Rilo dam dara halan hatain dalam tuk jit ruak 

Tukvak tapa, tỉnh Bình Thuận tuk halei jeng thau bruk buh jien tame ngak cơ sở hạ tầng bhum urang bangsa takik lac sa dalam dom jalan ngak hu makna praong piah ka bhap bini bangsa takik pagrap tanat raidiuk, trun kathaot khang kajap. Kuhria dalam thun 2019, meng phun jien di Karja, tỉnh peih ngak dom bruk di Danak dak pakat negar patrun kathaot khang kajap ngan saong phun jien 18.315 trieu dong. Tui nan, tỉnh buh jien tame ngak cơ sở hạ tầng saong pasiam veik dom jalan mbak, ribaong kraong, brei buh jien tame ngak 38 danak dak jalan mbak, 8 danak ribaong binek, 1 balai y tế, 6 baoh sang ilamu, labik pataom mbaok pasram di bhap bini, 13 sang bac…Dom danak dak nan hu peih ngak di dom palei, xã biak kan kandah, bruk buh jien tame ngak camereip hu pabak ka bruk ngak mbang pala drak saong salih birau raidiuk bhap bini dom palei, xã biak kan kandah saong bhum urang bangsa takik dalam tỉnh.

Ninh Thuận urak ni hu labaih 60 urang ngak (rilo abih mai meng dom tỉnh, ban hu jit Covid-19) daok ngak bruk di dom doanh nghiệp dalam tỉnh. Piah khik kajap bruk lac jit ruak oh njom tame, oh pambak dalam tỉnh gam haong khik tani tanat bruk ngak mbang, pablei salih di dom doanh nghiệp, Ninh Thuận daok ngak catang bruk khik ramik dom urang ngak bruk langiu tỉnh. UB bhap bini tỉnh ieu kakei doanh nghiệp khik hu salamat bruk pacang caga jit meda cak rok patagok bruk ngak mbang. Dom doanh nghiệp maong bier, oh khik ramik hu dom urang ngak ni, oh khik kajap bruk pacang caga jit, tỉnh mada oh brei adat ngak bruk.

Công ty tapuk First News - Trí Việt pambuak saong dom doanh nghiep tư nhân pajeng ba 25 ribau blah pataih pacang pabah hacih anek ruak meng UV piah daong ka Đà Nẵng pacang jit. 25 ribau blah pataih pacang pabah hacih anek ruak meng UV mbang ini dalam Danak dak “Asar pajaih suan yawa - Alin brei 100.000 blah pataih hacih anek ruak meng UV” hu công ty tapuk First News- Trí Việt peih ngak meng kaok thun mbiah tal ini piah rik tame saong bhap bini pacang caga jit pambak praong di dunya.

Jaik di ni, bruk mabuk jru mek methanol (cồn công nghiệp) mbok tagok. Kuhria meng akaok bilan 7 tal urak ni, pasak ppacang jru mek, sang iek ruak Bạch Mai hu taduan saong taong ruak ka 7 urang, dalam nan hu 1 urang daok di Hà Nội metai, dom urang tapa trun kan kandah, min jeng daok dom di chứng yau haong klo akaok saong mata. Ong Nguyễn Trung Nguyên - Giám đốc pasak pacang jru mek, sang iek ruak Bạch Mai kakei lac: Dom janih alak lậu hu ngak meng hóa chất lac cồn công nghiệp methanol jeng daok pablei rilo di darak pasa, oh ka pasang iek tal labik ngak. Methanol manyum tame dalam rup meda hu salih jeng janih jru mek jang, njom mbak suai, hadei di 1 atau 2 harei dom biểu hiện di gah langiu meng mboh cambaih. Mayah nnyum rilo mbang yaom lac menyum takik min nyu kandon viek ngak kan kandah tal urang ruak.

Kayua ribuk ka 2, dom harei tapa di tỉnh Vĩnh Long hu rilo mbang hajan praong gam saong hangin khang ngak khut rilo baoh sang, padai saong njam patam di mikva pak labik ini. Tui yaok pataom oh ka ginup, hajan, hangin khang ngak kapeih tabung saong jaleih labaih 60 baoh sang bhap bini, dalam nan hu 9 baoh sang khut abih saong 4 danak dak karei duh ka bhap bini.

Anak bruk njom mbak sarau akdhau di jit praong Covid-19 tuk mbang njom mbak ka 2 daok rahtabiak di rilo negar, bruk kham marat ngak tabiak vắc-xin daok lac bruk njauk caik hatai di dalam dunya. Urak ni, di dunya hu labaih 100 janih văc-xin pacang caga Covid-19 hu roh duah saong cak rok patagok, dalam nan, taong abih jeng daok dalam vaktu ka 2 peih bruk dut iek di manuac. Bahrau di abih, Tổng thống Mỹ Đô-nan Trăm hu ndom lac bruk tabiak vắc-xin Covid-19 samar abih di dunya – lac di bilan 11 anak tal.

Jaik abih urang ngak meng negar langiu tame Singapore meda ngak bruk gilac veik  di puac bilan ini. Ini lac panuac khan di Akok kapul pacang jit Covid-19 Singapore Lawrence Wong harei 6/8. Ông Lo-ren Uông hu pachreih dom urang khik iek urang ngak samar ba tabiak dom jalan ngak brei salamat ka urang ngak dahlau di tuk gilac veik mai ngak bruk. Ong daok khan lac, Singapore daok brei dut iek darah ka 300 ribau urang ngak meng negar karei tame daok veik dalam dom labik KTX piah salah bruk pasang iek jit. Dom urang ngak hu brei gilac veik ngak bruk di puac bilan brei dut iek darah Covid-19 dua adit sa mbang piah caga trun bruk tamuh jit ruak gilac veik.

Tổng thống Mỹ Donald Trump hu ba tabiak sa sarak pakauk abih dom bruk ngak mbang haong  ByteDance– công ty Trung Quốc sở hữu ứng dụng parabha video Tiktok. Sarak nan hu pandar dalam 45 harei. Dalam sarak ong Đô-nan Trăm ndom cambaih, ứng dụng ni meda hu pandar ka danak dak ngak suan khau tin piah ba mai kein laba ka Trung Quốc. Mỹ meda pandar dom bruk catang abih piah pacang caga Tiktok, khik kajap an ninh taneh ia. Ứng dụng Tiktok, biak bhian randap dalam rai ranaih saong urak ni hu labaih 1 tỷ urang pandar di dalam dunya, brei ka urang ngak tabiak dom video katut meng 15 giây tal 1 minit./.

Urang lang: Thu Thảo -Ái Nghiêm -8/8 - 16:24:29

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân