Pathau mikva saong taong abih gauk! Kadha urang ngak hamu caong thau harei ini pabak thông tin ka mikva urang nông daok khin patagok bruk raong glang, pabak pajaih menuk ada. Daa mikva saong taong abih gauk duah thau jalan ngak di saai Phú Hữu Hải Đăng daok di ban sit Phước Dân, huyen Ninh Phước, tỉnh Ninh Thuận.

Hadei di tuk bac tamat cao đẳng gah thủy lợi di sang bac cao đẳng Công nghệ - Kinh tế saong Thủy lợi bhum kreh negar thun 2013, saai Phú Hữu Hải Đăng mai palei padang mbang ngui meng bruk raong menuk ada. Saai patak pataom phun jien blei 20 drei menuk binai raong mebaoh kram caih anek yau meng kan mai. Mboh menuk amaik kram baoh saong raong anek yaok mbang dui atah 4 bilan, saai mai tal dom trại menuk dalam tỉnh duah thau jamriak kram baoh. Meng hu thau dom ilamu kỹ thuật, Hải Đăng blei pandap mai eng drei ngak saong pagam thiết bị điện tử ka tu kram baoh menuk công suất meng 300- 500 baoh min abih takik jien, tỉ lệ caih anek labaih 80%. Gam ngak gam duah thau, saai patagok tapon menuk ada hu 260 drei ngan saong dom pajaih menuk palei, menuk glai, menuk Lương Phượng, menuk Đông Tảo, ada Xiêm.

 

Saai ba baoh menuk ada tame mac kram pasang iek bruk sinh trưởng di phôi di harei ka 4 saong harei ka 15 piah mek klak dom baoh oh siam. Hadei di tuk menuk anek “trun khay”, saai ủ ấm saong klauk ginup dom janih vắc – xin pacang ruak ka menuk ada. Hadei di dua adit raong menuk anek hu khang kajap, Hải Đăng pablei ka mikva dalam palei ngan saong yaom 15 ribau đồng sa drei. Yaok bilan, saai pablei meng 400 tal 500 drei menuk ada pajaih, jien mek tame meng 7 tal 8 triệu đồng, kaoh blaoh phun jien daok laba meng 3 tal 4 triệu đồng ginup ka sang mbang cai.

 

Diuk pasang saai hu amaik ame brei tabiak daok karei saong padang sang daok hong ngak var ro raong menuk ada di taneh Chòm Lôn, di ban sit Phước Dân. Hadei di tuk tani tanat labik daok, saai pataom tame raong menuk binai Lương Phượng lai menuk nòi palei brei tabiak menuk anek F1 samar tagok kilo, ralo catang, pahe bingi pabak ka darak pasar. Lingiu di nan, saai pataom tame peih praong tapon menuk glai, menuk Đông Tảo pabak anek pajaih menuk “raong me-in” di bhap bini puk palei, menuk pajaih raong me-in hu yaom glaong jang 3- 4 mbang menuk raong pablei ralo. Tui saai Đăng, menuk pajaih di baoh sang urak ini oh ginup pabak bruk raong menuk ada di mikva palei Mỹ Nghiệp. Saai daok kuhria padang ngak var ro siam lagaih piah patagok bruk raong menuk ada pajaih tui jalan an toàn, khang kajap.

 

Saai Phú Hữu Hải Đăng brei thau: khin raong hu laba rilo ye drei brei hu jalan ngak lagaih, brei duah thau darak pasar saong patagok bruk pandar ilamu – kỹ thuạt tame raong glang. Drei raong hagait bo darak pasar caong, oh lac raong tui hatai takre di drei.

 

Meng bruk raong menuk ada, abih di nyu nan lac raong menuk ada pajaih brei pandar ilamu kỹ thuật saong pacang cakak jit ruak. Menuk anek barau caih pren pacang ruak takik nen ya urang raong brei kham merat, meng palih ruah baoh, kram baoh, úm anek, pacang cakak ruak, brei ka nyu mbang menyum iek tui menuk praong, sit.

       

Kadha “Urang ngak hamu caong thau“ adit  ini tal ini likau padeih. Kadha ini kayua rayo sap ndom VN pambuak saong pasak pachreih nông peih ngak./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân