Dom anek saih tame pakacah di mbang ni njauk pacang mbaok meta 

“Harei pataom padang mbang ngui pakat negar anek saih, sinh viên bac megru bruk ngak thun 2020” kayua Mentri Lao Thương binh saong Xã hội peih ngak meng melam kabroi tal abih harei ini di Pasak Ilamu Hòa Bình, Q10, Ban raya HCM. Harei pataom hu rilo bruk, lac: Parang iek dom gian hàng pandap di 40 sang bac Cao đẳng saong Trung cấp dalam negar; Chung kết bruk pakacah jalan sahaneng padang mbang ngui di anek saih, sinh viên bac megru bruk ngak thun 2020; Nyaom ginum biai“ Pambuak prtein khang daong ka anek saih,sinh viên bac megru bruk ngak padang bruk ngak mbang saman 4.0”.Tapa harei pataom, Mban peih bruk caong khin hu salih birau jalan sahaneng di xã hội ka bac bruk ngak, padang mbang ngui, pachreih dom dam dara jia tame palih ruah bac bruk ngak piah sumar pabak bruk khin hu urang ngak di taneh ia. Saong tapa nan ba mbuan lagaih piah ka dom doanh nghiep, dom po buh jien tame langyah tacei ba bruk cak rok patagok dom danak dak pato bruk ngak lagaih saong bruk caong khin di doanh nghiệp jeng yau darak pasar bruk ngak.

Mesup ni (24/11), di ban Quy Nhơn, Jabat lambaok gah merong kadung jien bac  Vừ A Dính pambuak bruk song Sở pato megru, Tỉnh Đoàn Bình Định jao pok jien bac brei ka anek saih bangsa takik. 110 pok jien bac, yaok pok yaom  1 triệu đồng, dalam nan hu 50 pok jien bac  Vừ A Dính alin brei anek saih bangsa takik, 60 pok jien bac di kalup kapul “Kayua  Hoàng Sa- Trường Sa anit ranam” brei ka anek di urang tong chap ikan hu rai duik kan kandah dalam  tỉnh Bình Định. Tapa labaih 20 thun kadung jien bac Vừ A Dính hu ba mai yaok ribau pok jien bac brei ka anek kamuan urang bangsa takik di grauk labik dalam negar  .

Huyện Lâm Hà (tỉnh Lâm Đồng) birau duah mboh bruk labaih 10 phun Bạch tùng praong yaok rituh thun njauk kaoh, tak, kagaik mek kayau saong ba tabiak truh labik glai tiểu khu 249, xã Đạ Đờn (Lâm Hà).Phun Bạch tùng lac janih kayau ka IV, min urak ini pablei hu yaom glaong, pandar ngak kapal ka cim yến ngak sruh, daok hu urang padang ngak sang yến duah blei.  Glai ini lac glai kayua Mban khik iek glai pacang caga Lâm Hà khik iek.Dom urang jakar chức năng huyện Lâm Hà daok pambuak bruk ngak brei cambaic laic.

Anak bruk kuhria mboh dahlau lac langik tasik oh lagaih dalam  bilan pandiak thun 2020 – 2021, mbuan si pandiak bhang song njom mbak trak, huyện Gò Công Tây (Tiền Giang) dok samar peih ngak dom jalan pacang caga bala meng langik tasik, khik jalan ia pruh, pabak ka bruk pala drak labaih  15.400 ha taneh pala; dalam nan hu 8.700 ha padai Đông Xuân, 560 ha tangei, 4.500 ha njam patam song 1.665 ha bein pala phun mbang boh.Hu thau, Gò Công Tây lac  huyện dang akaok ka bruk ngak nong, dok dalam bhum ia taba Gò Công gah timur tỉnh Tiền Giang.

Harei ini 24/11,Công an tỉnh Bình Phước brei thau,daok tangi sua, pataom mek panuac khan di Nguyễn Thành Vinh,Phạm Hồng Thái saong Chu Văn Tiên lac umo sumu gauk 18 thun, daok di xã Phước Long, tỉnh Bình Phước nan lac 3 urang taong Nguyễn Thời Duy anek saih bac tal 12, trường THPT Phước Long metai.  Tukvak 17 tuk harei 12/11, Vinh jak Tiên, Thái tame tal pabah jang sang bac duah taong Duy, kayua mboh pamoh…Tuk taom gaok gauk,Vinh yam tal Duy tangi panuac khin mesao blaoh taong tame mbaok Duy. Hồ Minh Lâm ayut di Duy paklaah ye Tiên saong Thái taong Duy gam Lâm. Tal melam, Duy having akaok, glaoh ta-ok saong hu menuac dalam sang di adei ba tame sang iek ruak. Di sang iek ruak, bac sĩ lac Duy metai glo akok ba tal metai. Mehit lac Duy metai, Vinh, Thái, Tiên nduac dauk, pah sang trọ dok di Ban raya HCM. Hadei di nan, 3 urang ini mai taduan dius.Urak ini, Công an Bình Phước daok ba tabiak kaoh tui hukum.

Harei 23/11, Đại hội đồng Liên hợp quốc (ĐHĐ LHQ) mbang ka 75 hu ginum biai song brei tapa meng bruk njauk hatai ka sarak  pambuak bruk  ASEAN-LHQ, song 110 negar njauk hatai dong brei, mek hu tanut glong di abih ka dom negar njauk hatai dong meng di tuk sarak  pambuak bruk  ASEAN-LHQ hu batabiak mbang camereip di ĐHĐ LHQ thun 2002. Meng bruk lac akaok ASEAN 2020 thun ni, Việt Nam lac negar lambaok ASEAN padang asar kadha  song ginum biai sarak.  Sarak mbang ni hu pabak dom bruk pambuak gauk siam mekre di LHQ song ASEAN meng thun 2018 mbiah tal ni yau jak jeng peih  bruk ASEAN-LHQ tuk vak  2016-2020, bruk  HĐBA mbang camereip peih ginum biai ka labik dang di  ASEAN dalam khik caga siam mekre song an ninh dunya dalam bilan Akaok HĐBA di  Việt Nam song bruk brei tapa  jalan peih ngak ASEAN-LHQ tuk vak  2021-2025. Dom kham merat di ASEAN dalam bruk dak padang ASEAN song pacang caga jit prong COVID-19 jeng hu ndom tal biak rilo.

Harei ini, Mentri Y tế Australia Greg Hunt brei thau, dom urang ilamu y tế naih joi di Australia biak njauk hatai saong bruk dut iek vaccin pacang caga Covid-19 di đại học Oxford saong công ty AstraZeneca. Mentri Y tế Australia Greg Hunt brei thau bruk ngak hu nan oh lac peih tabiak jalan ka Australia yam tame tukvak siam birau bo daok ba taneh ia ini gilac veik tukvak yau dahlau meng tuk hu jit ruak praong rah tabiak. Australia kakei blei 33 trieu 800 ribau mbang vaccin pacang Covid-19 di Oxford-AstraZeneca. Dalam nan hu 3 trieu 800 ribau mbang vaccin akaok meti  hu pabak ka dom urang njauk brei klauk jru dahlau di bilan 3 thun anak lac dom urang ngak bruk y tế saong urang taha umo.

Puac adit bloh,dom mblang kapan haoh di Mỹ taduan hu labaih  3 triệu tuai.Tapa nan brei mboh lac urang  Mỹ oh sangka tal panuac ieu plaih dom mbang nao dalam tuk  lễ Tạ Ơn.Dom hãng kapan haoh njauk khat lahik kayua jit Covid-19 dok cong khin bhap bini nao mai rilo jang dalam tuk  lễ Tạ ơn, song dom mbang padeih di bilan liar./.

Urang lang: Hanipha- Ái Nghiêm- 24/11 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân