Tukvak jaik di ini, dom bala daok rah tabiak gam gam gauk labik dalam negar ngak ka gru pato, amaik ame saong anek saih mboh huac ka bruk siam mekre salamat dalam sang bac ka rup drei saong ka anek bhik di drei. Urang daok duh hatai, mboh huac ka dom bala mbuan rah tabiak. Nan ye, 'Sap gar di sang bac meda yava tui thun bilan, min 'sap chuông brei thau ka bruk oh siam mekre salamat dalam sang bac' tal tuk njauk padeih veik, oh caik ka nyu rah tabiak dom bruk pandik harao, juai caik hadei di rah tabiak bala blaoh meng ndom tagok "sap chuông brei thau dahlau".

Meyah mong mboh amaik ame di adei N.T.K (umo 12 thun, bac tal 6/8, Sang bac THCS Bạch Đằng, Quận 3, TPHCM) – lac anek saih njauk phun kayau jaleih kateik metai di sang bac, se ble anak tau di anek likei kacua, ye thei jeng haok aia meta. Amaik ame di K. oh saneng tal, adei metai kayua phun kayau buac gha jaleih kateik tagok rup hadei di dom minit nao tame sang bac. Jaik 3 thun dahlau, gauk gar di N.T.L (daok di quận 2), sinh viên gah Kỹ thuật môi trường, Sang bac ĐH Công nghệ TPHCM, preo caok tuk L. metai kayua bê tông prong pacah, laik trun meng tal glaong njauk akaok tuk daok dang dak talei nao tame thang máy tagok duk bac. Bahrau dom harei ini, Bùi Hoàng Anh (22 thun, daok di xã Bù Gia Mập) nao tame sa sang bac tiểu học di bal Đồng Xoài, kateik greik sa anek saih kamei piah rapeik rapai dalam jaman di sang bac. Meda lac, amaik ame di uranaih kamei nan jeng oh sahneng tal bruk anek di drei njauk urang rapeik papai dalam sang bac.

Dom dalikan nan brei mboh bruk siam mekre salamat dalam sang bac grauk labik dalam negar daok hu hagait nan, ngak ka gru pato, amaik ame saong anek saih mboh huac ka bruk siam mekre salamat di rup drei. Urang mboh duh hatai kayua lac dalam sang bac bo hu bak dom kadha mbuan ba tal bala pandik harao. Hadei di yaok bruk rah tabiak, baoh panuac "lac sap chuông brei thau dahlau ka bruk siam mekre salamat dalam sang bac" hu mboh veik. Min hadei di nan, nyu rah tabiak dom dalikan pandik harao karei.

Tui ong Nguyễn Văn Ngai, urang dahlau diah ngak Phaok akaok Sở pato megru bal HCM, “urang hiệu trưởng njauk khik iek bruk pato megru, hu trách nhiệm ka taong abih bruk dalam sang bac nan ye kan si mong iek hu taong abih bruk. Yau nan min, hiệu trưởng brei thau parabha bruk ka yaok urang, yaok kapul nyaom lac gru pato, urang ngak dalam sang bac bhian pasang iek piah samar duah mboh dom kadha  mbuan ba tal bala”.

Urang dahlau diah ngak akaok Sở pato megru sa tỉnh jaik taphia bal raya ndom lac gah pato megru njauk mboh lac gah sang bac daok hu dom kadha daok ngak ka urang mboh suh sah. Urang ini ba tabiak bruk di thun 2019, bruk chập điện khuah di sa sang bac mầm non di phường Phú Lương (quận Hà Đông, Hà Nội) ngak ka gru pato srau dhau pok anek saih klaak nduac; atah di ini oh lavik, rilo duk bac di huyện Núi Thành (tỉnh Quảng Nam) tabung kiak bruk pacah laik trun, pambang kareih rilo duk bac laik pacah... Kayua yau nan ye, di tuk ini, dalam tuk ini, Mentri Pato megru saong Sở Pato megru dom tỉnh, bal njauk pasang iek veik taong abih labik di dom sang bac dalam negar. Taphia di nan njauk patagok bruk tacei pato dom kadha khik caga siam mekre salamat ka anek saih, gru pato. Hu yau nan, gah pato megru meng langyah hu dom bruk oh siam rah tabiak dalam sang bac.

Dalam biar harei 26/5, ong Huỳnh Thanh Phú, Akaok sang bac THPT Nguyễn Du (quận 10, TPHCM) gam haong gru pato nao mong iek vin taom dhar sang bac, mong iek dom daning sang, mbrong aia, ổ điện, talei điện dalam tal bac... Ong Phú brei thau, bruk pandik harao bahrau rah tabiak di Sang bac THCS Bạch Đằng daok ngak ka dom urang dang akaok sang bac njauk pasang iek veik cơ sở vật chất. Atah di ini dom harei, tuk bal raya HCM yam tame bilan hajan, urang hiệu trưởng ini pandar kaoh 2 phun prong dalam sang bac, kayua rup phun prong, racam, mbuan jaoh jaleih. Ong jeng pandar padang ngak rilo gheng pacang khik tabung dalam mblang bein sang bac kayua huac lac “meyah hu dhar kayau laih trun meda ngak brei jaleih kateik anek saih". Khan ka dom dalikan nan, ong Phú brei thau oh lac tok hu urang dang akaok sang bac, bo gru pato, urang ngak dalam sang bac jeng njauk hu ilamu mong iek, taong yaom saong mong mboh dahlau bruk, piah pacang cakak dom bruk kanjah jhak meda rah tabiak.

Jeng tui Akaok saong bac THPT Nguyễn Du, sang bac njauk bhian pato ilamu diuk rai ka anek saih, daong ka dom adei thau jalan pacang khik anak dom bruk oh siam rah tabiak anak meta, ilamu pacang veik dom bruk kanjah jhak. Pagap yau, njauk pato anek saih tuk langik hajan ribuk juai nao tabiak gah langiu, juai nduac chat langiu mblang sang bac. Tuk hu urang oh thau meng halei mai blaak tame sang bac kateik greik, njauk preo iew manuac daong. Tuk mboh langik grum takala taong atau phun jaleih juai nao tabiak mong iek bo njauk daok veik dalam tal bac... Ong Phú daok hu panuac lac: "Njauk caik hatai tal dom kadha pathau khan meng amaik ame saong anek saih ka bruk khik siam mekre salamat dalam sang bac. Dom bruk brei thau ka cơ sở vật chất di sang bac, dom bruk taong paoh gauk dalam sang bac... meda hu daong ka sang bac mbuan laghaih jang dalam bruk khik iek, pasang mong, plaih dom bala ba tal metai lahik meda rah tabiak./.

Urang lang Jasi-30/5

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân