Ban Biên Hòa, tỉnh Đồng Nai brei padieh bruk khik ranaih di dom labik pato mầm non mbiah tal tuk hu panuac brei thau bahrau

Page ini ( 3/8), Rajaei ginum biai bilan 7 thun 2020 ala tacei ba di Thủ tướng Nguyễn Xuân Phúc, ginum biai ka bruk peih ngak dua bruk haong gauk lac gam pacang jit gam patagok kinh tế. Thủ tướng brei thau: tui kuhria di dom kapol dunya, Việt Nam lac taneh ia hu patagok dang dhi 5 di dunya thun ini ngan saong 2,8%. Brei panuac kakei juai iek lap, oh luai ka jit Covid-19 tamuh tabiak pambak praong, Thủ tướng tacei pato brei pataom abih prein khang piah langyah abih dom sruh jit ruak di Đà Nẵng, kham merat ngak brei salah dalam akaok bilan 8. Gam saong nan, brei hu dom jalan pacang caga sumu, abih di nyu lac khik salamat ka mbang pakacah THPT rah tabiak dalm dua harei 9 saong 10 bilan 8 ini.

Meng harei ni, ban Biên Hòa, tỉnh Đồng Nai brei padieh bruk khik ranaih di dom labik pato mầm non mbiah tal tuk hu panuac brei thau bahrau. Biên Hòa lac labik hu uảng ruak 595 hu Mintri Y tế brei thau 2 harei dahlau. Ngan saong dom puk palei daok veik, Sở pato magru Đồng Nai ieu kakei dm labik khik ranaih njauk tui iek prien yava di uranaih mai saong nao meng dom tỉnh karei, abih di nyu nan lac mai meng dom bhum hu jit. Bruk pato bán trú ka ranaih njauk khik kajap bruk pacang caga jit.

Langiu di labik pasak, meng 14 tuk biar harei ini, tỉnh Quảng Nam brei pacang gac labik phố Thịnh Mỹ, phường Cẩm An, ban Hội An. Urak ini, Hội An hu 12 mbang urang ruak Covid-19, ta-eng phố Thịnh Mỹ hu 3 urang ruak saong labaih 100 urang F1. Langiu di ban yao klak Hội An, harei ini, tỉnh Quảng Nam brei pacang di anak meta dom labik mbuan njom ruak Covid-19 glaong.

Tui pathau khan di gah pasang iek jit Covid-19, tal masup ni, di ban raya HCM hu 69 urang njom Covid-19, dalam nan hu 8 urang njom bahrau hu pambuak tal Đà Nẵng. urak ni ban raya hu mek mẫu di 23 ribau 949 urang mai meng Đà Nẵng meng harei 1/7 tal urak ni. Tapa nan mboh lac, hu 5.565 urang âm tính, 8 urang dương tính, dom urang daok veik oh ka thau. Gah y tế jeng daok patagok bruk pasang iek Covid-19 di rahra.  

Dalam 6 bilan akaok thun, Mban bangsa tỉnh Cà Mau ngak hu salah blaoh 3/3 bruk hu jao brei dalam danak dak bruk ngak dalam thun, abih di nyu lac “ dua bruk ngak haong gauk” lac gam patagok bruk ngak mbang – xã hội di gah khik iek gam pacang jit. Tapa nan, rilo sarak an sinh xã hội daong ka urang bangsa takik hu peih ngak saong ba mai kein glaong. Tukvak 2015 -2020, Mban bangsa tỉnh Cà Mau peih ngak rilo bruk jak ba pakacah gauk, rik daong paglong jalan sahaneng, bruk ngak di rajakar, urang ngak ka bruk ngak, pakacah, meyaom, ngak brei chreih chrai pakacah gauk di dom urang ngak bruk bangsa.

Kuhria tal dah page ni (3/8), labaih 18 triệu 200 ribau urang njom COVID-19 di dunya. Mỹ jeng daok lac bhum jit praong abih ngan haong labaih 51 ribau urang njom dalam 24 maong tapa. Di Châu Á, Ấn Độ lac negar hu urang njom saong metai glaong ka 5 di dunya. Min, Ấn Độ jeng brei peih gilac dom bilik pahat rup, pasak pato yoga saong padieh bruk giới nghiêm tuk melam meng harei 5/8.

Harei ini, Hi Lạp peih pakak muyim ala akaok meti di dunya di kaoh pulao Alonissos, duh ka tuai takre duah thau dom kadha di ala tasik. Muyim lac sa sruh gilai kram di labik dalam meng 21 tal 28 mét, pajeng meng 3.000 tal 4.000 baoh bình klak meng abap 5 dahlau Công nguyên hu urang nao tasik duah mboh di thun 1985. Muyim peih pabah mbang mweng harei ini tal harei 2/10 brei ka dom urang njuk ia. Tuai damuai oh thau njuk ia meda rivang iek tapa công nghệ thực tế ảo. Hy Lạp daok kuhria peih veik 4 labik rivang iek sruh kapal kram dalam tasik jiak taphia nan, piah ngak jeng sa labik njuk ia  dui pachreih hu rilo tuai damuai jang.

Kapul công nghệ điện tử Samsung Electronics di Hàn Quốc brei thau lac meda padieh sang mac ngak computer puac abih di Trung Quốc daok di ban Tô Châu ngan haong labaih 1.700 urang. Thun 2012, sang mac ngak tabiak dom pandap yaom 4,3 tỷ USD, min, hadei nan trun daok 1 tỷ USD di thun 2018. Samsung brei gam pambang sang mac ngak phone tangin puac abih di Trung Quốc di thun dahlau kayua oh mariek gauk hu haong dom sang mac ngak dalam negar, salih tapa peih praong bruk ngak di Ấn Độ saong Việt Nam./.

Urang lang: Thu Thảo – Ái Nghiêm – 03/08 15:37:21

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân