Kapul urang kumei ngak lisei daong ka bhap bini dom xã njauk ia sua khang

Dalam harei 17-10, jalan tapa tỉnh Quảng Trị meda lac oh daok nao mai hu. Angaok jalan roya 1, ia nduac tapa dom labik di huyện Gio Linh, Ðông Hà, Triệu Phong, radaih trak meng 3 tấn meteh tagok meng nduac tapa hu. Jalan roya 9 tagok dom huyện bhum ceik Quảng Trị bahrau peih brei radaih nduac dom harei dahlau di nan, njauk haluk, patau tuh trun, ia sua ngak khut, oh nao mai hu di rilo labik.

Meng mon 2 melam 17-10, phường Ðông Lễ, Ðông Lương di ban sit Ðông Hà dauk dalam ia sua. Gah quân đội, công an pataom tame bruk ba menuac tagok labik salamat. Tram rup dalam hajan la-an, daong ka dom sang meng kreh melam tal mon 7 mesup, oh ka hu mbang huak, dom urang labik daong rahra di Tân Vĩnh, phường Ðông Lương mboh bui sambai tuk hu sa-ai Lê Thị Kim Tuyến (Pasak pato bruk ngak - Giáo dục thường xuyên ban sit Ðông Hà) haong kapul ngak pahla Tâm An ba bánh mì, bánh bao, ia tasau mai brei. Pluh harei ini mai, meng tuk ia sua tuh mai grauk dom puk palei Quảng Trị, sa-ai Lê Thị Kim Tuyến haong kapul ngak pahla Tâm An oh sahnenmg hagait tal hajan praong, ia sua khang, yaok harei ba 200 pok lisei haong klaok ia menyum mai brei ka bhap bini daok di dom xã njauk ia dauk dalam lac Hải Phong, Hải Vĩnh, Hải Ba, Hải Sơn di huyện Hải Lăng saong huyện Triệu Phong.

Akaok Ubbhap bini xã Hải Thượng (huyện Hải Lăng) Trần Kính brei thau, dalam pluh harei tapa, hu 3 mbang ia sua tagok glaong dauk abih pandap mbang menyum, pandap pandar, raidiuk bhap bini urak ini kan kandah lo. Piah khik salamat, gah điện lực brei cakak điện; ia hacih piah pandar oh hu, njuh tahanek lisei jeng tram dalam ia nan ye mikva caong hu daong dom pandap mbang hu chip. Sa kapul ngak pahla karei kayua anai gru Nguyễn Thị Bảy, Hiệu trưởng Sang bac tiểu học Nguyễn Trãi (ban sit Quảng Trị) hu ngak 500 pa-op lisei yaok harei, vah ghe nao brei ka urang ruak saong gauk gar di urang ruak daok di dom pasak iek ruak saong brei ka bhap bini bhum ia sua di ban sit Quảng Trị.

Di huyện Cam Lộ, akaok kapul urang kumei huyện Lê Thị Hường brei thau, dalam harei 17-10, Kapul pambuak bruk haong dom kapul karei, ngak 2.000 pa-op lisei daong ka bhap bini dom xã njauk ia sua khang. Dahlau di nan, Kapul hu panuac ieu kapul urang kumei dom xã, ban sit tahanek yaok ratuh pok lisei, xôi ba nao brei ka bhap bini. Oh meda ndom hu abih hatai menuac Quảng Trị daong brei ka gauk dalam dom harei tapa. Anek kamuan Quảng Trị daok atah palei, ayut sahabat dom tỉnh, ban, bhap bini dalam taneh ia ba tangin tame daong. Kapul ngak pahla “Sruh radaih brei adei” di dom urang ngak pahla mai meng ban raya HCM pambuak haong BĐBP Quảng Trị hu nao alin hadiah 100 pok pandap daong ka bhap bini thôn Đông, xã Hải Trường, huyện Hải Lăng, 800 pok pandap brei ka rahra xã A Ngo, huyện Đakrông, t.Quảng Trị gaok kan kandah trak kayua ia sua. Yaok pok pandap yaom 300 rabau.

Luac dalam dom harei hajan ia sua, Chủ tịch UBND tỉnh Quảng Trị Võ Văn Hưng hu mbaok di dom labik dauk trak tacei pato bruk pasiam dom khut khat; brei pandap mbang menyum ka bhap bini dom huyện Ða Krông, Cam Lộ piah daong ka rahra yam tapa kan kandah di anak meta.

Tui UBND tỉnh Quảng Trị, kuhria tal harei 20-10, tỉnh ini jeng daok hu 54.000 sang di dom huyện Hướng Hóa, Đakrông, Cam Lộ, Vĩnh Linh, Gio Linh, Triệu Phong, Hải Lăng, ban sit Đông Hà, ban sit Quảng Trị njauk ia dauk. Labaih 15.000 sang brei ba nao labik karei. Hajan ia sua, glut jaleih taneh ngak brei 57 urang metai saong lahik, dalam nan hu 22 urang jakar urang lin njauk haluk patau lam dalam mbang glut jaleih di Đoàn kinh tế - Quốc phòng 337 tuk kreh melam 18-10. Dom jalan mbak, dom kraong, ribaong ba ia ka mblang hamu saong drap ar, sang danaok di bhap bini khut, tayah.

Dom gah quân đội, biên phòng, công an saong dom kapul dalam palei daok ba menuac labik daok hu ia dauk dalam, nao tal labik glaong, oh caik ka urang halei kurang mbang. Urak ini, UBND tỉnh Quảng Trị daok pambuak bruk haong UBMT negar tỉnh ba pandap daong chip tal bhum ia sua./.

Urang lang: M. Phương – 25/10

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân