Piah ba ban raya Hồ Chí Minh jeng sa ban đô thị văn minh, sa ban njauk daok, karja ban raya daok kham merat ba tabiak rilo jalan ngak. Bruk njauk biai nan lac, dom jalan ngak piah pasiam đô thị ini taduan hu bruk pachreih tui, bruk njauk hatai di bhap bini, hu daong ngak jeng mbaok meta bahrau yaok harei angaok ban raya angan Wa. Kadha vak di Cao Thoa, urang vak di rayo sap ndom VN daok di ban raya Hồ Chí Minh:

Phố hàng rong camreip abih di ban raya Hồ Chí Minh daok di jalan Nguyễn Văn Chiêm, Quận 1 bahrau peih tabiak di puac bilan 8 ngak ka sa-ai Lê Thị Bích Lan pablei bún riêu di labik ini uan tabuan tal haok ia meta. Uan tabuan kayua sa-ai haong 40 sang bhap bini labik ini, urak ini hu labik pablei salih siam mekre, khik hu haci hacih pandap mbang menyum, oh daok huac kayua lih mek jalan yau dahlau daih. Sa-ai Lê Thị Bích Lan drut drui lac: "Dahlau daih pablei grauk labik kayua pablei nduac. Pablei grauk labik kayua oh hu labik tani tanat. Urak ini hu labik tani tanat yau ini, ye kham merat pablei salih pandap biak siam, biak hacih. Urang mai blei thei jeng meyaom, urang lac pablei yau ini biak siam”

Meng phố hàng rong Nguyễn Văn Chiêm, anak tal di rilo jalan di kreh Quận 1 saong dom quận, huyện karei meda hu dom phố hàng rong brei ka mikva “pablei naong pablei cakaong” hu labik pablei salih tani tanat, meng nan khik hu siam mekre ka jalan, ka mbaok meta ban raya.

Dom jalan phố hàng rong haci hacih hu tabiak rai gam saong jalan nao takai Nguyễn Huệ, bloh jalan nao takai bộ Bùi Viện saong pabak tame nan lac jalan tapuk Nguyễn Văn Bình gam saong dom  jalan hẻm, dom nắp cống hu trang trí nghệ thuật ngak jeng sa blah rup cih gheih mekre, văn minh di dom labik kreh ban raya angan Wa. Ini jeng lac ilamu hadah krah di ban raya gah meraong ini saong lac labik nao tal oh klaak tapa hu di tuai damuai daok dalam saong lingiu taneh ia tuk mai tal Việt Nam dalam dom harei lễ Quốc khánh 2/9 thun ini. Ông Lê Ngọc Lâm, sa urang Việt daok di ban Osaka, Nhật Bản ndom lac: Kol dahlak mai ini mboh bui sambai saong drut drui tuk tame jalan nao takai Nguyễn Huệ, biak praong, biak mekre. Jalan nao takai ini ngak ka urang mboh chreih chrai tuk mai tal ban raya HCM. Urak ini ban raya oh brei hàng rong pablei grauk labik bo pataom veik sa labik, bruk ini biak njauk. Bruk rami ramik veik  vỉa hè dahlak mboh daok siam tagok. Dahlak caong lac anak tal karja saong bhap bini ban raya ngak hu rilo bruk siam mekre jang”

  Oh lac ramik pasiam veik jalan mbak, ban raya Hồ Chí Minh daok hu tabiak bruk jak ba bhap bini rik pren tame padang “ban raya oh hu nerak”. Meng thun 2016 tal ini, gah mặt trận di ban raya saong dom kapul nyaom thành viên kham merat pathau khan bruk khik caga alam môi trường, jak ba bhap bini oh klaak nerak lingiu jalan, neh rabha nerak di sang, tui bruk “Khu phố oh hu nerak”. Hu bloh labaih 850 mbang tabiak bruk padang veik trật tự đô thị, haci hacih môi trường dalam ban raya ngan saong labaih 500 ribau mbang menuac urang pataom mbaok tame. Tal urak ini, dalam ban raya hu 1.237 khu phố tut angan ngak “Khu phố oh nerak” ngan saong 528 khu dân cư hu công nhận, daok hu siam mekre haci hacih tapa yaok harei. Ong Nguyễn Văn Tuổi, sa urang daok di Quận 1 mboh lac:Ban raya ini biak praong, biak mekre. Mbaok meta ban raya daok salih karei tapa yaok harei. Dahlak  mboh ban raya daok yam tal sa ban thông minh”

 

  Karja ban raya daok khang hatai dalam bruk ramik pasiam đô thị, dalam nan pataom tame bruk padang veik trật tự vỉa hè, lòng, lề đường piah ngak jeng labik siam mekre njauk haong angan di sa ban văn minh, hiện đại. Yaom lac bruk ngak ini oh tabiak truh hu bruk daong palagaih ka bhap bini ngak mbang, diukrai tani tanat. Ong Nguyễn Thành Phong, urang dang akaok Ủy ban bhap bini ban raya Hồ Chí Minh lac: “ Bruk kham merat di kol dahlak lac ngak yau habar piah ka bhapbini diukrai saong hu bruk ngak mbang siam. Dahlak caong dom urang dang akaok UB bhap bini dom quận, huyện di ban raya hu jalan rami ramik veik  lòng đường, vỉa hè, abih di nyu lac labik bhian hu rilo menuac. Dahlak caong lac, oh pok brei angan khu phố văn hóa ngan saong dom labik daok rah tabiak bruk lih mek jalan suan adat.”

 

Meng dom phố hàng rong hu padang tagok daong ka urang kathaot hu labik pablei salih oh abih jien pah labik, tal dom jalan nao takai gheih, mekre, saong dom jalan hẻm haci hacih, gam saong dom jalan ngak khang piah padang veik trật tự vỉa hè di karja ban raya Hồ Chí Minh hu ngak jeng kadha praong njauk caik hatai ngan saong menuac sia dalam taneh ia. Thau lac anak meta jeng daok rilo cuang kandah, tavak tavaiy, min karja saong bhap bini ban raya Hồ Chí Minh daok khang hatai piah padang sa ban văn minh, hiện đại, bak hatai anit ranam gauk, sa ban njauk daok di taneh ia saong khu vực./. 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân