Ka 1. Đảng patabiak rilo sarak praong peih ngak sarak nyaom raya Đảng mbang XII

Thun 2018, Đảng drei patabiak rilo Sarak piah ngak brei cambaih laih dom bruk ngak praong bo Nyaom roay mbang XII di Đảng hu ba tabiak, hu makna praong ngan saong bruk cakrok patagok khang kajap di taneh ia, pambak khang, praong, dalam tal urang jakar, urang đảng saong bol bhap rahra.

 

Ka 2.Quốc hội saong Rajaei salih bahrau khang jalan ngak, bruk ngak hu ginum biai bloh saong tacei pato jayah rilo kadha praong di taneh ia

Tui jalan padang ngak sa Rajaei dak padang, tapak, hacih, ngak bruk saong duh ka bhap bini, dalam thun bloh, Thủ tướng saong dom Phó Thủ tướng, dom urang dalam Rajaei jhul khang padang ngak saong pasiam jalan ngak, lang talaih kan kandah, tavak tavaiy, salih bahrau bruk ngak harak gar, dui pachreih urang dalam saong langiut taneh ia buh jien tame ngak mbang, gam jhul patagok kinh tế - xã hội, gam pasiam raidiuk bhap bini.

Ka 3. Peih ngak jak jeng dua bruk pambuak gauk lac: gam khik tani tanat kinh tế vĩ mô, gam jhul patagok kinh tế, GDP dalam thun mek hu labaih 7%

Ala bruk pan akaok di Đảng, bruk tacei ba khang di Rajaei, thun 2018, taneh ia ngak hu saong ngak tapa 12 tanut patagok kinh tế - xã hội. GDP mek hu 7,08%, lac tanut glaong di abih dalam jaik sa pluh thun tapa.

Ka 4.Tổng Bí thư Nguyễn Phú Trọng hu Quốc hội pok ngak kaok negar

Meng dom blah phiếu njauik hatai buh brei jaik abih, di mbang nyaom ka 6, dom urang Quốc hội mbang XIV hu pok Tổng Bí thư Nguyễn Phú Trọng ngak akaok negar Cộng hòa xã hội chủ nghĩa Việt Nam.

Ka 5.Quốc hội pasang iek, brei tapa Hiệp định pambuak bruk taong abih gah saong  tiến bộ xuyên Thái Bình Dương (CPTPP), taneh ia drei patui bruk mbeik drei tame dunya praong, dalam

Harei 12/11/2018, Quốc hội brei tapa Sarak Phê chuẩn Hiệp định CPTPP saong dom văn kiện pambuak tal.

Ka 6.Việt Nam peih ngak jak jeng Diễn đàn Kinh tế Thế giới ka ASEAN thun 2018

Diễn đàn Kinh tế Dunya ka ASEAN thun 2018 (ieu katut lac WEF ASEAN 2018) ngan saong kadha “Cách mạng Công nghiệp 4.0 lac harei hadei di ASEAN” pachreih hu bruk caik hatai sangka di dunya.

 Ka 7. Bruk pacang caga tham nhũng, mesruh pacang tiêu cực hu peih ngak khang. Rilo urang jakar pakat glaong njauk xử lý kỷ luật

“Oh hu vùng cấm”, “oh hu ngoại lệ” saong “oh hạ cánh an toàn” – bruk khang hatai, tantu, cambaih laih di Đảng, Karja, urang dang akaok lac Tổng Bí thư, akaok negar Nguyễn Phú Trọng hu taong abih urang Đảng, taong abih bhap bini saong taong abih urang lin pachreih tui.

Ka 8. Bleik saleik dalam mbang pakacah tamat trung học phổ thông pakat negar thun 2018; hu dom sang bac kurang an toàn

Bruk rilo urang jakar dalam gah pato megru di Hà Giang, Sơn La, Hòa Bình… ba tangin tame, sửa điểm thi dalam mbang pakacah trung học phổ thông pakat negar ngak tatuan megei menuac sia. Yaok rituh bài thi hu sửa điểm tagok biak glaong tui jalan ngak biak tinh vi. 

Ka 9. Langik tasik oh lagaih, bala meng lingik tasik ngak brei khat lahik biak trak ka rilo gah, rilo tỉnh ban, rilo labik

Bala meng langik tasik ngak khat lahik gah kinh tế jaik 20.000 tỷ đồng, ngak brei 218 urang metai saong lahik. Hajan praong ngak dauk rilo mblang hamu, saong ngak ka rilo jalan di dom ban praong dauk dalam yau tasik ia. 

Ka 10.Caoh mbanh Việt Nam hu jak jeng praong meng hu HLV Park Hang

Thun 2018 biak lac 1 thun jak jeng hadah hadai di gah caoh mbanh Việt Nam ngan saong 3 jak jeng di châu lục saong di khu vực: kapul dit blong Việt Nam tagok labik dang Vô địch di Giải vô địch caoh mabnh Đông Nam Á (AFF Suzuki Cup) hadei di 10 thun maong akaok, kapul Olympic Việt Nam dang ka 4 di ASIAD 2018; kapul U23 Việt Nam ngak tatuan megei baoh taneh haong angan Á quân Giải caoh mbanh U23 châu Á di Thường Châu (Trung Quốc).

 

  

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân