Pachreih tui bruk jak ba “Taong abih bhap bini jum pataom padang ngak palei pala bahrau, đô thị văn minh”, tukvak tapa, urang bangsa Cam di ban raya Hồ Chí Minh tuk halei jeng thau jum pataom gauk, daong gauk patruh eik patrun kathaot, kham merat hu mbaok tame dom bruk pakacah gauk anit ranam taneh ia, rik daong pren yava dak padang ban raya angan Wa dak harei dak văn minh, nghĩa tình. Pahadar 88 thun harei padang Mặt trận Bangsa Yasa 18/11 saong “Harei roya jum pataom abih bangsa””, Ái Nghiêm, urang vak di rayo sap ndom Việt Nam daok di ban raya Hồ Chí Minh hu kadha vak ka bruk jum pataom ini di bhap bini urang Cam daok di ban raya angan Wa:

 

 

 

Mai ravang Sang megik Jamiul Anwar, Khu phố 2, Phường 1, Quận 8, TPHCM labik sambahyang, labik sinh hoạt di labaih 2.000 urang Cam Islam, kol dahlak mboh bruk bui sambai chreih chrai di mikva uan raok Harei roya Jum pataom abih bangsa thun 2018. Ini jeng lac tuk piah ka mikva brei mboh bruk anit ranam gauk, daong ba gauk, kak kajap bruk jum pataom dalam jumaah, dalam puk paga. Tal urak ini, Phường 1 oh daok hu baoh sang urang Cam halei taik tahak, Taong abih uraniah dalam umo thun nao bac jeng hu nao tal sang bac. Urak ini, hu 20 urang Cam di phường ini bac tal cao đẳng đại học, dalam nan hu 3 urang hu pilih ruah nao bac megru di taneh ia lingiu bloh hu mai veik ngak bruk. Labaih 50 sinh viên daok bac di dom sang bac cao đẳng, đại học di ban raya Hồ Chí Minh.

Bhap bini urang Cam dalam Phường 1 lingiu di bruk jum pataom gauk, daong ba gauk patruh eik patrun kathaot, daok thau jum pataom gauk, ba gauk khik ramik hacih sa-at sang danaok, labik daok, cảnh quan đô thị. Sang halei jeng hu thùng caik hareik hu tuk gum sre, klak hareik njauk tuk, njauk labik. Mikva oh lih mek jalan, hè phố, khik caga an toàn giao thông.

 

Daok Tổ dân phố ka 5, Khu phố 1, Phường 17, quận Phú Nhuận hu jaik 150 sang urang Cam. Dalam nan, hu labaih 20 sang pablei salih, mikva Cam tuk halei jeng ngak siam bruk kak je saong phúc lợi ka xã hội. Gam haong bruk pablei salih, mikva Cam daok hu patagok dom bruk ngak meng kan di bangsa drei yau ye menyim, jhik, peih dom nhà hàng mbang menyum halal tui hukum Islam piah duh ka tuai damuai saong dom urang ngak mbang pablei salih praong mai meng dom taneh ia Islam…, tapa nan hu ba bruk ngak saong ba jien tame tani tanat ka rilo anek kamuan dalam jumaah. Yaom lac oh ka biak ginup meda, min mikva biak thau daong gauk. Meng akaok thun tal ini, mikva hu rik pataom labaih  60 triệu đồng brei kadung jien "Mái ấm tình thương" di Phường, daong ka 2 baoh sang Cam kathaot hu sang daok. Rilo thun gam, Tổ dân phố ka 5 mek hu angan  “Tổ dân phố Ilamu" di phường, di quận. Amuk Basiroh daok di Phường 17, quận Phú Nhuận, TPHCM  lac 1 dalam dom urang “Jak ba gheih”, lac urang hu rilo rik daong dalam bruk dak padang talei jum pataom bangsa pak ini.

 Piah rik daong tame bruk dak padang ban raya văn minh, nghĩa tình, mBan Đại diện Cộng đồng Islam ban raya Hồ Chí Minh hu jak ba mikva urang Islam rik pataom hu yaok tỷ đồng piah padang ngak, ramik pasiam dom sang megik, dom surao, lagaih haong bruk quy hoạch đô thị, min khik hu kiến trúc bangsa Cam, daong ngak brei hadah hadai mbaok meta ban raya. Pagap yau sang megik Jamiul Islamiyah, labik 641 Trần Hưng Đạo, Quận 1; Sang megik Jamiul Muslimin, labik 52 Nguyễn Văn Trỗi, Phường 15, Q.Phú Nhuận…Dom sang megik ini, lac labik sambahyang, labik sinh hoạt tôn giáo saong jeng lac labik pato akhar Cam, pato hukum Islam ka anek kamuan urang Cam daok di ban raya Hồ Chí Minh.

Bruk jak ba “Taong abih bhap bini jum pataom padang ngak palei pala bahrau, đô thị văn minh”, hu pambak khang, ngak brei salih bahrau mbaok meta đô thị, khu dân cưbhap bini bangsa cam. Raidiuk bhap bini dak harei dak tagok, dom yaom glaong ilamu di bangsa hu khik ramik saong cakrok patagok, an ninh hu khik kajap dalam khu dân cư, rik daong dak padang ban raya angan Wa dak harei dak siam mekre, ndung bak hatai anit ranam gauk./.

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân