Lac sa dalam dom tỉnh kan kandah di abih dalam bhum taneran kraong Cửu Long ngan saong dom baoh sang kathaot daok dalam top glaong abih di taneh ia. Min meng bruk pan akaok, tacei jalan khang di Tỉnh ủy, bruk sahneng duah jalan ngak bharau di karja, bruk njauk hatai pachreih tui di rahra, tỉnh Sóc Trăng dak harei dak patrun dom kan kandah, mbeik drei yam tagok biak khang. Hadei di 10 thun peih ngak danak dak bruk ngak negar padang ngak palei pala bahrau, tỉnh mek hu rilo jak jeng siam mekre.

Nyaom bai pataom iek veik 10 thun padang ngak palei pala bahrau

 

Dalam dom harei puac thun, mai veik bhum pala njam patam di xã Tham Đôn, huyện Mỹ Xuyên mboh rahra daok jar var iek glang njam patam piah pablei tết. Ndom biai haong kol dahlak, sa-ai Lý Thị Ma-ri daok di palei Trà Mẹt brei thau, meng tuk dom thủy lợi hu ngak bloh, abih di nyu lac dom jalan palei hu buh jien tame ngak siam, bruk pablei kaya nong di mikva hu mbuan lagaih jang, urang mai tal bein piah blei, trun hu jien pah pajeng saong tukvak pajeng ba:  Drei khin pablei ye hu menuac mai tal puh, urang mai blei tal labik nan ye drei oh abih jien pah pajeng. Drei kaoh bloh hu menuac blei mai teik tal labik.

Piah peih tabiak jalan pachreih kinh tế patagok, abih di nyu lac pabak bruk nao mai, pajeng ba pandap panda bhum palei pala, taphia rilo jalan praong daok hu pajeng ba, dom jalan palei jeng hu Sóc Trăng buh rilo jien tame ngak. Dalam 10 thun tapa, jaik 3.000km jalan saong labaih 15.600m tatua hu ngak haong yaom jien abih jaik 3.000 tỷ đồng. Oh lac radaih patuh 2 kong bo radaih 4 kong jeng nao hu tal pasak dom xã bhum atah bayah dalam tỉnh.

Lingiu di bruk sangka buh jien tame ngak dom công trình dân sinh, dom bruk ngak mbang kinh tế pambuak gauk jeng hu Sóc Trăng iek praong saong dak harei dak pachreih hu rilo mikva urang ngak nong. Urak ini dalam tỉnh hu 01 liên hiệp hợp tác xã ngan saong 4 hợp tác xã thành viên haong 142 hợp tác xã, labaih 1.100 tổ hợp tác daok ngak bruk. Dom hợp tác xã, tổ hợp tác ini rilo meng hu doanh nghiệp blei veik abih kaya pandap. Puac thun bloh, lô pandap vú sữa tím camereip abih di tỉnh Sóc Trăng kayua dom HTX ngak nong Trinh Phú, huyện Kế Sách pala pablei tapa Mỹ, lac sa darak pasar biak kan tame hu. Ini hu maong lac kadha praong piah ka urang ngak nong caik hatai jia tame jang tui pala, ngak tui mô hình VietGap salih ka bruk pala, ngak yau dahlau daih. Ong Lê Văn Nở, sa urang dalam HTX ngak nong Trinh Phú, chreih chrai lac: Meda lac thei jeng chreih chrai kayua baoh vú sữa di drei pablei tapa hu Mỹ ye biak uan tabuan. Yaom pablei di darak pasar lac 15 rabau, hu tuk trun 10 rabau, urak ini pablei hu 30 rabau, mikva urang ngak nong bui sambai lô kayua hu yaom.

Tapa 10 thun peih ngak danak dak bruk ngak negar padang ngak palei pala bahrau, tal urak ini, dalam tỉnh Sóc Trăng hu 40 xã mek hu angan chuẩn xã palei pala bahrau, 2 xã daok ngak harak likau brei angan, dom xã daok veik ngak hu meng 12-17 tiêu chí. Tal puac thun ini, hu 02 xã hu brei angan lac xã plei pala bahrau popk paglaong saong ban sit Ngã Năm  ngak hu salah bruk padang ngak palei pala bahrau. Duk saong bruk di trung ương jao brei, Sóc Trăng ngak hu saong ngak tapa tanut ba tabiak. Ngak hu yau nan, ong Lương Minh Quyết, Yam ndok Sở ngak nong saong patagok palei pala tỉnh Sóc Trăng khan lac: Sóc Trăng lac tỉnh daok gaok rilo kan kandah, ye Tỉnh ủy meng tacei pato abih hệ thống chính trị, dom hagait njauk ngak dahlau, dom hagait njauk ngak hadei, meng nan, pataom prein di drei gam haong bruk daong di Trung ương, bruk rik tame di bhap bini piah kol drei buh ngak ka danak dak palei pala bahrau hu chuẩn palei pala bahrau dahlau, bloh hadei di nan kol dahlak ngak dom bruk daok veik. Meyah kol drei ngak parai rai ye oh ngak hu bruk di Trung ương jao brei.

Yaom lac mek hu rilo siam mekre dalam 10 thun tapa, min danak dak bruk ngak negar padang ngak palei pala bahrau dalam tỉnh jeng daok rilo cuang kandah. Piah pasiam dom tavak tavaiy jeng ye padang ngak palei pala bahrau dalam vaktu hadei hu dom jak jeng praong jang, ong Trần Văn Chuyện, Chủ tịch Ủy ban nhân dân tỉnh Sóc Trăng brei thau: Anak tal, tỉnh biak caik hatai sangka saong daok tacei pato peih ngak bruk palei pala bharau , tui jalan lac, palei pala bahrau lacrami ramik veik bruk ngak nong lac bruk praong, tam nông lac jalan ngak praong. Taong abih đảng bộ tỉnh Sóc Trăng kham merat dalam vaktu 2021 2025, dalam tỉnh hu 70% xã mek hu chuẩn palei pala bahrau, dalam nan hu 25% xã palei pala bahrau hu pok paglaong saong 10% xã palei pala bahrau mek hu chuẩn kiểu mẫu, 50% huyện, ban sit ngak hu salah bruk padang ngak palei pala bahrau.

Thau lac padang ngak palei pala bahrau tok hu labik peih tabiak min oh hu labik tamat, bruk ngak hu dalam 10 thun tapa di tỉnh Sóc Trăng daok lac jalan peih tabiak piah mek hu jak jeng dalam vaktu tal. Ngan saong danak dak bruk ngak negar padang ngak palei pala bahrau, Sóc Trăng caong ngak habar salih bahrau mbaok meta bhum palei pala, paglaong mbang ngui, daok dang ka bhap bini, rik daong ngak hu bruk lac jeng tỉnh ginup meda dalam bhum taneran kraong Cửu Long./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân