Me-ik saradang nan lac sa dalam dom janih ruak oh njaom mbak rilo angaok dunya. Urak ini angaok dunya hu labaih 425 triệu urang diuk rai gam haong ruak me-ik saradang. Jien buh tabiak iek ruak me-ik saradang daok jeng naong trak oh lac ka urang ruak, ka baoh sang bo daok lac ka rahra, abih di nyu lac dom urang daok ranaih umo oh patuah njauk ruak.

Gru jru daok iek ruak

Umo thun di urang riak dak harei dak ranaih, abih di nyu lac me-ik saradang  tuýp 2. Dahlau diah, ruak rah tabiak di urang umo 40 thun tagok, urak ini rilo urang njauk ruak tuk bahrau 25-30 thun, gaok mai lac umo thun daok sit. Jaik 70% urang njauk ruak oh thau lac drei njauk ruak. 85% urang thau lac ruak tuk hu biến chứng mbuan ba tal metai yau tim mạch, suy thận, glo akaok, biến chứng palak takai...

Urang ranaih njauk me-ik saradang nan lac kadha daok ngak brei duh hatai kayua tukvak jaik di ini dom uranaih lamek dak harei dak rilo. Bruk pasiam ruak ini kan kandah jang kayua dom jru menyum brei trun saradang dalam darah bhian takik hu roh duah di uranaih saong uranaih bhian oh ngak njauk tui jalan iek ruak hu ba tabiak di gru jru, oh khik hu bruk mbang menyum, ndih daok yau urang prong.

Dom roh duah jaik di ini jeng brei mboh me-ik saradang di uranaih ye biến chứng meda trak jang, tukvak ba tal biến chứng avan jang saong biến chứng rilo jang dut haong me-ik saradang di urang prong. Kayua yau nan ye, piah pacang caga me-ik saradang ka urnaih, dom amaik ame njauk tui iek bruk mbang huak saong teik trak. Liên đoàn me-ik saradang dunya brei thau, 50% urang ruak me-ik saradang saong 90% urang ruak meik saradang tuýp 2 meda pacang caga hu meng bruk salih jalan diuk rai, patagok bruk vận động, tui iek teik trak saong bruk mbang huak.

Taphia bruk dak harei dak hu rilo urang ranaih umo njauk ruak me-ik saradang, ye janih ruak ini jeng mbuan njauk haong urang metian ngan haong amaik saong anek meyah oh pasang iek siam saradang dalam darah. Ngan haong dom adit akaok mereip mbuan ba tal talabuh, nek kamar metai dalam tian, hu rilo urang talabuh rilo mbang hadei di nan meng thau drei njauk ruak me-ik saradang. Hu dom urang mboh biak damen, metian hu 37 – 38 adit ye anek kamar metai dalam tian saong amaik var drei jan oh thau hagait kayua chỉ số saradang biak glaong bo oh hu pasang iek yaom lac urang amaik mbuan ruak me-ik saradang. Urang metian njuak ruak me-ik saradang jeng mbuan ba tal dom biến chứng yau ngak brei dị tật ka anek kamar, abih di nyu lac dị tật tim mạch, glo akaok, metain prong… Ngan haong urang amaik lac mbuan njauk jang dalam harei hadei. Tal urak ini, hu 3 jalan ngak piah can thiệp tame nhóm ini nan lac salih jalan diuk rai, pandar jru saong blac raih.

Tui dom chuyên gia y tế, salih jalan diuk rai nan lac jalan ngak siam di abih, hu gam ramik veik bruk mbang huak saong patagok bruk ma-in thể thao pathram thể lực piah patrun kilo. Jalan ngak ini ba mai rilo siam mekre dalam tukvak akaok mereip, min oh khang kajap. Kayua yau nan ye, urak ini manuac sia daok pamaong tal jalan ngak lac pandar jru ngan haong nyaom dahlau di me-ik saradang mbuan ba tal dom biến chứng gah tim mạch. Daok bruk blac raih thắt dạ dày atau pagam veik dạ dày – jalan tung pruac hu pandar ngan haong nyaom limek, hu chỉ số rup babhap (BMI) labaih 34./.

Urang lang: Jasi - 14/11

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân