Sa dalam dom ilamu karei abih meng kan mai di urang Cam lac adat tui darah gah amaik. Tui adat nan, dalam raidiuk bruk lakhah paga tok diuk tok pasang, baoh sang urang kumei likhah likei ka anek saong anek likei mai daok sang diuk. Piah lakhah hu pasang likei, sang gah kumei brei patal biak rilo pandap tui caong khin di gah likei. Daok urang Cam tui agama Islam di Nam Bộ ye karei veik, gah likei brei hu jien piah pabak caong khin di gah kumei. Harei ini, adat nan daok ngak tui ha-oh?Kadha vak: “ Urang Cam klak meneing adat cambat klak dalam lakhah caga” di Aí Nghiêm, urang vak di Rayo sap ndem Viet Nam daok di TPHCM:

 

Hadei di ndam lakhah dua urang anek kumei tui adat di urang Cam, sang ong Haji Abdul Salim daok di quận Phú Nhuận, Ban raya HCM hu biak rilo pandap: jien, ameh, baoh nyuk, siuk khan me-om, ao lakhah…Tui adat uang Cam Islam di Nam Bộ, sang gah likei khin lakhah kumei ngak diuk ka anek brei hu dom pandap pandar tui caong khin di sang gah kumei. Kayua sang ong ini kaya meda, hu angan je dalam puk Cam, anek kumei di ong naih joi bruk sang  bruk pablei salih nan  ye hu biak rilo pandap hu yaom glaong.

Amuk Fatimah daok di Q8, TPHCM hu 3 urang anek likei, raidiuk kan kandah kayua lakhah kumei ka anek bo muk ndua naong sre bayar labaih 3 thun meng abih.  Amuk Fatimah sahaneng lac: Lakhah ka anek brei hu hasit piah ka anek hu diuk, hadah mbaok metai, min adat daok trak njuak nao nyim mai…                                     

Mboh rilo baoh sang tavak sre kayua lakhah anek, ong Haji Mach Dres Samael, Phaok Mban ndai dien bhap bini Islam TPHCM kham jak ba mikva salih jalan sahaneng, gam haong sarak di Karja jak ba mikva klaak dom adat halei oh daok lagaih dalam ndam lakhah, ndam padhi, harei roya…

Muk Amina daok di Q6, TPHCM daok yaok jien mikva gauk gar mai daong lakhah anek kumei di drei. Meyah dahlau diah jien ini sang drei khik veik meneing min urak ini tui radiuk birau, muk ba tapa daong ka gah likei piah ngak lakhah ka dua anek. Sang muk Amina oh ndok pandap lakhah hagait, tok brei gah likei yar hasit ka nyu njauk adat lakhah min.

Oh daok huac bruk tavak sre hadei di tuk lakhah blaoh, haniem phol bak dalam sang di urang Cam tui jalan diukrai bharau./.

Urang lang: Aí Nghiêm  9/8/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân