Tỉnh Ninh Thuận birau ngak salah Sang ilamu bac pasram di bhap bini Cam di palei Hamu Craok, ban sit Phước Dân, huyện Ninh Phước

Kurhia tal melam  18/10, hajan ia sua di gah kreik negar ngak ka labaih  122 urang metai song lahik; rilo menuac oh ka taom gaok hu, jiak 600 boh sang jaleih, ia ba theik, rilo jalan mbak nao mai, rkrong ribong njauk  glut jaleih ; dom pluh ribau hécta padai njam patam song rong pala kaya ikan njauk  khat lahik .Dom tỉnh meng  Quảng Bình tal Thừa Thiên Huế hu ba 11.500 boh sang gam song labaih  35 ribau urang tal labik siam mekre  . Dalam harak payua ka dom mintri, dom gah song dom tỉnh ban pataom tame dong duah, pasiam veik labik glut jaleih taneh di labik  thủy điện Rào Trăng 3 song kapul Kinh tế - Quốc phòng 337. Thủ tướng rajaei hu payua panuac ravang klah rabha pandik harao haong gauk gar dom urang jakar, urang lin metai, klah rabha dom duh hatai haong dom sang hu menuac lahik oh ka duah mboh.

Tui Uỷ ban negar pacang caga bala meng langik tasik saong daong duah urang gaok bala, dalam Quân khu 4 urak ini hu jiak 6.000 urang lin saong jaik 5.000 dân quân tame daong duah urang gaok bala; hu ba 1.751 sang di Quảng Trị tal labik  salamat.  Daok di labik Quân khu 5, hu 462 urang ngak bruk daong duah urang gaok bala; hu pasiam veik 3 labik jalan glut jaleih. Di labik glut jaleih lam kateik 22 urang jakar, urang lin Đoàn Kinh tế- Quốc phòng 337, page ini (19/10), tỉnh Quảng Trị brei thau, taong abih jalan Hồ Chí Minh gah Pei saong jalan tame labik glut jaleih peih veik nao mai hu lagaih, gah chức năng daok duah dom urang jakar, urang lin daok lahik.

Tui pathau khan samar di Jabat mban tacei jalan pakat negar ka pacang caga bala meng langik tasik, tal 18 tuk beir harei 18/10, hu  84 urang metai,  38 urang lihik kayua hajan ia sua  di gah krek negar, hu jiak  53 ribau boh sang njauk ia dauk, labaih  24 boh sang tayah, jaleih. Gah ngak nong hu  924 ha padai, labaih 110 ribau  ha njam patam  dauh dalam ia; labaih 461 ribau drei athur rong, song menuk ada metai, ia ba theik. Dom  tỉnh meng  Quảng Bình tal  Thừa Thiên Huế hu ba jiak 11.500 sang, gam song labaih  35 ribau urang nao  tal labik siam mekre

Mban tacei jalan pakat negar pacang cagapjit  Covid-19 brei thau, mesup ni (19/10), Việt Nam yam tapa harei ka 47 oh hu urang halei njom dalam bhap bini. Hu 8 urang njom bahrau Covid-19 di bier harei kabroi (18/10) mai meng negar langui song hu brei dok karei tui adat. Tong abih urang taom gaok jiak  song mai meng bhum jit dok hu pasang iek pren yava  lac  12.379 urang. Việt Nam hu taong thit ruak ka labaih  1.031/1.037 urang, meblah labaih  91%.

Ủy ban bhap bini tỉnh Ninh Thuận, MBan khik iek danak dak padang ngak dom bruk duh ka bhap bini saong công nghiệp tỉnh birau ngak salah saong ba tame pandar Sang ilamu bac pasram di bhap bini Cam di palei Hamu Craok , ban sit Phước Dân, huyện Ninh Phước. Danak padang ngak meng thun 2018 piah ngak labik bac pasram ka bhap bini, peih ngak dom bruk adat cambat ilamu meng kan, bac megru ilamu, akhar horoh Cam… Tapa nan, rik daong khik ramik ilamu meng kan, phi vật thể di bhap bini Cam saong jhul hang bruk cak rok patagok dulcih di tỉnh.

Tổng thư ký Liên hợp quốc Antonio Guterres khang panuac lên án dom mbang tong tame  labik hu rilo menuac dok dalam song taom dar labik  mesruh gauk Nagorno-Karabakh dalam tuk Ác-mê-ni-a song  A-déc-bai-gian dok tuh ka gauk lac ngak suan panuac sanya padeih cuk. Ong ndom lac, 2 negar brei ngak njauk tui hukum  piah khik caga bhap bin song labik daok di bhap bini. Ala bruk dang tabiak langyah di Nga, 2 gah njauk hatai  padeih cuk meng harei  17/10/2020 hadei di jiak  3 adit mesruh gauk. Min, dahlau di tuk bruk padeih cuk hu batabiak, 2 gah oh padeih tuh ka gauk lac ngak suan panuac sanya.

“Jit ruak Covid-19 mbang ka 4 di Đặc khu hành chính Hồng Kông, Trung Quốc meda mai avar jang tui kuhria mboh dahlau” lac panuac di Cục Y tế song pandap mbang Hồng Kông. Dalam 2 adit mai ini, labik ini daok hu  62 urang njom Covid-19 bahrau dalam bhap bini, dalam nan hu rilo urang oh thau anek ruak njom meng halei, hu nao mai rilo labik saong taomh gaok rilo menuac. Kuhria tal urak ni, Hồng Kông hu 5.242 urang njom Covid-19 song  105 urang metai. Tui dom urang ilamu, jit  Covid-19 di pak ni dui atah kayua dom urang njom dalam bhap bini oh ka hu duah mboh.

Yaom lac jit ruak Covid -19 tamuh biak khang, harei 18/10, yaok pluh ribau urang jak gauk trun jalan di dom ban praong di negar Pháp piah hadar sa  gru  pato  lịch sử-địa lý njauk kol khủng bố pametai. Hu mbaok trun jalan, langiu dom gru pato, giàng viên dom sang bac, bhap bini, daok hu mbaok di Thủ tướng Pháp Jean Castex, gam saong dom jakra Rajaei saong urang ngak praong di dom đảng chính trị. Tui kuhria dahlau, sa bruk pahadar pakat negar ka Samuel Paty meda peih tabiak di harei But 21/10 anak tal./.

Urang lang: Ái Nghiêm – Hani Pha – 19/10 10:32:09

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân