Ngak catang tui bruk ba tabiak di Mentri Y tế, tui tacei pato di Sở Y tế ka bruk pacang caga Covid-19 

Meng tuk jit ruak Covid-19 tamuh gilac veik, Sang iek ruak Ung bướu Ban raya HCM brei parabha jeng klau pabah mbang karei di gauk ka urang y tế, urang ndih iek ruak saong urang tame iek ruak lingiu, ngak catang tui bruk ba tabiak di Mentri Y tế, tui tacei pato di Sở Y tế ka bruk pacang caga Covid-19 di labik iek ruak. Bác sĩ Diệp Bảo Tuấn, Phaok akok Sang iek ruak Ung bưới Ban raya HCM brei thau, sang iek ruak birau padang dua đơn vị nan lac khoa daok karei saong khoa iek urang ruak trak. Dom urang ruak ung thư gam saong ruak karei yau me-ik saradang, phoi, trun prein pacang  ruak, suy thận…brei taong ruak karei, pacang tapa klau tal pabah mbang, hu urang khik iek luac harei melam. Dom urang ruak nan hu brei pabak ginup dom bruk yau mbang huak, jru tavao, mek darah, siêu âm…di bilik iek ruak piah klah taom gaok urang gah langiu.

Yau nan min, tui bac sĩ Tuấn, bruk daok haduh hatai lac lavang sang iek ruak sit ginik, min yaok harei hu meng 9.000 tal 10.000 urang ruak, gauk gar di urang ruak, urang tame iek ruak saong daok veik jru ruak, nan oh ka kuhria tal labaih 2.000 urang y tế. Urang ndih iek ruak rilo biak kan brei pa-atah di gauk nan ye biak mbuan njom ruak: “Urang ruak ung thư bhian hu takik prein pacang ruak yau nan ye ruak mbuan trak jang tuk urang njom nCovi. Khol dahlak kham merat pacang ruak, oh brei urang tame rivang. Daok raong ruak ye tok brei sa urang, meyah hu bruk praong meng brei urang daok veik, lingiu di nan tok brei tame rivang tui tukvak ba tabiak.”

Tui Phó Giáo sư Hồ Thượng Dũng, Phaok Yam ndoc Sang iek ruak Thống Nhất, meng bruk taha nao di rup pabap ngak ka prein yawa di urang taha umo oh daok khang kajap, bhian hu ruak rauk dalam rup, ruak suai lavik. Ini lac sa dalam dom bruk ba tal urang taha mbuan njom Covid-19. Abih di nyu lac, tuk njom virus, tung tian hatai baoh ruak trak samar saong mbuan metai. Di Sang iek ruak Thống Nhất, yaok khoa jeng peih bruk pacang caga jit, yau trun takik urang ruak dalam sa bilik iek ruak, takik tame iek ruak gilac veik saong patagok bruk iek ruak di sang ka urang umo taha.

Khoa Huyết học di Sang iek ruak Chợ Rẫy yaok thun taong ruak ka labaih 7.000 mbang urang ruak, dalam nan hu 4.000 mbang urang ndik iek ruak  saong 3.000 mbang iek ruak lingiu. Dalam nan hu 70% urang ruak njauk dom ruak gah darah, 30% daok veik lac dom ruak karei.  Thạc sĩ - Bác sĩ Hoàng Thị Thúy Hà, Phaok AKaok Khoa Huyết học khan brei thau, dom urang ruak darah hu pandar dom janih jru ngak patrun prein pacang ruak yau nan ye hệ miễn dịch trun ralo, meyah njom Covid-19 ye ngak ka ruak trak jang saong mbuan metai. Kayua yau nan ye pak di labik cang ka-nyal mac tame khoa iek ruak brei pacang jeng dua jalan meng pasei piah pacang cakak dom urang karei oh brei tame labik taong ruak.  Bac sĩ Hà lac: “ Dom urang ruak mboh yau ruak, ye brei tame bilik pasang iek ruak, brei daok atah di gauk 2 met, urang dut iek ruak, bac sĩ iek ruak brei cuk khan ao pacang rup.”

Bác sĩ Chuyên khoa 2 Hồ Văn Hân – Phaok Yam ndoc sang iek ruak Nhân dân Gia Định lac, Khoa Hlang darah di sang iek ruak yaok harei hu 5 mbang, yaok ca labaih 20 urang ruak. Khoa  hu bilik brei daok karei, urang ruak mboh ruak karei  meda brei dut iek labar di tarakong piak duah ruak SARS-CoV-2. Sang iek ruak hu padang duk bilik dut iek ruak di Khoa Cấp cứu saong Khoa Iek ruak, ngak bruk luac harei melam. Dom urang iek ruak hu roh duah, ngak tabiak mac hlang yawa lưu động dalam dom bilik iek ruak nan piah patakik bruk njom ruak meng urang ruak tapa urang y tế: “Jalan ngak bruk yau hệ thống áp lực la-ar, không khí kayua urang ruak suak yawa saong ia pabah idung parah tabiak hu pacang meng tyal halang Heba, meng tia cực tím dahlau di tuk tathuak tabiak langiu, takik virus pambak ruak tabiak langiu.”

Rilo harei tapa, Ban raya HCM oh hu urang njom Covid-19 dalam bhap bini. Yau nan min, dom sang iek ruak tuk halei jeng thau lac: njauk brei paglong hatai sangka anak bruk mbuan njom mbak Covid-19. Bruk patagok dom jalan pacang caga jit di yaok balai y te nan yau sa paga pacang khang kajap, samar jhul kadun likuh jit ruak praong Covid-19./.

Urang lang: Ái Nghiêm – 04/09

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân