Bạc Liêu daok kham merat jeng pasak năng lượng hacih di taneh ia 

Dom harei ini, nao rah tui jalan ar tasik Bạc Liêu hu mboh bruk jar var padang ngak sang mac Điện hangin. Danak dak Điện hangin Kosy Bạc Liêu vaktu 1 hu prein khang 40 MW, hu ngak haong yaom jien buh tame labaih 1.500 tỷ đồng. Tuk ngak salah, sang mac Điện hangin ini meda pabak điện hangin jaik 115 triệu kWh sa thun, pagam tame jalan điện negar saong yaom jien mek tame jaik 270 tỷ đồng sa thun, rik tame kadung jien karja tỉnh yaok pluh tỷ đồng yaok thun, gam haong nan hu ba bruk ngak ka yaok ratuh urang ngak dalam palei.

Labaih 3 bilan tapa, kuhria meng harei padang ngak, Tập đoàn Kosy tuk halei jeng hu karja tỉnh Bạc Liêu haong huyện Hòa Bình saong dom xã Vĩnh Thịnh, Vĩnh Mỹ A daong palagaih dalam bruk ngak harak gar, jeng yau bruk peih taneh. Urak ini, mBan khik iek danak dak daok pataom prein tame piah samar ngak dom bruk di vaktu 1 piah ba sang mac tame ngak bruk di puac bilan 9 thun ini, njauk yau bruk ba tabiak. Ong Nguyễn Quý Phong – Yam ndok mBan khik ramik danak dak sang mac điện hangin Kosy Bạc Liêu brei thau: “Urak ini sang mac daok hu padang ngak luac harei melam. Nhà thầu brei padang ngak luac harei melam saong ngak hu blaoh 2km meteh dalam 5km 8 jalan radaih, ngak salah bruk kuac samu mbaok haluk di labik bilai biến áp saong labik sang khik iek, tacei pato di danak dak. Kol dahlak daok brei ngak gheng jameng. Bruk daok pamaong tal di danak dak lac harei 30/9 meda pambuak tame jalan điện negar ka taong abih bruk di vaktu 1 lac 9 trụ turbin

Vaktu 2020-2025, lingiu di bruk pataom tame patagok gah ngak nong, huyện Hòa Bình, tỉnh Bạc Liêu daok brei patagok bruk ngak kong, abih di nyu lac ngak kong hacih, năng lượng. Ong Trần Văn Út - Bí thư Huyện ủy Hòa Bình brei thau: Danak dak sang mac Điện ngin Kosy Bạc Liêu lac 1 dalam 5 danak dak Điện hangin daok hu padang ngak dalam huyện. Dom danak dak ini hu yaom abih tih labaih 12 rabau tỷ đồng saong prein khang abih tit jaik 270MW. Tukvak tapa, huyện hu daong ka UBND tỉnh jeng yau pambuak bruk haong po ngak, haong gah tư vấn peih ngak ginup bruk di drei piah daong palagaih di abih ka dom sang mac hu samar ngak ka nyu salah. “Tuk dom sang mac điện hangin hu padang ngak ye hu rik daong biak praong ka bruk patagok di huyện. Pagap yau phun jien buh tame di huyện meda tagok glaong, tuk nan jien mek tame kuhria tui akaok menuac meda tagok jang, saong hu ba bruk ngak biak rilo ka urang ngak. Bruk njauk biai nan lac hu daong salih bruk ngak, meng ngak nong tapa ngak kong piah kham merat ba Hòa Bình dalam vaktu  2020-2025 hu jeng ban sit tui sarak di Tỉnh ủy”.”

Dom thun dahlau, hadei di tuk abih hatai jai pasang iek bruk alam môi trường duh ka patagok khang kajap, Bạc Liêu likau ba danak dak sang mac nhiệt điện Cái Cùng 3.600MW tabiak truh quy hoạch điện VII. Bruk ini hu Thủ tướng Rajaei pachreih tui saong pok meyaom. Khang hatai klaak danak dak ini kayua dom urang pan akaok tỉnh Bạc Liêu mboh lac, sang mac nhiệt điện dhang meda ngak brei nerak tachauk oh sit ka alam môi trường, kan kandah tal bruk patagok raong pala kaya ikan di tỉnh.

  Piah pabak ka năng lượng lahik nan, kayua oh padang ngak sang mac nhiệt điện dhang, dom thun tapa, Bạc Liêu sangka buh jien tame ngak piah patagok, peih praong năng lượng hacih, năng lượng ngak veik. Ini lac sa jalan ngak njauk, lagaih haong bruk di anak meta, hu bhap bini dalam tỉnh njauk hatai, uan tabuan, abih di nyu lac urang raong hadang, menuac ngak sara. Ong Võ Hồng Ngoãn – urang raong hadang di palei Biển Đông A, xã Vĩnh Trạch Đông ban sit Bạc Liêu, khan lac: “Klaak nhiệt điện kayua nyu pandar dhang jhak ka langik tasik. Daok urak ini pandar điện hangin dahlak mboh biak lagaih, biak siam, oh nerak tachauk hagait. Urang raong hadang jeng hu mbuan lagaih, oh daok huac hagait. Tui dahlak mboh, nan lac bruk biak hadah hadai di urang pan akaok tỉnh drei”.

Tapa 10 thun khang hatai ngak saong kham merat angaok jalan patagok năng lượng hacih, tal urak ini Bạc Liêu hu 10 Danak dak Điện hangin hu padang ngak rah tui jalan takai tasik meng ban sit Bạc Liêu tal huyện Đông Hải saong prein khang abih tih labaih 660 MW. Urak ini sang mac Điện hangin Bạc Liêu hu prein khang 99,2MW hu ngak salah blaoh saong daok ba tame pandar, hu ba tagok jalan điện tal urak ini hu labaih 1,1 tỷ KWh. Daok 9 danak dak Điện hangin daok veik saong prein khang abih tih  562MW, hu yaom phun jien buh tame ngak jaik 1 tỷ USD daok jaik hu peih tabiak ngak.

Bruk patagok dom danak dak Điện hangin ini biak lagaih haong bruk di anak meta saong jalan patagok di Bạc Liêu, rik daong patagok prein khang di tỉnh, abih di nyu lac lagaih haong tacei pato di Thủ tướng Rajaei lac “Bạc Liêu tagok tui jalan hijao”, iek praong bruk khik caga alam môi trường saong patagok khang kajap.

Amuk Cao Xuân Thu Vân – Phaok akaok UBND tỉnh Bạc Liêu lac: Gam haong bruk daong ngak hu bruk di Quy hoạch điện VII (pasiam veik), dom sang mac Điện ngin angaok jalan tapen tasik Bạc Liêu - Cà Mau hadei di tuk ngak blaoh, ba tame pandar, meda daong khang ka bruk patagok gah du lịch di tỉnh Bạc Liêu. “Caong khin di kol dahlak urak ini lac pambuak pagam jeng labik ravang me-in kayua ngak hu năng lượng hacih ye kol drei kak hu je, min raidiuk di yaok rahra labik nan meyah kol drei padang hu bruk ngak mbang, pambuak haong patagok du lịch ye tuk nan raidiuk bhap bni hu yam tal khang kajap jang”.

Bạc Liêu daok kham merat jeng pasak năng lượng hacih di taneh ia saong bruk caong khin nan daok jaik hu jeng biak./.

Mousa Phương lang sap - 21/01

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân