Iek ruak, taong ruak meng atah nan lac sa caong khin biak biai dalam bruk mong iek pren yava di bhap bani, di dom urang prong thun, hu ruak meng dahlau mai. Abih di nyu lac dalam tukvak pa-atah di gauk kayua ruak Covid-19, bruk caong khin nan dak glaong jang. Pambak tame bruk ứng dụng hu blaoh, bahrau ini, pasak Y tế quận Gò Vấp, TPHCM hu peih ngak iek bruk iek ruak di sang, meng nan paglaong hatai jia di bhap bani ngan haong labik iek ruak di phường xã.

Urang gru ju mai iek ruak di sang

Amuk Nguyễn Thị Nữ, 61 thun daok di phường 16, quận Gò Vấp, TPHCM njauk ruak tagok darah saong thoái hóa 2 akaok ta-uk nan ye nao mai biak kan kandah. Dom bilan ini mai, amuk Nữ hu urang ngak di balai y tế Phường 16 mai mong iek ruak, duk darah, mek mẫu dut iek tui tacei pato di bác sĩ balai. Hadei di nan, dom hagait pambuak tal pren yava di amuk Nữ hu urang ngak y tế pambuak pagam haong bác sĩ. Dom kết quả lâm sàng samar hu brei thau, bác sĩ peih bruk iek ruak saong brei jru tapa komputer. Jru cavao hu payua tal sang hadei di nan. Amuk Nữ bui sambai khan lac: Mbuan laghaih rilo, oh nao pak halei, oh dang cang, tok ieu phon ye hu bác sĩ atau y tá mai paje. Urak ini drei taha paje, nao mai kan kandah, njauk nao radaih juak, nao kabak ye oh nao atah hu, pandik talang. Hu urang y tá mai khám pak sang ye siam paje, anai y tá jeng abih hatai, bui sambai.

  Bác sĩ Nguyễn Thị Thương, akaok balai y tế Phường 16 quận Gò Vấp brei thau, yaok harei balai y tế khám nội khoa cấp cứu meng 20-30 urang, peih bruk iek ruak, klauk jru pacang caga ka 60-70 urang. Urak ini balai tok hu 2 bác sĩ nan ye biak rilo bruk, mikva njauk cang suai. Kayua yau nan ye, điều dưỡng hu nao trun tal sang, pambuak pagam meng atah ka bác sĩ mong iek pren yava urang ruak saong ba tabiak panuac tacei: Meng jalan ngak ini khaol dahlak gam daok pak ini meda iek hu ruak tapak, tuk halei hu lịch nao iek ruak di sang mikva ye điều dưỡng pak ala nan ieu phon tagok saong khaol dahlak iek ruak gam. Khaol dahlak pambuak pagam haong pasak y tế quận, sang iek ruak quận daong bruk iek ruak di balai. Biak mbuan laghaih, daok urang ruak ye mboh njuak hatai ka jalan ngak ini.

  TS-BS Nguyễn Trung Hòa, akaok Pasak Y tế quận Gò Vấp brei thau, meng bilan 3/2020, pasak hu peih ngak iek bruk iek ruak meng atah, tapa telemedicine ka bhap bani ngan haong dom labik ba caik di Balai y tế dom phường: 16, 8, 12 saong Bilik khám Đa khoa Nguyễn Thái Sơn. Bruk peih prong jalan ngak ini hu daong ka dom urang ruak njauk ruak mãn tính oh njaom mbak hu khik iek di balai y tế, trun bruk rilo menuac iek ruak di dom sang iek ruak tuyến angaok: Nyu hu sa kein laba biak atah tra, nan lac khaol drei mek bruk taong ruak piah pacang caga ruak. Tuk taong ruak ka bhap bani pak sang ye meda taduan mek hu bruk pacang caga ruak ka bhap bani yau habar. Abih di nyu lac dom janih ruak yau pandiak tabiak darah, tangin takai cambuai atau cúm, ye meda hu duah mboh samar drah.

Langiu di dom siam laghaih yau nan, tui PGS.TS.BS Tăng Chí Thượng, Phaok akaok Sở Y tế TPHCM, iek ruak meng atah daong khik kajap bruk iek ruak gam gam di sang iek ruak saong mong iek pren yava akaok mereip di bol bhap rahra. Tui kuhria meng ini tal puac thun, meng jalan ngak di Gò Vấp, Sở Y tế meda hu ba tabiak sa jalan ngak biak cambaih laih saong mong iek piah pambak prong: "Khaol dahlak ba tabiak dom kadha lac: Kasa lac lagaih haong dom urang brei ngak dahlau nan lac urang prong thun njauk ruak mãn tính oh njaom mbak. Yau nan min, njauk pacang cakak dom bruk halei oh meda pandar hu jalan ngak ini yau biến chứng trak… njauk ba urang ruak tame sang iek ruak mong iek tapak. Ka dua lac ngak njauk jalan jalan iek ruak hu ba tbaiak piah yam tal bruk lac BHYT ba-yar.

    Bahrau ini, Mentri Y tế hu mboh tangin saong peih ngak Đề án “Iek, taong ruak meng atah” tukvak 2020-2025, pamaong tal jalan ngak nan lac taong abih dom labik y tế dalam negar hu daong gah chuyên môn tuk caong khin, rik daong patrun bruk glaong biar gah chuyên môn di tuyến trung ương saong tuyến ala. Meng jalan iek ruak salih bahrau ini, bhap bani tok daok pak sang ye jeng taduan mek hu dịch vụ y tế siam./.

Urang lang: Jasi-10/7

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân