Kayua langik pandiak dui atah, rilo danao ia pruh ka phun pala di huyện Thuận Bắc (tỉnh Ninh Thuận) dok thu ia. Anak bruk kurang ia biak khang, huyện Thuận Bắc hu tacei pato dom xã pala drak ka nyu lagaih , salih janih phun pala. Meng nan, hu rilo janih phun pala salih ka phun padai brei kein laba glong. Kadha urang ngak hamu cong thau adit ni, daa mik va pang kadha vak ndom ka phun dưa hoàng kim pala angaok taneh thu lagu:

Urang nong pala angaok taneh padai mek hu kein laba 

Bilan Đông Xuân thun ni, dalam huyện Thuận Bắc (tỉnh Ninh Thuận) trun pajaih 953 ha phun pala dom janih, dalam nan hu 50 ha salih meng taneh padai kurang ia, taneh tambok glaong salih tapa phun pala angaok thu piah patak pataom ia. Di dom mblang taneh salih phun pala, rilo meng pala njam patam yau ratak naih, tangei, dưa hoàng kim… Dalam nan phun dưa hoàng kim hu pala rilo di palei Gò Đền, xã Bắc Phong ba mai kein laba kinh tế glong jang  dut song pala padai.

Ba khol dahlak hulin tabiak rivang mblang taneh pala  phun dưa hoàng kim, saai Trần Văn Phúc, palei Gò Đền brei thau: Dahlau deih, ngan song 1 ha taneh  ngak padai, kinh tế boh sang tok hu tani tanat. Tapa duah thau, bac megru, akaok thun 2015, saai ba tong abih mblang taneh padai tapa pala phun dưa hoàng kim. Meng iek glang tani tanat  song pandar njauk ilamu  kỹ thuật, nan ye năng suất hu meng  1 tấn meteh tal 2 tấn sa sào.

Saai daok brei kol dahlak thau lac: Hadei di tuk paik mek, taneh padai hu li-ua, buh cur, hadei di nan tagok ro, parang  bạt piah trun pajaih  dưa hoàng kim. Tuk phun hu  4-5 hala  ye cakak caduh. Meng di tuk drak asar  tal tuk paik mek mbang camereip lac 65 harei, yaok 3 harei paik sa mbang, jaik 10 mbang  meng abih baoh, kuhria abih tih tuk vak ngak sa vụ dưa jeng samu haong ngak padai. Sang saai hu  2 sào meteh dưa dok tabiak boh, mbang bloh paik hu  500 kg song yaom pablei  15.000 đồng sa kg hu laba glong jang yaok thun. Meyah kaoh abih phun jien, sang saai Phúc daok laba hu labaih 13 triệu đồng sa sào, glong jang 3 - 4 mbang dut song ngak padai. Urak ni, sang saai dok 3 sào pala hu 60 harei dok pah urang cakak caduk 

Di bhum ngak padai  Gò Đền, xã Bắc Phong, mik va pak ni meng rilo thun ni mai sami samar jang dalam bruk pacang caga pandiak bhang yau nan ye khang hatai buh jien tabiak, takik klaak taneh saoh piah pala njam patam takik harei, brei kein laba kinh tế glong. Abih di nyu nan lac tuk pala dưa hoàng kim patak patom hu  1/3 ia pruh dut song phun padai, kein laba glong nan ye hu rilo mik va pala. Langiu di nan, bruk salih taneh padai di dom labik taneh tambok glaong, kurang ia pala njam patam hu dong pasiam taneh, takik hareik tamuh, takik halak halin palai kaik di bilan pala hadei./.

urang lang: Hanipha -4/3 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân