Bruk pablei salih melam di ban Phan Thiết

  Ka oh mboh tuk halei dalam tukvak katut panak di Bình Thuận hu rilo bruk ngak ilamo, daoh tamia, thể thao hu peih tabiak ngak patui gauk yau 2 bialan puac thun ni. Tui panuac meng Sở Ilamu, Thể thao saong Du lịch tỉnh Bình Thuận brei mboh, kuhria taeng dom bruk thể thao hu tal 8 bruk praong yau Giải Stop and Run Half Marathon Bình Thuận; Giải Mũi Né Dunes Marathon; Giải vô địch Futsal Bình Thuận... Daok dom bruk daoh tamia jeng daok hu peih tabiak, dalam nan hu melam ragu ragam hip hop, melam ragu ragam acoustic, melam ragu ragam flamenco, danak dak daoh tamia uan raok thun bahrau 2021...Taong abih jeng brei mboh bruk kham marat pambuak gauk di dom công ty ngak mbang gah rivang main saong karja dalam peih ngak dom kadha, dom bruk praong nan piah dui pachrieh tuai mai tal tỉnh rilo yau habar, hadei di dom kan kandah di jit Covid-19. Meng hu yau nan, dom tuai rivang main daok tagok jang dut saong 10 bilan dahlau, tui nan jien mek tame meng bruk rivang main jeng daok hu siam tagok.

Bruk ni ngak ka urang halei sangka tal bruk rivang main jeng bui sambai sahneng tal tukvak Bình Thuận meda dui pachrieh hu tuai biak rilo, rilo tuai di dunya thau tal rilo jang dahlau dieh, abih di nyu nan lac bruk akaok thun 2021, Bình Thuận dang tabiak peih Seagames môn quần vợt. Nan jeng lac tuk bruk padang ngak kinh tế melam di dom bhum rivang main praong dalam tỉnh hu ndom tal veik. Kayua dahlau dieh, hu tukvak tabung glaong dui pachreih hu rilo tuai rivang main, bhum Hàm Tiến – Mũi Né hu caga padang sa jalan ngak kinh tế tuk melam, njaom tame pasak ban Phan Thiết, tuk mboh tuai rivang main caong hu nao main melam di mbang padeih bilan laar dui atah tapa tết âm lịch. Meng nan, Hàm Tiến – Mũi Né tamuh tabiak dom labik pablei salih biak karei, yau di takai ar hu pablei dom pandap mbang di pak ni hu ngak meng kaya ikan, jalan Nguyễn Đình Chiểu pablei ginup abih dom pandap panda pabak hatai caong blei di tuai rivang main, jalan Tuyên Quang dalam ban lac sa labik mbang menyum biak bui sambai. Mboh lac bui sambao lo, chreih chrai lo nan ye karja ban Phan Thiết hu caik sa labik taneh karei, jaik jalan Võ Văn Kiệt piah ngak labik darak pasa pablei di melam. Min, kayua rilo makna, darak pasa pablei melam njauk yah klaak. Yaom lac yau nan, di Phan Thiết, bruk pablei di melam jeng daok hu peih tal maong 1 melam atau dui atah tal dah page harei hadei, mboh cambaih abih lac dom quan mbang, quan manyum 

Kayua habar bo madeih melam piah pablei pandap, pablei hu hadom? Meda lac urang halei jeng thau pablei melam yaom lac hu rilo tal halei jeng oh pabak hu prein yava, tuk lahik ndih… Min tuk langyah tame dalam, meda mboh pablei salih melam hu makna praong, oh njauk klaak tapa, abih di nyu nan lac dalam tuk daok cak rok patagok gah rivang main yau urak ni, ba mai kein laba oh sit ka kinh tế ka tỉnh, ka taneh ia.

Di bilan 7 thun ni, Thủ tướng rajaei hu brei tapa danak dak cak rok patagok bruk pablei salih melam di Viet Nam. Sa dalam dom jalan ngak praong piah patagok bruk ngak mbang pablei salih melam lac brei adat ngak iek dui atah tuk vak peih dom bruk pablei salih di melam tal maong 6 dah page harei hadei di dom ban praong, labik rivang main, labik hu rilo tuai nao main yau ye Hà Nội, TP.Hồ Chí Minh, Đà Lạt... Jalan daok pamaong ngak di danak dak lac meng dom kein lagaih piah patagok bruk pablei di melam piah cakrok kinh tế bahrau, paglaong jien mek tame saong paglaong raidiuk di bhap bini, patrun dom kadha oh siam ka bruk khik kajap an ninh chính trị, siam mekre puk palei. Tui nan, meda ba tabiak rilo jalan caga langyah, dalam nan hu dom sarak pachreih ba, daong ka dom doanh nghiệp, sang pablei salih hu mbaok tame bruk pablei salih di melam…Tapa nan taong yaom kein laba dom bruk ngak saong bruk khik ramik pablei salih melam di dom labik hu pilih ruah, meda padang tabiak, ngak pasiam dom bruk pablei salih melam saong meda peih praong tabiak dom palei karei.

Tui panuac ieu di Thủ tướng rajaei meng danak dak nan, Sở Kế hoạch saong Đầu tư tỉnh Bình Thuận hu ba tabiak jalan cak rok patagok kinh tế melam, daok mek panuac di dom sở, dom gah saong puk palei pambuak tal dahlau di tuk pok tagok UBND tỉnh. Bruk ngak puac abih njauk tui danak dak ba tabiak lac padang bruk cak rok patagok pablei salih melam lagaih haong bruk di puk palei, abih di nyu nan lac lagaih haong prein padang ngak dom labik hạ tầng daong pabak, jien padai prein yava buh tame ngak saong prein jak ba, dui pachreih urang buh jien tame ngak di yaok labik cambaih laih./.

Urang lang: Thu Thảo – 02/12

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân