. Dahlau daih, tok brei thau hatai takre blah khan yau habar, ye urang jaing ngak yau hatai khin brei ka drei hu sa blah khan biak mekre…- anai Phatymah khan lac yau nan. Jeng daok dalam xã Châu Phong, ấp Phũm Soài hu angan haong bruk menyim sarong, menyim kama, ngak kadung bak. Hu rilo janih pandap hu ngak meng khan bai, hu pablei dalam taneh ia saong pablei tabiak negar lingiu.

 

Ong Go Sa Ly,  Chánh Văn phòng Ban Đại diện Cộng đồng Hồi giáo Islam tỉnh An Giang brei thau: “Palei menyim pak ini hu daong khik ramik dom ilamu meng kan mai di bangsa, tuk dom bruk jeng hu ngak meng tangin. Taong abih dom pandap hu ngak meng plak tangin gheih di dom urang jaing”. Dahlau daih, dom khan bai di palei Phũm Soài jeng hu nhuộm meng katak kayau, kanduh kayau saong bah kayau.

 

Min piah pabak hatai takre di urang blei, dom nghệ nhân pak ini hu pandar phẩm màu piah ngak jeng rilo bingu la, rilo sambo. Dalam saman công nghiệp hiện đại, min dom pandap menyim meng tangin jeng daok pablei hu, nan lac meng tangin gheih di dom urang jaing abih hatung hatai ka bruk ngak. Meda lac, gheih mekre di pandap menyim di urang Cam lac dom bingu la, meng bingu yau riyak paoh, tal bingu 2 jalan jih khan … hu menyim meng dom urang kumei gheih tangin di abih. Tui panuac khan di anai PhaKyYah, urang jaing menyim lavik thun hu rilo ilamu, khan bai brei hu rilo janih, rilo sambo, hu patoa veik meng saman dahlau, atau hu urang jaing ngak bahrau ka nyu lagaih haong raidiuk bahrau. Piah hu sa blah khan siam, njauk tapa rilo công đoạn, meng ngak bingu la, ilamu nhuộm, tal tagok kik menyim… saong oh kurang hu bruk gheih tangin di urang kumei, urang jaing naih joi.

 

Dom urang kumei Cam ngak tabiak dom blah khan ao meng kan oh lac pabak ka bruk ngui cuk di adei sa-ai kumei saong tuai damuai, bo daok daong khik ramik ilamu bangsa drei, saong tapa nan daong ngak brei gheih mekre jang  bein ilamu bangsa Việt Nam./.

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân