Tui sa harak pathau khan brau ini hu Cao ủy pacang bruk nô lệ độc lập (iew katut lac IASC) di raja-ei Anh brei thau, Việt Nam lac sa dalam 3 negar hu rilo manuac urang njauk ba pablei tapa Anh di abih. Số liệu bo dom gah di raja-ei saong lingiu raja-ei Anh brei mboh yaok thun hu yaok rituh urang Việt nhập cư lậu tame negar ini tui jalan tapa rilo negar di jalan talei pablei salih manuac urang.

Di labik duah mboh 39 urang metai dalam container di Essex

Meng thun 2017, urang pal akaok IASC tuk nan lac ong Kevin Hyland brei thau bruk ba manuac urang tame Anh nan lac sa “Bruk ngak mbang pablei salih prong”. Piah meyaih khan, dom jalan talei pablei salih manuac urang pamaong tal urang Việt hu pachot lac “bruk njuan jien bilan glaong” saong “rai diuk trei sil” tuk dom urang ini hu ba nao tal bhum taneh châu Âu.

Pambak tame bruk oh thau rilo saong mbuan jia tame, kaol nyu ba tabiak dom yaom karei di gauk, tui IASC. Meyah buh tabiak 33.000 bảng (jaik 1 tỉ đồng), jalan nao tapa Anh meda lac katut panak di abih saong takik gaok cuang kandah di abih. Daok dom urang palih ruah yaom lap meng 10.000 - 20.000 bảng (jaik 300 - 600 triệu đồng), ye dom urang nan meda nao tapa jalan dui atah rilo bulan, nao tapa rilo negar yau Nga, CH Czech, Hungary, Đức, CH Ireland saong Pháp dahlau di tuk tame hu negar Anh.

Dom urang caong khin salih bahrau rai diuk kham merat duah jien piah hu tabiak negar langiu, gaok mai nao mesre trak jien jhung di dom urang pablei manuac. Dom urang ini jia lac, tuk nao tapa hu Anh ngak bruk, samar bayar klaoh sre saong payua jien mai sang. Sa urang Việt oh brei thau angan khan haong IASC lac anai hu sanya hu rai diuk yau anai bia di Anh ngan haong pandap mbang bingi, khan ao siam gheih, bruk ngak njuan njac, jien bilan glaong. Jia tui dom panuac yamen la-an nan, anai buh tabiak 19.000 bảng min bruk biak di nyu oh yau hatai caong khin.

Lingiu di dom urang halar hatian nao, daok hu rilo nạn nhân, abih di nyu lac dom adei daok di bhum palei kathaot, njauk pachot pagat. Dom urang daok ranaih ini njauk kaol pablei manuac jak ba, gaok mai daok cap mek ba nao Anh tui jalan suan adat hukum.

Mbang nao biak cuang kandah, min tuk nao tal bhum taneh daok caong tal ye rilo urang Việt meng “tatuak drei”, njauk bóc lột, gaok mai njauk daok dalam cảnh nô lệ jaman urak ini. Dom pathau khan di Anh rilo thun tapa brei thau cambaih urang Việt hu ba lậu tame negar ini jaik abih nan lac  ngak bruk tangin takai yau daok pak tiệm ngak cakau, mblang bein pala cần sa gaok mai daok nao ngak kumei ma-in. Tui blah The Guardian, sa urang ngak cakau brei thau nao ngak meng page mesep tal melam 7 harei dalam sa adit min tok hu bayar 30 bảng/adit (jaik 900.000 đồng). Hu dom urang daok oh khik hu yaom jien drei duah hu bo njauk dom urang pablei manuac poh blah. Dom urang ini njauk diuk rai khép kín tui bruk sap gap di po tiệm. Sa gah kaol nyu thau drei nao tame Anh oh njauk adat hukum nan ye njauk lac caong pambak cầu cứu ye kaol nyu huac njauk cảnh sát duah mboh saong ciuk bruk bóc lột. Sa gah tra, hu dom urang daok oh mong mboh drei lac nạn nhân di dom kaol pablei manuac kayua saneng lac drei palih ruah nan ye njauk ba-yar jien.

Dalam tuk nan, rilo uranaih njauk lah pachot ba tapa Anh blaoh kateik pandar mong iek bein cần sa. Ngak ka dom adei diuk rai dalam huac kanda, njauk pa-atah haong rai diuk gah langiu saong oh hu ba-yar jien bilan. Jeng mai meng dom jalan talei tội phạm yau nan, nan ye hu dom hu daong veih tabiak ye huac oh khan brei thau hagait. Lingiu di nan, gah chức trách Anh bhian dak dom urang ini tame gah nhập cư lậu saong tội phạm salih ka bruk lac nạn nhân pablei manuac nan ye oh hu rilo jalan ngak pacang khik siam mekre. Dom kapul nyaom ngak pahla tacei tabiak lac, rilo urang hu daong ba tabiak truh labik pala cần sa ini min oh suai lavik ye njauk kaol pablei menuac ini ba tame sa labik pala cần sa karei./.

Urang lang: Jasi - 9/11

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân