Yaok tapa dom janih njam hacih pablei angaok mạng, labik pablei pandap hacih sa-at, darak kaya nong, dom pandap panda di dom ayut uranaih oh ka ralo, min lac bruk njauk uan tabuan. Labik taom gaok bhian randap piah dom po ranaih umo yaih khan kaya ong nan lac dom mbang nyaom darak pasar kayua hiệp hội, kapol nyaom peih tabiak. Daok veik, ralo kaya nong hu ngan je hu ba tame tapak dom siêu thị, pasak pablei salih, cửa hàng tiện lợi…

Tui panuac khan di Sa-ai Hoàng Anh, urang pablei kaya nong hacih sang drei pala di Quận 7, Ban raya HCM, dom janih pandap yau ye njam patam baoh karaoh that hijao, bluh thu mai meng Lâm Đồng, Đắk Lắk, Đồng Tháp…pablei ka dom nyaom urang karei di gauk. Kayua dom labik ngak tabiak tok pabak ka bruk pabei sit sot, pambuak gauk ba tabiak darak pasar. Urang blei jeng lac dom urang ngak mbang tahanek  huak umo daok ranaih.

Sa-ai Hoàng Anh mboh lac: “ Suai lavik, dom urang ranaih umo nan meda padang mbang ngui tui jalan ngak nong công nghệ glaong. Min biak kan meriak gauk hu dalam tuk  rilo doanh nghiệp dalam saong langiu negar jeng buh jien tame ngak bein biak joi yau urak ini. Rilo po bein pah urang ilamu negar langiu tui iek, tacei pato ilamu kỹ thuật, bruk buh jien tame ngak tagok tal yaok pluh tỷ đồng yau di Lâm Đồng”

Yam ndoc sa kong ty pala njam patam dalam ia di Cao Lãnh (Đồng Tháp) brei thau, piah kaya nong hu labik pablei tani tanat di darak pasar, bhian lahik meng 4 tal 5 thun. Bruk pala njam hacih dalam ia di sa-ai jeng dreih yau nan. Meng phun jien buh tame ngak bein labaih 2 tỷ đồng, min bilan njam camereip khat kayua njam oh siam. Tuk pasiam veik hu, ba njam siam hacih pablei tabiak darak pasar, bruk meriak gauk meng peih tabiak. Yaom lac, pandap pabak hu dom tanut hacih sa-at, quy trình hacih pacang sir, mek hu tanut VietGAP min yaom pablei oh glaong jang hadom dut saong kaya nong bhian pablei di darak pasar.

Dom kaya nong njam patam baoh karaoh di urang Yam ndoc nan hu mbaok di siau thi Co.opMart, BigC min jien laba biak takik saong jalan ngak tabiak, pablei salih jeng daok rilo kan kandah. Dom urang pablei salih di dom darak praong yau Bình Điền, Hóc Môn, Thủ Đức jeng hu rilo mbang khan lac, hu dom mbang, njam hacih sa-at hu ba mai pablei di darak yaom chiat jang njam bhian harei dom ribau đồng sa ký. Bruk nan ngak brei dom urang padang mbang ngui daok ranaih umo khin kadun likuk.

Bruk “kaya nong pala njauk ye laih yaom, daok hu yaom ye oh hu kaya nong” jeng daok rah tabiak  rilo thun ini mai. Ini jeng lac bruk daok rah tabiak di gah ngak nong, bo urang ranaih umo padang mbang ngui njuak brei caik hatai, hu jalan caga dom kan kandah dahlau tuk tame ngak mbang. Dalam mbang ginum biai ka nong nghiep hacih birau ini, sa urang ilamu gah pablei salih kakei lac: Dom ayut umo ranaih caong khin padang mbang ngui meng bruk ngak nong hacih sa-at, ye brei pabak dom tanut chuan GlobalGAP piah pablei tabiak negar langiu, salih ka bruk tok pablei dalam negar ngan saong tanut chuan VietGAP. Tuk ngak hu jak jeng, kaya nong mek hu ngan pandap Viet Nam di dunya, tagok yaom kaya nong Việt, ba jien meng negar langiu mai ka negar drei saong ini jeng lac jalan ngak kaya meda khang kajap./.

Urang lang: Ái Nghiêm - 30/10/2020

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân