Tong abih bhap bini dong ka mik va di bhum kreih negar 

Dom harei ini, rah tui jalan roya 1A atau dom jalan tame bhum ia sua di 2 huyện Lệ Thủy, Quảng Ninh, tỉnh Quảng Bình, yaok ratuh kapul ngak pahla patui gauk ba yaok tấn pandap mai daong ka mikva bhum ia sua. Pandap daong rilo meng lac mì tôm, ia menyum, brah, ahar, kẹo, ia tasau, bánh chưng… Hu dom urang ngak pahla mai daong jien mbaok ka mikva njauk ia dauk piah mikva eng drei blei pandap caong hu.

Dahlau di nan, dalam dom harei ia sua oh ka trun abih, ca sĩ Thủy Tiên haong rilo kapul ngak pahla meng TP Hồ Chí Minh, Đà Nẵng, Phú Yên nao tapa jalan atah, pah radaih pajeng pandap daong tal mikva bhum ia sua di tỉnh Thừa Thiên Huế; ba tui hatai anit ranam tal mikva bhum ia sua di gah kreh negar. 

Di tỉnh Quảng Trị, meng hadei di tuk jalan nao hu, 10 sruh radaih pajeng pandap mbang menyaum nao tal tỉnh Quảng Bình. Dalam tuk nan, di dom xã labik taneh dhaong di dom huyện Hải Lăng, Triệu Phong, kapul daong daok nao tal rahra labik ia dauk lavik harei. Ong Ngô Ngọc Vũ, urang jakar di UBND xã Hải Định huyện Hải Lăng, tỉnh Quảng Trị luac dom adit blaoh glaih glar ba dom kapul daong nao tal bhum ia sua ba pandap tal tangin mikva hu payua panuac dhar phor meng bhum ia sua:

"Hu biak rilo menuac daong, biak rilo kapul ngak pahla hu mai brei pandap daong ka mikva bhum ia sua di palei kol dahlak piah samar yam tapa kan kandah yam tagok dalam raidiuk. Mikva dalam bhum ia sua hu daong samar drah".

Urak ini, di rilo labik hu rah tabiak bruk "pandap daong hu labik labaih, labik kurang”. Hu sang hu brei yaok pluh thùng mì min hu sang rilo harei oh hu hagait piah mbang. Ong Lê Thành Nam, daok di ban sit Ba Đồn, tỉnh Quảng Bình khan lac, mikva gaok bala biak uan tabuan, biak iek praong dom hatung hatai siam mekre, bruk daong di bhap bini dalam taneh ia. Min piah ka pandap daong nao njauk labik saong njauk menuac daok eik lipa ye brei hu bruk pambuak gauk di karja palei haong dom kapul nyaom, menuac urang ngak pahla:

"Karja palei meda thau lahik halei caong hu, dom urang ngak pahla njauk tapa karja piah hu daong palagaih nao brei pandap tapak tal tangin bhap bini. Karja palei jeng thau sang halei njauk daong hadom ka nyu lagaih"

Amuk Vương Thị Hiên, daok di xã Hải Định, huyện Hải Lăng, tỉnh Quảng Trị brei thau, dalam 10 harei, rahra pak ini njauk 4 mbang ia sua khang, drap ar njauk ia ba seik, padai brah jeng pasah abih. Amuk Hiên khan lac, amuk tapa hu kan kandah meng hu daong chip, min mikva daok di dom xã bhum taneh dhaong kan kandah jang jeng oh ka taduan hu pandap daong:

“Hu kapul urang mai brei tal tangin, min gah ala daih ngin, riyak rilo dom kapul oh nao tal hu, hu tuk nao tal hu min taduan hu pandap mbang diuk tapa harei. Hu dom menuac daok jaik ye taduan hu rilo, dahlak  daok atah nan ye hu tuk thau lac hu kapul mai daong ye tapa mek, daok meyah oh tapa hu ye dalam sang hu hagait mbang nan.”

Rilo kapul nyaom, menuac urang ngak pahla hu tapa karja palei, Mặt trận dom pakat piah ba pandap daong tal tangin mikva. Lingiu di nan, hu rilo kapul nyaom eng drei pah ghe nao tapak tal dom labik dauk ia. Bruk dom kapul oh thau jalan, eng drei nao tame dom bhum dauk ia, lac oh siam, biak mbuan gaok bala, mbuan ba tal metai lahik ka dom urang nao brei pandap. Meng blaoh, hu dom bruk tabaleik ghe di dom kapul ngak pahla tuk daok nao brei pandap, biak patuah lac hu urang jakar daong sraong hu. Amuk Nguyễn Thị Phương Thùy, kapul ngak pahla di huyện Đức Linh, tỉnh Bình Thuận daok ba pandap nao daong di tỉnh Quảng Trị khan lac, njauk duah thau mikva bhum ia sua caong hu hagait piah meng nan daong ka nyu njauk. Kayua yau nan ye, dom kapul daong pandap tuk mai tal palei njauk taom gaok karja pak nan piah hu bruk pambuak gauk khang kajap, plaih bruk lac janih mikva caong ye oh hu, daok pandap mikva oh ka khin ye ba mai brei biak rilo.

Sa-ai Nguyễn Ngọc Trọng daok di quận Gò Vấp, TP Hồ Chí Minh brei thau, kapul di sa-ai hu dom menuac thau caluai, tuk nao daong hu ba tui ghe phao piah mbuan nao tal dom labik daok pacang cakak, piah samar hu daong, oh caik ka mikva eik lipa. Sa-ai Nguyễn Ngọc Trọng brei thau, siam di abih lac nyim Mặt trận haong menuac dalam palei ba jalan piah ka bruk daong nao tal labik caong daong:

"Panuac khan angaok mạng srau kadau lo nan ye kol dahlak oh thau labik halei biak caong hu daong. Hu mikva dalam palei tacei brei kol dahlak thau piah nao tal dom labik daok caong daong di abih. Kayua gah langiu hu rilo kapul daong blaoh, min gah dalam jeng oh ka nao tal hu, oh hu ghe piah tame tal labik hu"

Amuk Phạm Thị Ngọc Hân, Chủ tịch UBMTTQ Việt Nam tỉnh Quảng Bình brei thau, tukvak tapa, tỉnh Quảng Bình taduan hu bruk pachreih ba, daong brei biak praong di dom mintri, dom gah di Trung ương; dom jabat, kapul nyaom, doanh nghiệp, dom urang ngak pahla. Tapa nan hu daong ka bhap bini Quảng Bình samar yam tapa kan kandah. Min urak ini hu mboh bruk biak njauk duh hatai lac hu labik hu taduan raok biak rilo kapul mai daong, hu labik oh hu kapul halei mai daong ka mikva. 2 huyện labik dhaong di tỉnh Quảng Bình lac Quảng Ninh haong Lệ Thủy kayua hajan ia sua praong, dauk lavik harei nan ye taduan hu bruk daong samar drah. Labik nan jeng lac labik nao tal di biak rilo kapul ngak pahla, daong brei. Dalam tuk nan, di dom labik karei, mbang hajan ia sua meng blaoh jeng khut, tayah biak khang min oh ka mboh binguk dom kapul mai daong ka mikva. Amuk Phạm Thị Ngọc Hân, Chủ tịch UBMTTQ Việt Nam tỉnh Quảng Bình hu panuac ieu dom kapul daong tuk mai tal Quảng Bình daong ka mikva bhum ia sua, njauk pambuak bruk haong mBan Thường trực Ủy ban MTTQ Việt Nam atau dom kapul nyaom dalam tỉnh piah samar ba pandap daong nao njauk labik, njauk menuac urang daok caong daong.

Hadei di ia sua, rilo sang seik abih pandap dalam sang, caong blei veik rilo janih, meng tapuk, siphau brei ka anek naih tal pandap piah ngak nong, phun pajaih, anek pajaih, ramik ngak veik sang danaok… lac dom janih daok caong hu di bhap bini bhum ia sua piah padang veik bruk ngak mbang, pala drak, tani tanat raidiuk, pasiam dom khut khat meng bala di langik tasik./.

Urang lang: Mousaphuong -31/10

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân