Harei pataom papar sap pakat negar mbang ka 14- thun 2020 daok rah tabiak di ban sit Sa Đéc, tỉnh Đồng Tháp ngan saong rilo kadha bahrau. Di binah pakacah papar sap tapak, dom kapul hu ba mai rilo kadha biak gheih, hu padang ngak tani tanat. Bruk njauk biai nan lac dom kapul jeng ba ilamu công nghệ tame binah pakacah piah patagok talei pambuak bruk haong urang pang, urang maong iek. Tapa nan brei mboh lac dom Rayo papar sap – papar binguk dalam negar daok tui jalan ngak bahrau, biak lagaih haong bruk urak ini di báo chí jeng ye di gah papar sap piah duh, piah pamere ka bhap bini hu siam jang. Kadha vak di kapul urang vak di rayo sap ndom VN daok di bhum taneran kraong Cửu Long brei thau ka bruk ini:

Jalan tapuk pabak ka urang rivang main 

Pandar công nghệ tame binah pakacah papar sap tapak ngan saong kadha “Jalan ngak halei ka bruk loa plaik anek?”, Rayo papar sap – papat binguk Hải Phòng hu ngak ka mBan giám khảo gam urang maong iek caik hatai tuk kadha pakacah hu ngak tui jalan bahrau. Meng phóng sự tame tapak bruk biak, panuac klah rabha meng hatung hatai di dom urang bhian plaik anek hu pablak tame binah pakacah saong panuac kakei di dom urang ilamu di phim trường, taong abih jeng hu ngak katut panak saong dui pachreih. Lingiu di nan, taong abih binah pakacah hu papar sap tapak angaok Fanpage di rayo, daong ka urang pang hu tui pang saong pambuak bruk. Urang vak Trịnh Lam Ngọc, urang ba panuac tapak binah pakacah di Rayo papar sap – papar binguk Hải Phòng khan lac:

"Papar sap tapak lac janih đa phương tiện, brei mboh hu taong abih  kỹ thuật di papar sap bahrau, oh lac jalan papar sap meng kan, nan oh lac kol drei tok taom gaok sa urang menyai saong sa urang pang tra, bo nyu lac bruk pataom veik di rilo công nghệ, lac bruk daong brei siam di abih ka tukvak parang me-in kadha di drei"

Jeng yau dom ayut mai meng Hải Phòng, binah pakacah di kênh VOV Giao thông di TPHCM jeng pandar công nghệ bahrau piah dui pachreih saong chreih chrai jang. Ngan saong kadha “Sarak 120 di Rajaei ka patagok khang kajap bhum taneran kraong CL lagaih haong biến đổi khí hậu: jalan ngak hu blaoh, bruk daok veik nan lac ba tangin tame ngak”, kênh VOV Giao thông TPHCM pandar Fanpage piah papar sap tapak, jhul urang pang pambuak bruk tagok galong. Kadha ini ngak brei chreih hatai urang pang, daong ka binah pakacah hu chreih chrai jang duk haong kịch bản hu caga dahlau.

BTV Hà Thị Ngọc Hương, urang ba panuac binah pakacah ini brei thau: tok dalam 30 minit, Fanpage taduan hu rilo panuac tangi sua meng urang pang. Bruk livestream biak lac hu siam lagaih piah ba papar sap tapak tagok glaong jang:

"Urak ini angaok fanpage jeng taduan hu rilo panuac tangi sua, bruk sangka, meda lac ini sa dalam dom jalan ngak bahrau. Drei sahneng lac anak tal, papar sap njauk patagok rilo jang. Dreih yau bruk ba tabiak lac “Papar sap saong rilo janih”, ngak habar brei ka urang pang hu taom gaok saong thau hu rilo jang".

Tui sahneng mboh di gru pato pakat glaong Vũ Quang Hào, Viện pato pakai Báo chí truyền thông, Đại học quốc gia Hà Nội, Akaok tiểu ban Papar sap tapak, dom đơn vị jeng pandar công nghệ piah duh ka binah pakacah di drei. Dom Rayo jeng ngak siam binah papar sap tapak, pandar khoa học công nghệ piah ka binah pakacah hu siam lagaih jang:

  "Thun ini hu sa kadha biak bahrau lac dom Rayo tame pakacah jeng pandar công nghệ biak siam, lagaih haong bruk urak ini di báo chí jeng yau di papar sap. Meyah dahlau daih hội đồng chấm điểm pataom tame pambuak bruk tapa phone di urang pang ieu tame, ye thun ini kol dahlak sangka rilo tal fanpage di dom Rayo, dom kênh livestream. Jaik abih jeng ngak biak siam, daok dua klau rayo bahrau ngak min oh ka duah jalan ngak hu siam di abih"

Ong Trần Minh Hùng - Phó Tổng Yam ndok Rayo sap ndom VN, urang dang akaok mBan padang ngak Harei pataom papar sap pakat negar  mbang ka 14 brei thau: angan ieu di Harei papar sap dunya (13/2) thun ini kayua  UNESCO pilih ruah lac “Papar sap saong rilo janih”. Angan ieu di Harei pataom mbang ini jeng kak kajap haong kadha di harei papar sap dunya. Dalam saman meriak gauk khang yau urak ini, yaok jabat báo chí, yaok janih báo chí khin daok hu saong patagok ye brei salih bahrau:

"Ini lac harei roya bruk ngak piah ka dom urang ngak gah papar sap sahneng duah salih bahrau saong paglaong chất lượng danak dak. Salih bahrau meng asal kadha, jalan taom gaok bruk, jalan ngak danak dak tal công nghệ.Khin daok hu mbaok patagok, papar sap brei salih bahrau taong abih gah, meng fomat danak dak, jalan taom gaok bruk, salih bahrau gah công nghệ. Piah ngak habar tabiak hu kadha siam di abih tal urang pang".

Jeng tui ong Trần Minh Hùng, dalam saman cách mạng công nghiệp 4.0, dom janih thông tin bahrau dak harei dak rilo, kayua yau nan ye, dom urang ngak papar sap njauk pambak tame bruk patagok di khoa học công nghệ, mạng xã hội piah ba tabiak jalan saong pambak tabiak dom thông tin siam lagaih.Papar sap urak ini oh daok lac baoh radio bo lac rilo janih papar sap./.

Urang lang: Mousaphuong

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân