Gilang pariak sarak kanja brei ka dom sang kathaot masre jien ngak mbang saong hu tabiak truh kathaot

Karei jang dom gilang pariak pablei salih, gilang pariak sarak kanja tok brei ka dom sang kathaot saong urang mbang tui sarak kanja masre jien, nan ye bruk “jaik bhap bini, thau cambaih labik daok, thau cambaih menuac urang” piah brei jien masre lac bruk dang akaok di dom urang jaka tín dụng cơ sở. kayua yua nan ye bo dom urang jaka gilang pariak sarak kanja brei nao tal bhum atah biyah biak rilo. Dom glaih glar nan jeng hu pabak veik tuk rilo sang kathaot, sang bangsa takik masre hu jien ngak mbang saong hu tabiak truh kathaot.

Puk Bàu Chim, xã Đức Thuận jaik taphia haong ban sit Lạc Tánh lac xã kathaot di huyện Tánh Linh, lac labik hu biak rilo bangsa takik daok. Xã hu rilo baoh sang mai meng dom tỉnh di gah kreh saong gah barak negar mai ngak mbang, bhap bini Phan Thiết mai daok tui danak dak kinh tế bahrau nan ye raidiuk daok rilo kan kandah. Saai Nguyễn Cửu Long daok di xã Đức Thuận rilo thun glaih glar haong bruk ngak mbang kinh tế min “ka oh tal halei”, kathaot jeng daok kathaot. Tuk gilang pariak sarak kanja brei masre jien pala phun thanh long piah peih bruk ngak mbang, meng hu jien laba bier nan ye bahrau 4 thun hadei sang saai tabiak truh kathaot, pataom hu phun jien. Urak ni sang saai hu 3 ha gam pala phun thanh long gam pala phun kadiuk pablei tabiak negar langiu, yaok thun laba hu labaih 500 triệu đồng…

Bahrau ni, jit Covid-19 nyu ngak kan kandah tal raidiuk di bhap bini biak rilo, ong Phan Văn Hùng (ndih tapui thun 1979) daok di puk 2, xã Đồng Kho, huyện Tánh Linh masre jien dalam danak dak ba bruk ngak 50 triệu đồng paih peih praong labik ngak pasei. Phun jien mare hu ba bruk ngak tani tanat ka 2 urang dalam sang, jien mek tame hu tani tanat 5 triệu đồng/sa bilan. Ong Hùng brei thau: “Meng jien masre di gilang, sang dalak hu peih praong labik ngak, blei jamriek, pandap panda pabak ka bruk ngak mbang, meng nan bruk ngak dak harei dak siam lagaih jang, meda taduan rilo urang mai blei pambang pasei, jien mek tame hu tagok saong tani tanat jang., khang kajap yam tapa kan kandah meng jit Covid-19”…

Nan jeng lac 2 dalam yaok ribau sang hu masre jien meng dom danak dak di gilang pariak sarak kanja piah ngak mbang tabiak truh kathaot, tani tanat bruk ngak atau hu baoh sang tui caong maong, pandar phun jien njauk jalan. Ong Phạm Anh Đức - Giám đốc gilang paraiak sarak kanja dhar Bình Thuận brei thau: tukvak 2011 - 2020, hu bruk sangka di Trung ương saong bhum palei, abih di nyu nan lac meng tuk hu Chỉ thị 40 harei 22/11/2014 di Ban Bí thư ka patagok bruk par akaok di Đảng ngan haong tín dụng sarak karja, phun jien hu pabak yaok thun biak glaong. Taong abih jien brei masre tal harei 30/6/2020 di gilang pariak sarak kanja dhar Bình Thuận lac 2.859 tỷ đồng, tagok labaih 150% duk saong thun 2010. Meng thun 2011 tal 2020, hu labaih 302.000 sang kathaot, sang jaik kathaot, sang bahrau tabiak truh kathaot saong dom sang sarak kanja hu masre jien. Kadung jien brei mesre sarak karja hu ba mai kein laba mboh di anak meta, hu daong ka jaik 33.062 sang tabiak truh kathaot; ba bruk ngak ka labaih 16.000 urang; daong ka labaih 50.000 anek saih, sinh viên sang kan kandah hu masre jien piah nao bac. Langiu di nan, labaih 156.000 danak dak pabak ia hacih, danak dak jaman hacih saat di palei pala hu padang ngak; jaik 2.500 baoh sang brei ka urang kathaot hu ngak bahrau; 110 urang hu masre jien piah blei, piah pah sang daok …

Phun jien hu ba tabiak samar drah hu daong ka yaok triệu urang hu bruk ngak tani tanat, yaok ribau sang tabiak truh kathaot. Rilo sang bangsa takik hu jaman saong hu pandar ia hacih, rik tame bruk salih bahrau jalan saneng ka bruk  hacih saat alam langik tasik dalam rilo bhap bini bangsa takik dalam tỉnh. Bình Thuận daok kham marat padang ngak danak dak oh daok sang kan thaot tui jalan khang kajap saong kadung jien masre meng gilang pariak sarak kanja jeng daok hu ba nao tal sang kan kathaot, bahrau tabiak truh kathaot saong sang sarak kanja yaok harei, yaok tuk. Hatai caong tabiak truh kathaot yam tagok ngak kaya mada di bhap bini jeng daok hu khik saong meda ngak hu dalam vaktu anak tal./.

Urang lang: Thu Thảo – 28/09

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân