Harei pataom Du lịch – melam gom truac hadah Ninh Kiều – Cần Thơ mbang ka IV peih tabiak meng harei 27 – 29/11 tal

Harei ini (17/11), Quốc hội mbang 14 ginum biai tamat mbang nyaom ka 10. Dahlau di tuk akaok Quốc hội Nguyễn Thị Kim Ngân brei panuac tamat, Quốc hội ginum biai, brei tapa rilo asal kadha praong, dalam nan hu brei tapa Hukum Khik caga môi trường (pasiam veik). Danak dak hukum ka bruk khik caga alam langik tasik, quyền, bruk ngak saong trách nhiệm di jabat, kapul nyaom, baoh sang, menuac urang saong bhap bini dalam bruk khik caga lam langik tasik. Njauk caik hatai nan lac, danak dak hukum hu ba tabiak jalan khik caga alam langik tasik; sarak di karja ka khik caga alam langik tasik, rami labik khik caga alam langik tasik, parabha bhum alam, taong yaom bruk mai meng alam langik tasik.v.v…

Harei 16/11, di jabat rajaei, Phó Thủ tướng Vũ Đức Đam hu taom mbaok 63 gru pato lac urang bangsa takik hu angan je hu pok manyaom dalam danak dak “klah raba saong gru pato” thun 2020 kayua kapul dam dara CS Hồ Chí Minh pakat negar peih tabiak. Di mbang taom mbaok, Phó Thủ tướng Vũ Đức Đam brei thau, Đảng, rajaei tuk halei jeng iek praong bruk buh jien tame cak rok patagok gah pato magru di dom bhum hu kinh tế-xã hội biak kan kandah, bhum mikva bangsa takik saong dom urang mbang tui sarak kanja. Phó Thủ tướng ieu kakei dom mintri, dom gah, kapul saong pakat rajaei tui viek iek praong bruk parabha kadung jien ngak pasiam danak dak pato magru, ngak pasiam cơ sở vật chất, tapuk siphau, pandap panda pato bac, sangka jang tal raidiuk, pato pakai di gru pato di bhum atah bayah, bhum mikva bangsa takik...

Di mbang nyaom ka 15 ka bruk paginup dom angan urang dang akaok di UBND tỉnh Ninh Thuận, Hội đồng bhap bini tỉnh mbang 10 vaktu 2016-2021 hu brei padeih ngak akaok UBND tỉnh Ninh Thuận vaktu 2016-2021 ngan haong ong Lưu Xuân Vĩnh (kayua padeih hưu); brei padeih ngak phaok akaok UBND tỉnh ngan haong ong Phạm Văn Hậu (kayua brei nao ngak bruk karei). Dom urang lambaok hu pok ong Trần Quốc Nam, Phó Bí thư Tỉnh ủy ngak Chủ tịch UBND tỉnh Ninh Thuận vaktu 2016-2021. Mbang nyaom daok hu pilih riah, pok ong Phan Tấn Cảnh, urang dang akaok Sở padang ngak saong ong Nguyễn Long Biên, urang pan akaok Sở Nội vụ, ngak Phó Chủ tịch UBND tỉnh Ninh Thuận vaktu 2016-2021.

UBND TPHCM bahrau njauk hatai brei ka Sở Công Thương ban raya patui bruk peih ngak danak dak “Khuyến mại bilan ameh” meng harei 22/11 tal harei 12/12. Dom doanh nghiệp hu mbaok tame meda peih rilo danak khuyến mại ngan saong tanut glaong abih ka yaom di pandap panda, dịch vụ tagok tal 100%. Dahlau di nan, meng harei 1/6 tal 30/7, TPHCM hu peih danak dak “60 harei ameh”, peih mbaok ka “Bilan khuyến mại thun 2020” hu 1.400 DN, taong abih yaom khuyến mại lac labaih 33.700 tỷ đồng, tagok jang 87% dut saong tukvak ini thun dahlau. Danak dak hu rik tame bruk jhul patagok pandap pandar dalam taneh ia, daong ka dom DN ngak mbang, pablei salih, pasiam dom kan kandah di jit praong Covid-19.

Harei pataom Du lịch – melam gom truac hadah Ninh Kiều – Cần Thơ mbang ka IV, thun 2020 kayua UBND quận Ninh Kiều padang ngak hu peih tabiak meng harei 27 – 29/11 tal. Ini lac tuk piah ka quận Ninh Kiều jeng yau ban sit Cần Thơ yaih khan dom labik ravang me-in gheih mekre yau ye: Bến Ninh Kiều, tatua nao takai Ninh Kiều, Nhà lồng darak Cần Thơ, Chùa Ông…. Haong dom bruk ilamu, daoh tamia, dom kadha me-in meng kan, ragu ragam jalan dhua, palao gom bingu, bruk mbang huak meng kan mai di bhap bini. Kadha praong dalam harei pataom lac danak dak pataom pui hadah biak gheih mekre, ndung bak ilamu kraong ribaong miền Tây.

Vaktu 2 di mbang pasram taong kalin tasik di Hải quân Malabar hu mbaok di gah lin tasik dom negar Ấn Độ, Mỹ, Nhật Bản saong Australia hu peih tabiak meng harei ni (17/11) di bhum tasik Ả-rập saong dui atah tal harei 20/11. Mbang pasram nan hu mbaok di dom sruh gilai mblang kapal ahaoh INS Vikramaditya di negar dang peih tabiak lac Ấn Độ gam saong gilai mblang kapal haoh taong mesruh Nimitz di lin tasik Mỹ saong dom chiến hạm di Nhật Bản saong Ốt-xtrây-lia. Dahlau di nan, brei panuac ndem hadei di mbang ginum biaai dua pagam dua di akaok mintri Ngoại giao saong Quốc phòng Ấn Độ- Mỹ, dua negar njauk gauk lac khik tani tanat bruk sron mbon dunya tui adat hukum, paglaong pháp quyền soang saron mbon di gah tasik di bhum tasik dunya saong iek glaong taneh ia saong chủ quyền di dom negar lac bruk njauk ngak.

Cty jru Moderna di Mỹ brei thau, hãng ini meda pabak ka Rajaei Mỹ tal 20 triệu mbang janih vắc-xin caga Covid-19 siam mekre tal 94,5% di puac thun ini. Lambaok Moderna brei thau, ini lac bruk mai meng ngak iek lâm sàng ngan saong dom janih vắc-xin hu angan ieu lac mRNA-1273. Hu jaik 30 rabau urang halan hatian hu mbaok tame bruk ngak iek lâm sàng tukvak puac di Cty Moderna saong bruk ngak iek oh mboh hagait kan kandah meng janih vắc-xin ini.

Gah Y tế dunya (WHO) brei thau hu 65 urang njom ruak Covid-19 dalam dom urang ngak di kapul ni di jabat daok di Giơ-ne-vơ, Thụy Sỹ kuhria meng di tuk jit tamuh tabiak. WHO jeng daok pasang iek sa jalan njom mbak karei. Ông Mike Ryan, lac urang dang akaok danak dak samar drah di WHO hu panuac khan lac, urak ni bhum Giơ-ne-vơ di Thụy Sỹ saong bhum Vaud jaik taphia hu manuac njom mbak ruak glaong abih di dalam dunya./.

Urang lang: Thu Thảo – M. Phương – 17/11 10:34:43

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân