Meng akaok bilan thu tal urak ni, bhap bini daok dalam bhum njauk ia mbak njom tame di tỉnh Vĩnh Long tuk halei jeng gaok kan kandah kayua kurang ia taba piah pandar. Anak dom kan kandah ni, rilo kapul nyaom, menuac urang dalam saong langiu tỉnh hu ba gauk tame daong rahra meng rilo jlan ngak piah klah rabha dom kan kandah di bhap bini dalam tỉnh.

Bhap bini di 2 huyện Long Hồ mboh bui sambai tuk taduan hu ia taba piah pandar

Dalam dom harei langik pandiak jaik di ni, bhap bini di 2 xã cù lao Bình Hòa Phước saong Đồng Phú di huyện Long Hồ, tỉnh Vĩnh Long mboh bui sambai tuk taduan hu ia taba piah pandar kayua jabat cảnh sát pacang khuah padam khuah saong daong duah urang njauk bala, Công an tỉnh Vĩnh Long ba mai brei saoh ka bhap bini. Ini lac 2 xã pulao daok di kreh kraong Tiền saong kraong Cổ Chiên bhian njauk ia mbak njom tame tuk bilan thu mai, dom sang mac pabak ia taba piah pandar di palei padieh ngak kayua độ mbak tagok glaong. Piah hu ia taba piah pandar, bhap bini puk palei njauk nao biak atah piah blei ia pandar haong yaom biak glaong. Piah daong ka bhap bini trun meneing kan kandah saong hu bruk njauk hatai brei ngak di mBan Yam Ndoc công an tỉnh, jabat cảnh sát pacang khuah padam khuah saong daong duah urang njauk pala pandar radaih di drei piah pajeng ia taba mai brei saoh ka bhap bini. Mikva biak bui sambai tuk taduan hu dom ia taba ni. Saai  Nguyễn Văn Thuận, daok di xã Bình Hòa Phước, huyện Long Hồ lac urang taduan hu ia taba bahrau ini, brei thau:Meng hu dom saai công an jabat pacang khuah padam khuah ba ia mai piah pandar, dom harei dahlau daih njauk blei ia bình abih rilo jien min ia oh siam kayua bhum ni ia njom mbak biak rilo”.

Tui yaok pataom di Sở ngak nong saong patagok palei pala dalam bilan thu ni, ia mbak njom tame ngak ka 35 bilai pabak ia di tỉnh Vĩnh Long njauk njom mbak, jaik abih dom bilai pabak ia dalam bhum ini jeng padieh ngak. Labaih 72 ribau baoh sang daok dalam bhum ia njom mbak daok rilo abih di dom huyện Vũng Liêm, Mang Thít, Trà Ôn, Tam Bình saong ban sit Bình Minh gaok kan kandah. Dalam nan hu labaih 17 ribau baoh sang kurang ia taba piah pandar.

Piah klah rabha meneing dom kan kandah nan di bhap bini, rilo kapul nyaom, menuac urang dalam saong langiu tỉnh Vĩnh Long hu daong pandap panda caik ia, jamriak halang ia ka dom baoh sang, abih di nyu nan lac dom sang kan kathaot, dom sang kan kandah. Dom pandap caik ia taba hu jao alin tal angina di mikva, hu daong ka mikva  yam tapa kan kandah di mbang ia njom mbak biak catang di thun ni.

Ủy ban mặt trận negar tỉnh Vĩnh Long jeng hu peih bruk jak ba kadung jien pacang caga jit Covid 19 saong kadung jien pacang caga pandiak bhang, njom mbak piah daong ka bhap bini dalam labik gaok kan kandah kayua ia njom mbak hu trun meneing dom kan kandah. Hadei di vaktu peih tabiak, Ủy ban mặt trận tỉnh taduan hu jien daong saong pandap panda labaih 5 tỷ đồng. Paok jien daong ini hu Ủy ban mặt trận blei thung caik ia taba, jamriak halang ia piah samar brei ka bhap bini. Dom urang ngak pahla di Vĩnh Long oh njauk lac dom doanh nghiệp, dom labik palei salih bo daok hu dom baha, nhà thờ dalam tỉnh jeng hu mbaok tame piah daong ka dom urang kan kathaot dalam bhum njauk ia njom mbak hu ia taba piah pandar. Hòa thượng Thích Long Vân, Chánh văn phòng Ban trị sự Giáo hội phật giáo tỉnh Vĩnh Long brei thau, dalam tỉnh Vĩnh Long hu biak rilo baha hu danak dak pabak ia taba piah pandar ka bhap bini: “Phật giáo tỉnh Vĩnh Long biak pachreih tui panuac ieu piah jak ba dom tăng ni phật tử daong ka mặt trận negar piah rik daong tame bruk jhul kadun likuk jit ruak, jang yau bala meng langik tasik”.

Tui kuhria di gah chức năng, langik pandiak, ia mbak njom tame jeng daok rah tabiak saong dui atah. Kayua yau nan ye, taphia dom kham marat di karja, dom gah chuyên môn dalam bruk duah tabiak dom jalan piah pabak ia pandar, ye bruk daong brei, klah rabha di dom kapul nyaom, menuac urang lac bruk biak sam, rik daong tame ngak brei patrun meneing dom kan kandah ka rahra bhum gaok kan kandah kayua ia njom mbak dalam tỉnh Vĩnh Long./.

(Urang lang: Thu Thảo - 21/05)

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân