Ngak ahar brak ndiuk piah daong ka bhap bini bhum kreh negar hu trei tian tapa dom harei hajan ia sua

Tuk thau lac ia sua dauk khang, sa kapul dom urang palei daok di bhum kreh negar urak ini daok di Đắk Nông ba gauk ngak 3.000 pa-op sara lange, sara plang, sara ritak lo piah payua tal ong bik dang akaok sa baoh baha ba nao brei ka mikva di palei drei hadei di rilo harei njauk ia sua pacang cakak. Min hadei di nan ong bhik brei thau, ia dauk biak glaong, mikva oh hu pui, jeng oh hu điện piah tahanek lisei, dalam kapul ginum haong gauk, njauk ngak ahar tày (yau tapei nung sit) – sa janih ahar di Quảng Trị meda khik hu suai payua nao daong ka mikva.

Piah samar ngak hu ye brei hu rilo menuac tame ngak, nan ye saai Lê Thị Thu Huyền (34 thun, daok di xã Nghĩa Thắng, huyện Đắk R’lấp) ba tagok mạng xã hội ieu daong pandap, daong prein ngak. Hadei di dom tuk tabiak panuac ieu, rilo urang ba mai sang saai Huyền dom paok brak ndiuk. Saai Huyền nao dalam hajan tal dom sang pala phun patei likau hala patei piah tapaok ahar.

Mehit lac ngak ahar payua ka mikva bhum kreh negar, urang ba gauk mai daong, samar ngak hu nguyên liệu. Mon 6 melam 18.10, rilo adei saai kumei dalam palei pataom gauk di sang saai Huyền piah tapaok ahar. Yaok urang ngak sa bruk, hadei di 2 mon lac hu gaok tapei nung camriep, ba tagok ghing tuk. Ngak yau nan tal tuk ngak blaoh lac kreh melam. Mon 6 dah page ye salah blaoh 8 gaok tapei nung ngan saong 60kg brak ndiuk, piah jala pandiak payua radiah tabiak Quảng Trị.

Bahrau salah blaoh mbang ni, dom saai mehit lac daok hu biak rilo bhap bini dalam bhum ia sua daok caong khin hu pandap mbang, nan ye saai ieu gauk tame daong ngak. Mbang ka dua, saai ngak 120kg brak ndiuk piah daong ka bhap bini bhum kreh negar hu trei tian tapa dom harei hajan ia sua.

Saai Huyền brei thau, sang saai tagok daok di Đắk Nông meng lavik mai nan ye saai oh daok thau rilo ka bhum palei di drei. Tuk mehit mangaok rayo haong báo brei thau lac bhum kreh negar daok njauk hajan ia sua, saai mboh pandik harao daok oh sahnang. Saai ndem lac: “yaok urang daong biak abih hatung hatian, hu urang ba brah ndiuk tapa sang hulin, hu urang payua jien, hu urang hu anek sit oh mai hu je ieu hulin nduac tapa mek. Nao dalam hajan hasit jeng oh njauk hagait, oh samu haong dom kan kandah bo mikva drei daok gaok”.

Muk Nguyễn Thị Thuận (70 thun, palei Quảng Trị) tui amaik ame tagok Đắk Nông meng thun 1960, tuk mehit saai Huyền jak ba ye nduac tapa daong chip. Muk Thuận brei thau: “pak ni hajan jeng praong lo, dom saai kumei tame gilai piah paik hala, duah talei piah ngak tapei nung payua nao, bo yau nan hulin taha ye min jeng daong hasit prien di drei”.

Klak palei dom piluh thun, raidiuk jeng daok kurang min ngan haong dom urang nan, bhum krieh negar jeng lac palei anit ranam di drei, lac tung prauc, ralow darah di drei. Thei hu prien daong prien, thei hu njuh daong njuk, hu hala daong hala, hu brah daong brak, thei hu gaok daong gaok… meng nan bo yaok ribau tapei nung ndung bak hatai anit ranam hu payua tal bhap bini bhum kreh negar./.

Urang lang: Thu Thảo – 26/10

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân