Bahrau ini, quyền Akaok mentri Y tế Nguyễn Thanh Long oh njauk hatai haong bruk brei test samar ka dom tỉnh, bal kayua ong ndom lac Test samar oh hu yaom gah palih ruah, duah mboh urang hu virus SARS-CoV-2. Yau nan, test samar lac hagait, tuk halei njauk test samar?

Dom urang jakar daok ngak bruk dalam duk ngak iek 

GS, AHLĐ Nguyễn Anh Trí brei thau, SARS-CoV-2 lac sa janih  Corona virus, hu asal patoa veik ARN. Virus ini hu mong yau kháng nguyên. Sa urang njaom SARS-CoV-2 ye hadei di 7 - 15 harei meng menek tabiak kháng thể piah pacang veik virus.

Urang njaom virus SARS-CoV-2 bhian pa-auk ruak meng 5 tal 14 harei hu urang suai jang meng meda tamuh tabiak jeng ruak Covd-19. Min kadha biak jhak lac dalam tukvak pa-auk ruak ye urang hu virus meda pambak virus tabiak dalam bol bhap rah ra. Kayua yau nan ye, njauk dut iek piah duah mboh ka ba hu urang daok hu virus SARS-CoV-2 piah brei daok karei, piah patrun bruk njaom mbak dalam bol bhap rah ra.

Piah dut iek duah tabiak anek virus SARS-CoV-2, njauk pandar ilamu Realtime-RT-PCR,. Ini lac sa ilamu tui jalan ngak brei gien praong tagok jang rilo mbang. Angaok dunya ngak yau nan. Meng lavik mai, khaol drei jeng ngak yau nan. Daok dut iek meng test samar – bo urak ini di dom labik daok pandar – nan lac duah mboh kháng thể di virus SARS-CoV-2.

Pandar dut iek test samar piah duah mboh virus SARS-CoV-2 lac oh lagaih kayua dom makna hadei ini: pandar dut iek piah duah mboh anek ruak bo nao duah kháng nguyên nan lac oh njauk. Meyah hu dương tính, ye mong yau jeng oh mek hu anek ruak, kayua urang nan daok kháng nguyên halei oh? Saong meyah dahlau di nan hu ye nyu ngak njaom mbak virus tabiak gah langiu paje.

Taphia di nan, meyah dut iek aval ye tuk halei jeng mboh âm tính, kayua lac kháng thể tuk halei jeng suai mboh jang. Meyah hu âm tính, ye oh thau hu urang nan urak ini hu virus dalam rup halei oh. Urang hu âm tính test samar meda sahneng lac drei oh njaom mbak virus, oh daok hu virus nan ye mbuan ba tal njuak ruak ka dua gah lac: urang nan sahneng lac drei oh ka njaom mbak nan ye meda njauk njaom mbak; daok meyah dalam rup hu virus SARS-CoV-2 ye meda pambak tabiak ka bol bhap rahra. Ini lac kadha biak jhak.

Yau nan, likau ndom lac, test samar oh hu yaom gah palih ruah piah duah mboh virus SARS-CoV-2 di urang mai meng bhum jit. Yau nan ye dut iek meng test samar njauk pandar dalam tuk halei?

Ka 1, lac tui iek bruk taong ruak di dom urang hu njaom SARS-CoV-2 hu mboh kháng thể halei oh, daok kháng thể halei oh. Bruk ini piah ramik veik jru cavao, salih jalan taong ruak ka nyu laghaih.

Kadha dua, lac piah pasang iek dịch tễ học dalam bol bhap rah ra piah thau lac dahlau di nan bhap bani labik nan hu njaom virus SARS-CoV-2 halei oh? …meng nan ba tabiak jalan pacang caga jit.

Pacang jit ruak nan lac bruk biak cuang kandah, glaih glar caong khin khaol drei njauk kham merat abih drei. Bruk akaok meti lac bhap bani oh padauk saong samar khan brei thau; meyah medhil lac drei njauk ruak ye njauk nao tal sang iek ruak piah pasang iek; njauk peih ngak siam bruk cuk suek pabang cambuai, bhian rao tangin meng aia hacih, tui bruk brei daok atah gauk, oh pataom rilo manuac…Ini lac dom bruk biak mbuan ngak, takik abih jien min kein laba biak glaong. Bruk padam jit hu siam lagaih halei oh dahlau di abih lac meng bhap bani,meng bol bhap rah ra./.

Urang lang: Jasi-13/8

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân