Uranaih xã Xuân Hưng, Xuân Lộc uan raok Trung thu

 

  Di mblang bein sang Uranaih quận Bình Thạnh, Ban raya HCM hadah tanyak jang meng dom baoh gom saong ragu ragam daoh, dom bruk main chreih  chrai  ka dom adei sit, nan lac: Pakacah ngak gom, dak salao pandap ahar baoh kayau, iek tamia lân, pakacah ngak Cei Cuội, anai Hằng… Jeng di labik ini, 240 uranaih sit, dalam nan hu 40 adei bangsa Cam sang kan kandah hu quận Bình Thạnh alin pandap Trung thu, yaok paok yaom 200 ribau đồng. Muk Nguyễn Thị Hiếu, Phó aok Jabat LĐTB saong XH quận Bình Thạnh, Ban raya HCM khan brei thau, piah bruk iek daong ka uranaih sang kan kandah, dalam nan hu uranaih bangsa Cam hu jeng sa bruk bhian peih ngak, karja palei hu caik rilo prein yaya, jien padai ka bruk ini.“ Dalam quận ralo meng lac uranaih bangsa Kinh hu alin ahar, gom trung thu. Ta-eng uranaih bangsa Cam Islam, quận jeng hu caga ahar karei brei ka dom adei sit hu ba drei tame ma-in bui sambai.”

Sa labik karei tra jeng pataom biak rilo adei ranaih sit lac Surau Noorul Ehsan Phường 17, quận Phú Nhuận. Meyah yaok harei tok urang likei tame sambahyang ye dom harei ini hu labaih 100 uranaih mai uan raok Trung thu. Labaih 100 paok pandap jeng hu Hakim, na-ep, toul di Surau alin ka dom adei. Ong Karimlos, ngak bruk di Surau Noorul Ehsan phường 17, quận Phú Nhuận, ban raya Hồ Chí Minh brei thau: “ Thun halei jeng hu karja sang ka daong ka uranaih ma-in Trung thu, khol hulin mboh bui sambai”

Thun ini, Uỷ ban MT negar Quận 8, Ban raya HCM peih bruk alin pandap Trung thu saong 60 paok jien bac ka anek saih bangsa Cam yam tapa kan kandah bac da-a naih joi di quận. Yaok paok jien bac hu yaom meng 1 -3 trieu dong, tui pakat bac. Anak bruk sangka di karja, adei Ru-Ha-Ni bac tal 7A, Sang bac THCS Dương Bá Trạc, Quận 8 lac sang kan kathaot min bac da-a naih joi, adei mboh druat druai.

   Langiu di  bruk peih rilo mblang ma-in Trung thu bui sambai, dom tỉnh bhum palei karei daok biak caik hatai sangka tal raidiuk uranaih biak kan kandah, metui medhar dalam dom labik raong anek metui, sang uranam, bhum atah bayah meng dom mbang nao rivang saong alin pandap Trung thu, peih bruk daoh tamia bui sambai.

Huyện Xuân Lộc, tỉnh Đồng Nai urak ini daok hu labaih 600 uranaih sang kan kandah, metui medhar saong jaoh jo. Dom harei ni, Phòng Lao động -Thương binh saong Xã hội huyện Xuân Lộc padang kapol urang nao rivang saong alin labaih 600 paok pandap ka dom adei daok hu raong di dom labik bảo trợ saong uranaih kan kandah, bhum atah bayah, urang bangsa takik dalam huyện. Kuhria tui jien abih tih pandap alin lac 150 triệu đồng. Langiu di dom bruk nan, huyện Xuân Lộc jeng hu jak ba dom urang ngak pahla, dom doanh nghiep daong ka uranaih hu raidiuk kan kandah.

Hu taduan pandap trung thu, adei SaFi -Y, bangsa  Cam, anek saih tal 4, Sang bac Tiểu học Trần Hưng Đạo, xã Xuân Hưng, huyện Xuân Lộc, tỉnh Đồng Nai taduan hu pandap alin biak bui sambai lac.

Meng bruk sangka di karja, dom gah saong kapol nyaom di dom labik, dom palei di Ban raya HCM saong tỉnh Đồng Nai, dom adei uranaih dalam nan hu uranaih bangsa Cam taduan bilan Trung thu ndung bak anit ranam./.

Aí Nghiêm - 27/9/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân