Cập nhật ngày: 24/10/2020

Trực thăng di Mintri Quốc phòng mesup 23/10 hu nao tal xã Hướng Việt dok njauk pacang cakak

Mintri pato megru bahrau tabiak harak tacei pato bruk khik ramik chất lượng thun bac 2020-2021 ngan saong gah pato mầm non, phổ thông, thường xuyên. Tui nan, gah pato megru meda patagok bruk tacei pato salih bahrau jalan pato bac, salih bahrau bruk pasang iek, tong yaom gam gam di sang bac phổ thông tui jalan tong yaom phẩm chất song pren bac, khik brei samu gauk song rik dong patagok chất lượng, siam lagaih peih bruk pakacah tamat THPT. Mintri pato megru khan lac, mbang pakacah tamat THPT thun 2021 tui jalan khik tani tanat song yau thun 2020.

Tổng công ty jalan pasei Việt Nam bahrau brei thau jalan ieu phone taduan pandap daong piah palagaih ka bruk pajeng ba oh mek jien tal bhum krieh negar hu samar drah, siam lagaih, njauk manuac njauk bruk. Tui nan, dom jabat, kapul nyaom… hu caong pajeng pandap daong ye ieu tapak tal phone: 0906 143 887 atau 0903 393 856 piah pajeng pandap meng Hà Nội; daok pajeng meng Sài Gòn, ieu dom phone ka: 0977563665 atau 028.39140850. Pajeng dahlau abih dom pandap daong lac dom janih pandap mbang, manyum, ao phao...

Trực thăng di Mintri Quốc phòng mesup 23/10 hu nao tal xã Hướng Việt dok njauk pacang cakak, ba 2 urang jakar njauk rambuac trak tuk nao dong duah urang lahik. Sang iek ruak Trung ương Huế ba radeih cứu thương ba 2 urang nan nao iek ruak . 2 urang ni oh tabiak gah langui hu kayua jalan Hồ Chí Minh dhar gah pai tame xã njauk glut jaleih, urak ni oh ka nao mai hu . Tui mban tacei jalan Trung ương ka bruk pacang caga bala meng langik tasik tal harei 23/10, gah kreik negar abih hajan, ia sua di dom krong trun ala tanut báo động 1, taeng krong Kiến Giang (Quảng Bình) trun tanut báo động 2. Urak ni dok 24.500 boh sang duak dalam ia di Quảng Bình song Hà Tĩnh. Hajan ia sua, glut jaleih haluk ngak ka 117 urang metai , 21 urang lahik.

Dom harei tapa, dalam tỉnh Bình Thuận hu hajan khang di rilo labik, nan ye dom danak dak thủy lợi njauk tahuak ia. Abih di nyu nan lac, kayua hajan khang meng akaok halau ia tuh trun, dui tui rilo dhar, phun nduac tui kraong ia, ngak ka dom danak dak thủy lợi njauk gar ia nduac. Tui Công ty TNHH MTV Khai thác Công trình thủy lợi tỉnh, dom nerak tuh mai pataom di dom danak dak rilo meng lac kayau, njuh, hu gam dhar phun praong yau nan ye ngak kan kandah ka bruk pataom mek saong rami ramik danak dak. Tapa yaok pataom hu 15 danak dak ngan saong 30 labik njauk nerak pacang cakak, taong abih dom nerak nan meblah labaih 5.900 m3.

Sang iek ruak Từ Dũ – TPHCM bahrau peih pakak Pasak langyah, tacei jalan iek ruak meng atah (Telehealth) pambuak song 40 labik meng Nghệ An tal dom tỉnh ban gah merong. Meng jalan ngak ni, dom bác sỹ, urang ruak hu taom gaok sang iek ruak Từ Dũ meng atah biak lagaih, abih takik jien ndo; min hu khik kajap gah chuyên môn. Abih di nyu nan lac bruk salih ilamu kỹ thuật meng sang iek ruak Từ Dũ tal dom cơ sở y tế hu mbuan lagaih jang. Sang iek ruak Từ Dũ lac sang iek ruak ka 4 di TPHCM peih bruk iek ruak meng atah tui danak dak di mintri Y tế, dahlau di nan lac sang iek ruak Nhiệt đới, sang iek ruak Ung bướu song sang iek ruak Nhi đồng 1.

Dalam 24 mon tapa, Hàn Quốc hu 20 urang merai kayua jit cúm mùa. Tui panuac ieu di Hiệp hội Y tế Hàn Quốc, Rajaei negar ini njauk brei padeih bruk klauk jru pacang cúm di negar dalam 1 adit piah ngak brei cambaih laih makna ba tal metai saong pasang iek bruk salamat di vắc-xin. Tui pasak pasang iek saong pacang caga jit ruak Hàn Quốc, hu 32 urang metai mboh yau kayua klauk vắc-xin pacang caga cúm mùa. Jit cúm mùa bhian tamuh tabiak di Hàn Quốc dalam bilan 11 saong 12, ngak brei jaik 3.000 menuac metai yaok thun.

Sa viện dưỡng lão di California (Mỹ), labik hu 52 urang metai kayua Covid-19 njauk tong phạt 67.000 USD. Yaom lac yau nan, Pasak Fair Havens oh mek veik harak adat ngak bruk yau tui kuhria di tuk camereip. Ni lac sa dalam dom viện dưỡng lão hu urang metai rilo abih di tiểu bang Florida dalam jit prong Covid-19. Bruk metai meda glong jang meyah pasak ni oh padeih taduan urang bahrau tame di bilan 5. Pasak Fair Havens meda dang anak dom bruk tong phạt di rajaei liên bang.

Gah Y tế Thế giới (WHO) harei kabroi hu panuac ieu dom negar châu Phi peih praong bruk pandar dom dut iek samar piah jhul patagok bruk mesruh pacang jit praong Covid-19 di châu Phi, abih di nyu lac di dom ban saong labik hu rilo menuac daok. Yaok pataom di WHO mboh lac tok hu 12 negar châu Phi mek hu tanut kakei 10 dut iek ka yaok 10.000 menuac yaok adit dalam bilan./.

Urang lang: Thu Thảo – Hani Pha – 24/10

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân