Gam haong bruk ba pandar dom yaom glaong ilamo di puk palei, kein lagaih di tasik, urak ini gah du lịch tỉnh Ninh Thuận daok jhul khang bruk rivang zirah gah ngak nong, rivang zirah bhap bani,… piah pabak hatai caong khin di tuai damuai. Dom bruk nao rivang ma-in ini daok ba mai rilo siam gheih ka dom kapul nyaom nao rivang ma-in, urang nao rivang ma-in tuk mai tal Ninh Thuận.

Tasik Ninh Chu

Dom thun jaik di ini, palei nho Thái An, xã Vĩnh Hải, huyện Ninh Hải hu jeng labik rivang ma-in biak pachreih tuai damuai dalam saong langiu negar  tuk mai tal  Ninh Thuận. Yaok thun, palei nho Thái An taduan raok yaok ribau mbang tuai damuai vaih tame rivang, ba tal bruk tamuh tabiak rilo dịch vụ nao gam tui, pabak hatai caong khin di tuai damuai. Sa-ai Nguyễn Anh Thịnh – po labik padeih padei Bigdog homestay pak ini brei thau, palei nho Thái An daok angaok jalan 702 pambuak pagam Ninh Thuận saong Khánh Hòa, pagam haong tasik Mỹ Hòa, Hang Rái, Bein Quốc gia Núi Chúa saong vịnh Vĩnh Hy, hu pagap yau “canah jalan rivang ma-in”: Canah jalan vịnh Vĩnh Hy hu rilo labik piah ka drei meda vaih tame rivang ma-in, dom mblang hamu sara tuai damuai drei meda padeih veik piah thaot hadei di nan nao tal palei nho Thái An. Sang halei hu nho tasak drei tame rivang iek, oh abih jien saong meda blei nho ba mai sang.

Oh lac tok rivang ma-in meng dom bein nho, urak ini, rilo mblang bein, mblang hamu palao pabo, pabe jeng hu bhap bani, po doanh nghiệp ba tame pandar duh ka tuai damuai. Meda ndom tal mblang hamu raong pabo An Hòa, palei An Hòa, xã Xuân Hải, huyện Ninh Hải, tỉnh Ninh Thuận ngan haong tapol meng dom rituh tal yaok ribau drei daok dui pachreih rilo tuai damuai mai rivang, thaot binguk haong tapol pabo saong ba drei tame raidiuk di bhap bani  labik ini.

Sa-ai K’Thủy – sa urang tuai mai meng tỉnh Lâm Đồng brei thau, tuk nao rivang ma-in, thaot binguk di palei nho Thái An, mblang hamu palao pabo An Hòa blaoh, bhian nao trun tasik Ninh Chữ blaoh nao darak Đầm Nại piah duah blei kaya ikan that bo yaom kaom jeng mbiah, lap. Dahlak blei mai sang piah ngak pandap alin, blei mai piah ka sang dahlak mbang. Tuk mai tal ini, dahlak bhian ndih daok tui janih homestay kayua dahlak mboh biak takre. Dahlak meda ma-in bui sambai haong menuac dalam sang, ma-in haong ayut sahabat. Sang dahlak ba gauk ngak mbang huak yau daok di sang drei. Tuk hu taom gaok haong urang taong ikan, urang pablei salih kaya ikan di darak Đầm Nại dahlak meng mboh taneh Ninh Thuận ini biak gheih saong  bak hatai anit ranam. Tapa nan dahlak thau hu rilo kadha biak chreih chai.

Daok ini lac lac panuac khan di sa-ai Trương Phúc Đồng, sa urang tuai mai meng bal raya Hồ Chí Minh: Yaok thun sang dahlak nao rivang ma-in grauk labik, min sang dahlak jeng takre nao tal vịnh Vĩnh Hy. Kayua tasik pak ini biak hacih saong hijao, pandiak trun biak mekre, cuah pak ini patih saong racin klik biak laghaih ka bruk thaot binguk. Sang dahlak jeng biak takre ndik ceik nan ye trun pak ini gam menei tasik gam ndik ceik. Bein negar Núi Chúa hu tal 6 tabung ceik. Tuk nao drei gam ravang padeih padeigam ndik ceik.

Piah meyaih khan prong dalam tal tuai damuai dalam negar jeng yau dom doanh nghiệp gah rivang ma-in thau tal pren khang gah rivang ma-in Ninh Thuận, akaok bilan 7 meng blaoh, gah rivang ma-in Ninh Thuận hu peih ngak dandak dak “Famtrip pasang iek pandap rivang ma-in bol bhap rahra di Ninh Thuận 2020”. Dalam dom bruk di danak dak, dom doanh nghiệp hu pasang iek, duah thau dom labik rivang ma-in daneiy angan di tỉnh, yau: Bimon Po Klong Girai, palei nho Thái An, vịnh vĩnh Hy, palei lan am Bàu Trúc,…

Ong Phạm Thanh Bình, Phaok akaok pasak Thông tin xúc tiến bruk rivang ma-in (Sở Ilamo padhih saong rivang ma-in tỉnh Ninh Thuận) brei thau, mboh hu pren khang meng bruk patagok rivang ma-in dalam bol bhap rah ra, rivang ma-in gah ngak nong di puk palei, Sở Ilamo padhih saong rivang ma-in pambuak haong Sở ngak nong saong patagok palei pala, pok panuac ka UBND tỉnh mboh tangin tame đề án cak rok patagok “Danak dak yaok sa xã sa pandap rivang ma-in gah ngak nong”. Pataom tame lac patagok pandap panda gah ngak nong, oh ngak nong, dịch vụ hu pren khang di yaok puk palei tui chuỗi giá trị. Ngan haong Ninh Thuận ye rivang ma-in dalam bol bhap rah ra oh ka hu cambaih laih. Dalam tukvak jaik di ini, tỉnh jeng cak rok patagok hu dua pluh dom labik homestay duh ka tuai damuai mbang huak ndih daok tuk mai tal Ninh Thuận. Dom urang tuai damuai mai meng Hà Nội biak takre bruk rivang ma-in yau ini. Ini lac jalan ngak bahrau, jalan ngak raok akaok bruk rivang ma-in di Ninh Thuận.

Ninh Thuận lac sa tỉnh daok kreh 2 tỉnh Khánh Hòa saong Bình Thuận. Ini lac dua tỉnh hu angan gah du lịch, hu ginup abih dom jalan ngak saong pandap panda rivang ma-in jeng biak rilo. Kayua yau nan ye, lac sa tỉnh nao hadei saong daok gar kreh dua ong prong gah du lịch, Ninh Thuận njauk hu jalan nao karei, njauk ngak tabiak dom labik nao tal bahrau ngan haong dom janih pandap ndung bak tự nhiên, biak karei piah dui pachreih tuai damuai. Dalam nan bruk rivang ma-in gah ngak nong, rivang ma-in dalam bol bhap rah ra daok ngak jeng bruk karei nan./.

Urang lang: Jasi-2/8

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân