Lầu Mí Xá (bac di sang bac Hành chính Quốc gia) oh mai veik sang bac hadei di tết kayua jit Covid-19. Karei jang ban sit, bhum taneran … hu wifi grauk labik, sang di urang lakei ni daok krieh gilai nan ye wifi klaih klaoh, tuk hu, tu oh. Kayua yau nan ye Lầu Mí Xá nao duah labik hu riyak blaoh padang kathaom piah tame hu internet bac online.

Lầu Mí Xá saong dom adei 

Lầu Mí Xá daok di xã Sủng Trái, huyện Đồng Văn, tỉnh Hà Giang. Adei urak ni bac thun ka 3 di sang bac Hành chính Quốc gia Việt Nam.

Mí Xá caga nao bac veik hadei vaktu padeih Tết min kayua jit Covid-19, sang bac brei padeih bac, adei nao duah labik hu riyak piah tame hu internet bac online.

Mí Xá khan lac: “Hu padieh bac, adei mboh bui sambai gam mboh duh hatai. Bui sambai kayua hu daok di sang daong ka amaik ame, duh hatai kayua adei oh caga hu kadha bac megru saong palei adei oh hu riyak phone tangin, oh hu internet nan ye bruk bac online biak kan kandah”.

Sahneng lac dom kan kandah ka bruk bac megru meda ngak ka adei kadun likuk, min oh lac yau nan, adei jeng daok kham marat tui bac. Adei mek phone pan tangin tabiak pan nao di jalan tame puk, hu labik di mangaok mbaok phone hu riyah 4G, adei sahaneng tabiak bruk padang sa baoh kathaom di labik hu riyah piah lagaih ka bruk bac online. Mí Xá bui sambai brei thau lac: “mboh hu riyah phone, adei padang kathaom, ngak sa baoh manieng blaoh pacang bạt piah bac. Malam camriep bahrau padang blaoh jak dua ayut mai ndih ye hajan pasah abih. Darak pakauk pablei, adei nao sang saai sang mek bạt tabiak pacang veik, yau nan sahaneng hatai piah bac online paje”.

Mí Xá brei thau: tuk bac blaoh aval ye adei mai sang, daok meyah bac lavik melam ye adei ndih veik di kathaom ni.

Ndom ka bruk kham marat yam tapa kan kandah di adei Lầu Mí Xá, nai Lý Kim Bình (jabat khik ramik pato megru saong patagok nhân lực hành chính, Học viện Hành chính Quốc gia) brei thau, Mí Xá gam bac gam daok meng 12 thun yau nan ye eng drei thau kuihria caga. Adei lac kreih camin piah ka dom sinh viên bhum ceik, dom labik daok gaok rilo kan kandah kham marat bac tui.

Dalikan ka bruk kham merat yam tapa kan kandah di Lầu Mí Xá daok di bhum ceik glaong tuk ba tagok mạng hu urang sangka, pok mayaom. Tài khoản Khuat Thu Hong mayai lac: “Dalilan biak ghieh. Drei jeng sanya oh mbuah kan hagait tuk internet nduac suai. Yaom lac suai min jeng biak siam jang dom labik yau bhum palei di adei Lầu Mí Xá. Tadhau yuh adei brei ka drei mboh chreih chrai.”. Daok Tài khoản Mai Hương Nguyễn vak: “anit adei biak rilo! Biak njauk pok meyaom bruk kham merat yam tapa kan kadah dalam bruk bac taa di adei”./.

(Urang lang: Thu Thảo – 20/04) 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân