Urang ruak dak harei biak trak kayua umo prong 

Page 7/8, di Hà Nội, Mentri Ngoại giao Việt Nam peih bruk taduan hala dok ASEAN dalam praong prang pahadar 53 thun harei padang Hiệp hội dom taneh ia Đông Nam Á (ASEAN) saog 25 thun harei Viet Nam lac taneh ia dalam dom taneh ia ASEAN. Phaok Thủ tướng, Akok Mentri Ngoại giao Phạm Bình Minh pan akaok bruk. Di var nan, Phaok Thủ tướng, Akok Mentri Ngoại giao Phạm Bình Minh ndem lac, labaih 50 thun tapa, ASEAN yam tagok atah. Sa ASEAN hu 10 taneh ia ba bhum Đông Nam Á meng neh rabha tal pambuak gauk, meng kamlah cagar gauk tal pambuak bruk, meng kathaot tal cak rok patagok samar. Yau nan min, Phó Thủ tướng, Akok mentri Ngoại giao Phạm Bình Minh lac, jit ruak Covid-19 saong dom salih birau dalam bhum jeng yau dunya saong  dom bruk ka an ninh oh njauk yau meng dahlau mai daok tamuh tagok ba tal rilo kan kandah trak saong oh bhian gaok ngan saong ASEAN. Bruk nan khin ASEAN brei gunum gauk saong brei ngak randap jang tuk halei abih saong khik hu bruk dang kreh praong dalam bhum.

Tui viek dom mbang par ba rahra meng negar langiu mai veik palei, dom jabat lambaok ngoại giao Việt Nam daok di Australia brei thau, langiu di mbang par harei ni, dalam bilan 8 meda hu viek 2 mbang par tra ba rahra Việt Nam meng Australia mai taneh ia. Rahra njauk eng drei buh jien tame blei harak kapal haok saong hu brei daok karei dalam 14 harei tuk tame negar tui njauk adat.

Lambaok urang ngak praong di Ban Đà Nẵng taduan hu labaih 22 tỷ đồng di dom gilang pariak daong ka ban ini piah pacang caga jit Covid-19. Dalam nan hu 4 gilang pariak hu daong ka ban mbang ini lac: Gilang pariak Ngak nong saong Patagok palei pala, Gilang pariak TMCP Đầu tư saong Phát triển Việt Nam (BIDV), Gilang pariak Công thương Việt Nam (VietinBank) saong Gilang pariak Quân đội Việt Nam (MB), yaok gilang rik daong ka Đà Nẵng 5 tỷ đồng. Langiu di nan, Gilang pariak Thương mại Cổ phần Đầu tư saong Patagok Việt Nam Dhar Đà Nẵng hu daong gah Y tế Đà Nẵng 1 tỷ đồng piah blei pandap panda y tế piah pacang jit Covid-19.

Harei ni, pasak y tế huyện Bàu Bàng, tỉnh Bình Dương brei thau, 6 urang negar Trung Quốc tame negar suan hukum di Bình Dương saong 1 urang Việt Nam peih radaih pajeng 6 urang ni dut iek mboh âm tính mbang1  SARS-Cov-2. Dalau di nan, urang lakei peih radaih, daok di Hà Tĩnh hu pajeng 6 urang Trung Quốc tame Bình Dương saong njauk Công an ban Dĩ An, tỉnh Bình Dương duah mboh. Hadei di nan, Sở Y tế tỉnh Bình Dương brei ba 7 urang ni nao tal pasak y tế huyện Bàu Bàng daok karei tui njauk adat. Hadei di vaktu daok karei, jabat jaka Bình Dương meda peih bruk langyah dom urang ni tui njauk adat di hukum.

Biar harei 6/8, Gilang pariak Karja brei thau dom Sarak trun dom tanut jien laba di Gilang pariak Karja meng 0,2 tal 0,5% sa thun saong hu ba tame pandar chip. Ini lac mbang ka 2 dalam thun 2020, Gilang pariak Karja brei ramik trun yaom 1349/QĐ-NHNN ye jien laba ngan saong jien payua piah caga tui jien Viet Nam lac 0,55 sa thun saong jien laba ngan saong phun jien payua tame tapa tanut khik caga menmg jien Viet Nam lac 0% sa thun, trun 0,5% dut saong jien laba dahlau di nan.

Sa Urang lakei par tui sa phao katut hu cap 5 urang ngak con tin di bier harei sup harei 6/8 (tui maong pak nan) di sa gilang pariak di pasak pambah lamnge Le Havre, gah barak negar Prang. Tui gah truyền thông France, urang cap mek con tin, 34 thun, hu ndok 2 bruk, lac: peih palao dom ranaih Palestine daok njauk cap khik oh njauk hukum di Israel saong bhap bini Palestine ala 40 tthun hu tame mblang bien sang magik Islam al-Aqsa di Jerusalem. Sa panuac karei brei thau urang mek con tin njauk ruak srau kadau trak glo akaok.

Kuhria tal akok bilan 8, Mỹ hu 1 triệu 190 ribau urang ngak payua harak likau daong lahik bruk ngak mbang camereip, lac takik abih kuhria meng tuk jit ruak Covid -19 rah tabiak. Mentri Lao động Mỹ brei thau, dom urang payua harak nan takik jang dut saong kuhria di dom urang ilamumeda hu tal 1,4 trieu urang payua harak likau daong lahik bruk ngak. Dahlau tuk jit ruak Covid-19 tamuh tabiak saong pambak tal bruk ngak kinh tế Mỹ di bilan 3, urang payua harak likau daong lahik bruk ngak dalam sa adit oh ka tuk halei yam tapa 700.000 mbang jeng yau dalam tuk bruk ngal mbang gaok kan kandah trak.

Mintri Thống nhất Hàn Quốc harei kabroi brei thau, kapul pachrieh bruk pambuak gauk di dua gah Triều Tiên hu peih bruk rik pataom 11,9 triệu uôn (won) ( samu 10 triệu đôla Mỹ) ka danak dak daong ranaih kaman saong urang kumei Triều Tiên di kapul pandap mbang dunya. Nan lac danak dak daong pahla ka Tiều Tiên camriep abih hadei di tuk Hàn Quốc hu akaok mintri Thống nhất barau di harei 27/7. Tui nan, Hàn Quốc meda mek meng kadung jien pambuak bruk di dua gah Triều Tiên payua tal dom kapul dunya piah ka dom kapul ni payua pandap daong tal Triều Tiên./.

Urang lang: Ái Nghiêm- Thu Thảo -7/8 - 16:44:44

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân