Tukvak tapa, dom adat cambat, tanarakun dalam baoh sang, bhap bini urang Cam di Viet Nam hu dom salih bahrau piah lagiah saong xa hoi birau, min dom ilamu siam ghieh dalam baoh sang njuak jeng daok hu khik ramik. Kadha vak di Aí Nghiêm, urang vak di Rayo sap ndem Viet Nam daok di Ban raya HCM hu ndem ka bruk ini

PGS,TS Trương Văn Món

Meng kan mai, urang Cam tuk halei jeng iek praong ilamu di baoh sang, but pajaih di drei. Dom urang dalam baoh sang, meng ong muk, amaik ame tal anek taco thei jeng hu hatai sahaneng pabak ka baoh sang di drei. Yaok urang dalam sang ndom puac daok dang saong gauk thau akaok thau iku, thau angaok thau ala saong tuk halei jeng iek praong gauk.  Tui PGS,TS Trương Văn Món – Gru patao di Khoa Nhân học, Sang bac Đại học KHXH & Nhân văn Ban raya HCM, urang Cam brei mboh ilamu diukrai dalam sang, sang ini saong sang diah, baoh sang saong puk paga biak cambaic laic: “Urang cam tuk gaok gaok panuac tangi camriep di abih lac sang nan hu maik ame, anek bik yau habar, bruk mahik ngak mbang yau habar, oh halei tangi sua mada atau kathaot..”

Sa dalam dom ilamu brei mboh calaic laic di abih meng kan mai di urang Cam nan lac adat tui darah gah amaik. Tui Adat ini, sang kumei kuhria likei ka anek, metau likei mai daok di sang diuk saong anek kumei meng hu parabha varis. Tal urak ini, adat tui darah gah amaik jeng daok mboh dalam bhap bini Cam. Min jeng hu rilo salih birau, urang likei jeng hu iek praong sumu urang kumei. 

Yau ye sang sa-ai Salamah daok di phường 17, quận Bình Thạnh. Sa-ai lac akok Kapol urang kumei tổ dân phố 60, jien bilan oh hu hadom, nan ye sa-ai Châu Abdolloh pasang sa-ai gam pablei salih pandap điện pak sang gam sangka iek glang bruk sang, daong ka sa-ai sahanang hatai ngak bruk xa hoi. Sa-ai brei thau, ngak hu siam bruk Kapol urang kumei lac meng hu gah lakuk khang kajap, lac baoh sang, lac urang pasang naih joi bruk pablei salih, daong bruk sang ka diuk. Tui sa-ai Salamah, yaom lac daok khik adat tui darah gah amaik, min dalam sang diuk pasang sa-ai lac sumu gauk: “Dalau dieh bruk hagiah praong dalam sang, urang lakei njauk tangiu urang kumei. Urak ni hu salih karei paye bruk hagaih meng praong tal sik diuk pasang jeng ginum gauk…”

Dalam baoh sang, langiu bruk urang kumei hu mbang varis, adat tui darah gah amaik di urang Cam daok brei anek bik mek angan tui họ gah amaik. Tok diuk tok pasang brei lingiu họ amaik, meyah ngak suan bruk nan lac duas loạn luân. Meyah diuk pasang luah gauk, ye urang pasang mai veik but pajaih di drei haong 2 plak tangin saoh, oh ba anek tui, oh hu drap ar hagait. Jeng meda lac kayua yau nan bo diuk pasang tuk halei jeng anit ranam gauk. Imem Từ Công Dư, Phaok akaok Halau janeng Cam Bini tỉnh Ninh Thuận brei thau: “ Raiudiuk dak harei dak salih karei min bruk tui darak gah amaik jeng daok hu khik viek…”

Langiu di adat tui darah gah amaik, bruk diukrai di baoh sang urang Cam tui agama Islam daok brei tui Rukun. Dalam sang, urang pasang ndom puac bingi pang haong diuk, iek glang diuk, pasang ndom diuk pang, amaik ame iek glang anek bik, daok anek bik ye iek praong amaik ame, ndom puac bingi pang haong amaik ame…Piah pasiam talei rohim di dom urang dalam baoh sang, khik kein laba ka yaok gah saong khik ramik haniem phol, Rukun Islam hu tacei tabiak cambiac laic bruk lakhah caga saong raidiuk baoh sang. Tui Haji Mach Dares Samael, Phó mBan lambaok bhap bini Islam Ban raya HCM, hukum Islam brei urang likei tok tal 4 urang diuk min brei anit ranam dom urang diuk yau gauk saong brei sangka iek glang, kuhria ka yaok urang diuk saong dom anek hu bingi sahanang, tani tanat raidiuk sumu yau gauk. Yau nan min, urak ini, urang Cam Islam jeng ngak njauk tui hukum di karja, sa diuk sa pasang piah khik ramik haniem phol:  “Urang Cam Islam hu adat brei tok 4 urang diuk, min oh halei ngak yau nan, bo sa diuk sa pasang tui hukum kanja”

Urang Cam biak iek praong talei rohim anit ranam gauk. Dom urang dalam sa but pajaih haong gauk tuk halei jeng anit ranam gauk, iek praong guak. Di bilan  Ramadan, Ramưwan, Katê  yaok thun, mikva bhian nao rivang adei sa-ai, but pajaih. Urang brei gauk dom panuac tadhau ayuh siam mekre, prein yawa khang kajap, ngak mbang kaya meda. Tui urang Cam, amaik ame umo taha bhian daok saong anek kumei taluac atau parabha gauk daok saong dom urang anek piah daong iek, pato anek taco. Ngan saong urang Cam, baoh sang halei bo hu ong muk, amaik ame prein yawa daok khang kajap, daok pato hu anek taco nan lac bruk hadah mbaok meta  dalam puk paga./.

Urang lang: Ái Nghiêm – 28/06/2020

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân