“Panuac ieu di UB Kháng chiến Nam Bộ”

4 harei hadei di tuk CT Hồ Chí Minh puac harak Tuyên ngôn Độc lập, harei 6/9/1945, Phái bộ Quân sự Anh hu mbaok di Bei Gon, tui takai lin Anh, thực dân Prang dauk dalam binguk lin Anh mai veik Bei Gon, peih bruk meblah mek taneh ia drei mbang ka 2.

Harei 23/9/1945, Xứ ủy saong UB Hành chính Nam Bộ brei pataom gauk chip piah ginum biai bruk ngak tui jalan kháng chiến di Trung ương Đảng. Nyaom biai hu tacei tabiak brei mboh dom hatai jhak saong bruk meblah mek taneh ia dei di kol thực dân Prang, bruk pachreih tui đế quốc Anh saong brei padang UB Kháng chiến Nam Bộ.

  “Panuac ieu di UB Kháng chiến Nam Bộ” tacei lac: “Meng tukvak ini, bruk praong dang akaok di kol drei lac pametai kol khamang Prang haong kol tangin takai di nyu” saong tabiak panuac lac: “Bruk kháng chiến hu peih tabiak!”, ieu bhap bini padeih ngak bruk, kreik pabah mbang darak pasar, oh pablei salih, oh ngak bruk brei kol Prang; tabiak bruk mesruh du kích grauk labik, pacang cakak kol khamng dalam ban raya, ngak brei patrun pein khang di kol nyu, ngak brei tayah bruk caong taong samar, jayah samar di kol nyu.

Pachreih tui panuac ieu di Xứ ủy haong UB Kháng chiến Nam Bộ, mesup harei 23/9/1945, tuk 1 đại đội lin Anh kuhria dui hala dok meriah bhong patuk kanyik katam trun piah tual hala dok tam tài tagok, kayua mbaok meta hala dok taneh ia, tok lac meng to thong, phao ndao sit sot, min dom urang lin cảm tử Tiểu đội khik caga Gheng dok Thủ Ngữ di drei khang hatai pacang cakak yaom lac metai tal urang puac di abih.

Bruk mesruh khik caga hala dok taneh ia, lac brei mboh ka bruk độc lập hu pachreih ba khang ka tapon nyom bol pan phao kraong di drei oh huac metai lahik peih rilo mbang taong khang.

Patui di nan, biar harei 23/9 abih Bei Gon padeih ngak bruk, oh ngak bruk brei kol Prang. Dom labik ngak bruk karja, dom xí nghiệp, hãng pablei salih jeng kreik pabah mbang, pasar oh pablei salih, radaih padeih peih, melam 23/9 urang ngak di Bei Gon - Chợ Lớn cakak abih điện, ia. Angaok dom jalan jeng hu padang dom paga pacang, labik piah mesruh

Taong abih dom janih pandap yau: bàn, ghế, papan ndih, tu, dom janih radaih saong dom pandap praong, khang jeng hu ba tabiak jalan padang tagok piah pacang jalan di kol khamang.

Abih bruk ngak mbang ngak huak dalam ban raya jeng padeih veik. Dom kapul xung phong công đoàn haong dom kapul tự vệ, dam dara halan hatian samar ba tabiak jalan mesruh. Yaok ratuh xí nghiệp haong labik ngak bruk karja, yaok pluh gilang pandap… njauk palai pajoa, oh caik brei laik tame tangin ko Prang.

Harei 26/9/1945, CT Hồ Chí Minh vak thư “Payua bhap bini Nam Bộ” ndom lac bruk mesruh taong pateok kol thực dân Prang lac bruk njauk, bhap bini dalam taneh ia jum pataom gauk, sa hatung hatian haong gauk ye bruk mesruh metak khik caga taneh ia tantu hu jayah.

Ala bruk pan akaok di Đảng, bhap bini Nam Bộ ba gauk dang tagok, tabiak mblang mesruh taong kol khamang meblah taneh ia, peih tabiak sa blah sajarah hadah hadai bahrau.

  Sap phao kháng chiến di Bei Gon - Chợ Lớn ngak tatuan medei taneh ia. Patui di nan, rilo tỉnh di Nam Bộ samar payua kapul urang đoàn, dam dara, tự vệ xung kích… mai daong prein ka bhap bini Bei Gon - Chợ Lớn taong kol thực dân Prang.

Meng mbaik gai kreim, to, thong haong dom janih phao ndao sit sot, bhap bini gah meraong negar ba gauk dang tagok mesruh taong pacang kol thực dân Prang meblah taneh ia, khik caga độc lập di taneh ia.

Bruk anit ranam taneh ia, hatai khang dang tagok mesruh metak oh huac metai lahik di bol bala haong rahra gah meraong negar biak njauk haong angan praong glaong hu pok brei lac “Daning pasei taneh ia”.

75 thun tapa bloh min bruk di harei Nam Bộ kháng chiến jeng daok pandiak tagok hào khí cách mạng, tuk halei jeng daok hadah tanyak dalam sajarah di taneh ia./.

Urang lang: M. Phương – 20/09

 

 


           

 

 

 

 

 

 

 

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân