Bilan thu di bhum Tây Nguyên saong nam bộ bhian dui atah tal bilan 4. Kayua yau nan ye, tukvak anak tal tui kuhria mboh dahlau, langik daok rilo kanjah jhak ngak kan kandah tal bruk pacang khik glai saong mbuan ba tal khuah glai. Dom po glai njauk ba tabiak jalan ngak piah pacang khuah, padam khuah glai, piah patrun khat lahik kayua khuah glai.

Pathram padam apui khuah glai 

Bein negar U Minh Thượng (Kiên Giang) urak ini daok tame tukvak tabung glaong di bilan thu. Bein hu pataom tame ngak samu gauk dom jalan pacang caga khuah glai ngan haong hatai kham merat patrun biar di abih dom mbang khuah meda rah tabiak. Ong Nguyễn Văn Cường, Phaok akaok Bein negar U Minh Thượng kuhria mboh lac, meyah tua riya pandiak bhang daok dui atah dom bilan tra, ye glai dalam Bein negar U Minh Thượng mbuan si khuah di pakat 4 saong hu labik tal pakat 5, meda khuah glai tuk halei jeng hu.

Caga pacang meng avan, dahlau di tuk bilan hajan thun 2019 tamat, Bein negar U Minh Thượng hu beik binek khik aia ala takai glai nan ye thun ini aia saong độ ẩm daok biak glaong. Bein negar tui iek catang bruk tua riya pandiak bhang angaok mblang taneh glai, meyah labik tambok tanu thu lagu ye bơm njuk aia tagok khik độ ẩm tathah ala takai glai. Dom mac bơm điện công suất prong tuk halei jeng caga njuk mek aia tame glai. Bein negar U Minh Thượng peih bruk padam khuah tui jalan pacang lac bruk praong dang akaok, padam khuah samar drah, siam mekre. Bein peih bruk padam khuah tui jalan “4 di  labik”; padang tagok, pakhang, pasiam kapul urang khik iek pacang caga khuah, padam khuah glai, khik siam mekre taong abih mblang taneh glai daok hu; kham merat oh caik rah tabiak dom mbang khuah prong ngak khat lahik trak tal drap ar dalam glai.

Taphia dom jabat hu kuhria caga bloh, hu padang jalan pacang caga khuah glai siam jeng daok hu dom labik daok gaok rilo tavak tave. Pagap yau, bruk mbuan khuah glai di tỉnh Ninh Thuận biak njauk báo động, daok di pakat biak mbuan si khuah (lac pakat 5). Meng akaok thun tal ini, di  Ninh Thuận hu rah tabiak 25 mbang khuah glai ngan haong mblang taneh labaih 15 ha. Yaom lac bruk khat lahik tal glai oh rilo, kayua rilo meng khuah hareik hareim, hala thu, min meyah tua riya pandiak bhang dui atah jang ye dom mbang khauh saong mblang taneh njauk apui khuah meda tagok jang saong meda ngak khat lahik prong.

Ong Dương Đình Sơn, Phaok akaok Chi cục Kiểm lâm tỉnh Ninh Thuận brei thau, tapa pasang iek, duah thau di Chi cục brei mboh, bruk pacang khuah, padam khuah di dom jabat po glai yau: Công ty TNHH Một thành viên Lâm nghiệp Ninh Sơn; Ban khik iek glai pacang caga akaok halau binek sông Sắt; Ban khik iek glai pacang caga akaok halau binek Tân Giang; Ban khik iek glai Krông Pha jeng daok hu rilo cuang kandah, tavak tave, ba tal siam lagaih di bruk pacang khuah, padam khuah glai oh ka glaong, caik rah tabiak rilo mbang khuah tuk tal bilan thu.
Anak bruk yau nan, Sở Ngak nong saong patagok palei pala tỉnh Ninh Thuận pandar dom jabat po glai pambuak bruk catang haong gah kiểm lâm saong karja palei patagok bruk pathau khan, brei ka rahra thau adat hukum saong abih hatai dalam bruk pacang khik glai, pacang khuah, padam khuah. Dom po glai pambuak bruk catang haong karja palei peih bruk brei ka bhap bani daok jaik taphia glai mboh tangin tame harak sanya oh ngak suan dom adat hukum pacang khik glai, saong pacang caga khuah glai. Dom po dự án đầu tư dalam glai khik iek mboh tangin tame harak sanya ngak njauk haong bruk pandar apui dalam glai njauk tui adat hukum di karja piah pacang cakak bruk ngak suan ba tal apui khuah glai. 

Tui ong Nguyễn Quốc Hiệu, Phaok Akaok Cục Kiểm lâm, Tổng cục Lâm nghiệp, bruk mbuan khuah glai tuk halei jeng rah tabiak meyah dom po glai oh sangka pacang caga. Po glai njauk ba tabiak jalan ngak saong peih ngak bruk brei patrun pandap panda khuah glai piah pacang caga bruk mbuan ba tal khuah glai. Dom po glai njauk peih ngak siam jalan ngak 4 di labik piah caga pacang caga apui khuah, mek hu jak jeng siam mekre tuk rah biak apui khuah glai. Kiểm lâm di labik nan lac urang peih ngak adat hukum , njauk pathau khan piah ka po glai thau cambaih trách nhiệm jeng yau quyền lợi di drei. Hạt kiểm lâm njauk abih hatai brei panuac ka dom pakat, patagok bruk pasang iek po glai, abih di nyu lac dom mban khik iek glai kayua ini lac jabat hu jao ngan haong mblang taneh glai biak prong.
Khuah glai rilo meng lac mai meng anek manuac, nan ye bruk pathau khan piah ka bhap bani thau saong pandar apui njauk adat hukum, siam mekre lac bruk biak praong./.

Urang lang: Jasi - 28/2

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân