Bhap bini xã Phong Xuân jak gauk daong dom kapul daong duah urang njauk bala

Mbang ia sua meng bloh, sang di amuk Nguyễn Thị Quế, daok di palei Bình An, xã Phong Xuân, huyện Phong Điền, tỉnh Thừa Thiên Huế njauk ia dauk dalam jaik 1 mét. Ia sua oh ka tabiak truh sang min tuk mehit lac bộ đội mai daong duah dom menuac lahik di Thủy điện Rào Trăng 3, amuk caluai ia ba tui rilo njam patam, baoh kraoh, bimnao nao brei dom kapul daong duah menuac njauk bala. Umo labaih 70 thun min amuk jeng daok nao gam haong dom adei sa-ai kumei dalam palei daong ka bộ đội ngak mbang huak. Amuk Quế oh klah di pandik harao tuk mehit lac dom sa-ai bộ đội nao daong duah menuac min gaok bala angaok ceik:“Mehit lac ceik jaleih di angaok thủy điện, oh hu hagait jeng ba hasit njam patam, ndo patei haong baoh lahong mai brei ka bộ đôi. Daong ka dom sa-ai daok gar angaok thủy điện oh ka mai hu, caong lac bộ đội samar duah hu saong ba dom sa-ai mai”.

Amuk Nguyễn Thị Tám thun ini umo jaik 80 thun, anek bhik hu diuk hu pasang tabiak daok karei, daok veik 2 diuk pasang taha daok haong gauk. Rabuk ka 5 meng blaoh, baoh sang di amuk nyu jaleih, dân quân dalam palei haong bộ đội mai daong padang veik. Amuk Tám brei thau, tuk drei gaok kan kandah hu bộ đội mai daong, urak ini mehit lac bộ đội nao daong duah urang gaok bala bo njauk bala, amuk tok hu dom drei menuk haong dom baoh lahong metah ba mai brei ka dom cei bộ đội mbang trei tian, piah daok nao duah dom menuac lahik: “Ranuk ka 5 meng blaoh sang jaleih, ia sua harei ini ia tame pasah padai. Bộ đội mai daong menuac gaok bala angaok thủy điện ba mai, urak ini bộ đội mai tal oh hu njam hajao drei ba mai brei, mboh urang tal ye amuk ba mai brei.”

Maong mboh dom amuk taha umo tajuh, talipan pluh thun, nao takai ba yaok pok njam, drei menuk, hasit ralow mai brei, blaoh daok veik daong ngak mbang huak, ngak brei dom urang jakar, urang lin Công binh 414 Bộ Tư Lệnh Quân khu 4 daok padeih takai di sang bac Tiểu học Phong Xuân biak drut drui. Urang pilih njam, urang kaoh ralow, urang mek ia, talei rohim bol bala haong rahra dak khang kajap. Trung tá Mai Văn Thanh, Tham mưu Trưởng đơn vị Công binh 414 brei mboh hatai thau dhar phor anak bruk anit ranam di mikva brei ka urang jakar, urang lin di đơn vị:“Hadei di tuk kol hulin tame bruk, hu mikva xã Phong Xuân, labik kol hulin padeih takai mai daong abih hatai jai. Bruk njauk biai nan lac dalam tuk mikva njauk ia sua biak kan kandah, mikva daok hu brei pok njam, baoh lanong brei ka bộ đội mbang piah hu prein nao ngak bruk. Meng abih prein yava di drei, kol hulin kham merat ngak siam bruk hu jao brei, abih di nyu lac khik hu salamat.”

Dom bruk ngak ndung bak hatai anit ranam gauk di bol bala saong rahra dalam dom harei hajan ia sua biak kan kandah glaih glar di rahra xã Phong Xuân hu kak kajap jang talei jum pataom bol bala haong rahra di bhum taneh gah pai tỉnh Thừa Thiên Huế ini./.

Urang lang: M. Phương – 25/10

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân